Январьданул 13-нний ДР-лул ХIукуматрал Председательнал хъиривчу МахIаммад ИсяевлучIа хьунни шагьрулул пассажиртурансса транспортрал даву низамрайн дуцаврил масъала ххалбигьлагьисса совещание.
ХIасан Аьдилов
Совещаниялий ххалбивгьунни ларгсса шинал ахирданий лавсъсса автобусру МахIачкъалалив ва Каспийскалий зузи баврил масъала.
Масъала ххалбигьавривух гьуртту хьунни ДР-лул Транспортрал ва ххуллул хозяйствалул агентствалул каялувчи, МахIачкъалаллал ва Каспийскаллал бакIчитал, ДР-лул ГИБДД-лул управлениялул ва ДР-лул Госавтонадзорданул каялувчитал.
ДакIнийн бутанну, ларгсса шинал декабрьданул 24-нний МахIачкъалалив бувкIссар Дагъусттаннал ХIукуматрал машан лавсъсса Нефтекамскаллал завод_рал итабавкьусса автобусру.
ДР-лул Транспортрал ва ххуллул хозяйствалул агентствалул каялувчинал хъиривчу Сиражуттин Айгумовлул бувсъсса куццуй, МахIачкъалаллал администрациялущал цачIу хIадур дурну дур «ххуллул карта», ккаккан бувну бур му «карталийн» ларсъсса давурттаха зунсса инсантал.
МахIаммад Исяевлул тапшур бунни автобусру занази бан бакIрайра ккаккан дурсса маршрутирттайх, мукунма сакин бан масъалалуха зунсса оперативсса штаб. Вице-премьернал бувсунни жаваблувсса каялувчитурахь ччясса мутталий аьркинну бушиву дузал бан диспетчертурал къушру, цIубуккан буван автобусру бацIайсса павильонну. Ахъушинскийл ва Имам Шамиллул проспектирдавух машинартту чIявуну заназаву хIисавравун лавсун, тапшур бунни, ГИБДД-лул зузалт кIункIу бувну, остановкарду машинарттацIа марцI дуван.
МахIачкъалаллал администрациялул бакIчинал бувсмунийн бувну, пассажиртурансса автотранспорт низамрайн дуцаву мурадрай, хIадур бувну бур шагьрулул маршрутирттай пассажиртал ва кьай духхаврил хIакъиравусса Положение; хIадур бувну бур автобусирттай зунсса шофертурал конкурс баврил хIакъиравусса документру. Конкурс буллантIиссар 2015 шинал 1-мур кварталданий.
Совещаниялий гьуртту хьуминнал хIукму хьунни автобусру занази бан шанна маршрутрайх, 5-7 минутI ляхну занази бувну:
1 маршрут: ЦIусса автостанция – Ахъушинскийл проспект – И. Шамиллул проспект – Булачлул кIичIира – Насруттиновлул проспект (Издательство);
2 маршрут: Къорхъмасовлул кIичIира (ЦУМ) – Дахадаевлул кIичIира – Р. ХIамзатовлул проспект – 1 Петрдул проспект – Насруттиновлул проспект – хьхьичIмур Каспийскалийсса ххуллу – Каспийскаллал автостанция.
3 маршрут: Аэрофлотрал агентство – Аэропорт «Уйташ».
«Махачкалинская автоколонна 1736» ОАО-лул директор Кьурбан Исмяиловлул бувсунни автобусрай зунсса шофертурал инструктаж дуллай бушиврия. Ганал увкусса куццуй, цIанасса ппурттуву зузалтран лахьхьин буллай бур газомоторная техникалий зун, миннул хIалкьазия, яла миннан дулунтIиссар хасъсса свидетельстварду.
Шофертал буцлай бур конкурсрай ххув хьуми.
Га кьини, январьданул 13-нний, маршрутрай лавгунни 2 автобус, миннул пассажирталну бия цивппа шофертал.
