Бигьалагай гьантрайгу шагьрулул агьамсса масъаларттаха зий бивкIунни МахIачкъалаллал администрациялул отделлал сайки циняв каялувчитал ва пишакартал. Байрандалул гьантри бунугу, шагьрулул администрациялий салкьи хьусса масъаларттаха зунтIишиву баян бувну бивкIссар духмур шинал ахирданий шагьрулул чIумуйсса бакIчинал кIанайсса МахIаммад Сулаймановлул цалла каялувшиннаралусса цинявгу пишакартурайн.
Ми гьантрай ва шинал цалчин дуллалисса хъуннасса батIаврий, ларгмур шинал дурсса ва гьашину дан дакIнийсса давурттая бувсун махъ, МахIаммад Сулаймановлул кIицI лавгунни ялун нанисса февраль зуруйгу 2014 шинал шагьрулул администрациялул дурсса давурттал хIасиллу дуллалисса гьартасса батIаву дувантIишиву.
Шикку мукунма вай гьантрай жяматрал мюхчаншиву дуруччаву мурадрай дурсса давурттая бусласисса ихтилатру бувунни бакIчинал хъиривчутал Рафик Буттаевлул ва Сергей Цветковлул.
Вайннал кIицI лавгунни, шагьрулул кIулшивуртту дуллалисса циняргу идарарттай оьрчIан тяхъашиврунсса утренникру, шадлугъру цукунчIавсса диялдакъашивуртту къархьуну сакин дуршиву. Шагьрулул Культуралул управлениялул байрандалул гьантрай чIявусса халкь бавтIсса кIанттурдай ва театрдаву Дякъил Ттатта ва Марххаладуш гьурттусса личIи-личIисса шадлугъру сакин дурну дур. Мукунна КIулшивуртту дулаврил ва Машлул управлениярттал сакин дурну дур ятинсса оьрчIан ва нитти-буттал ургалалулу бакъасса оьрчIансса акциярду. Туризмалул, спортрал ва жагьилтурал иширтталсса буллалисса управлениялул шагьрулул жагьилтуран сакин дурну дур «Елка в кроссовках» тIисса цIусса шинал шадлугъ. Шагьрулул кIичIирттаву рекламалул афишартту, баннерду лахълахъисса, ми иширттаха зузисса управлениялул, УЖКХ-лул ва «Горзеленхоз» МУП-ралгу цайва бивхьусса циняв бигарду щаллу бувну бур. Вай бакъасса, МахIаммад Сулаймановлул амрулийну Москавлия, Ростоврая ва Къазахъисттаннава хасъсса пишакарталгу бучIан бувну, шагьрулул хъун майдан гьашину чIюлу бувну бивкIссар ляличIину авурну.
Вай гьантрай шагьрулул низам дуруччай къуллугърал зузалтгу зий бивкIссар укунмасса гьантрайнияргу жаваблувну.
Управлениярттал хъуниминнал ихтилатирттая махъ, батIаврил хIасиллу дуллай, Сулайман МахIаммадовлул хъуннасса аьй-бювкьу дунни МахIачкъалалив ишбажаранчишиврухун багьсса, дахху-ласу дуллалисса кIанттурдал заллухъруннал давурттай.
«БучIир жулва ишбажаранчитуран шагьрулийн лажинну кIура баен. Цалва ттучаннал, цивппа зузисса кIанттурдал лагма-ялтту лази-лакьи, чIюлу бан, байрандалул тагьар хIасул дан. Шагьрулул администрациялучIа ца цурдалу щалва шагьру чIюлу бансса каши дакъар. Гьарнаву цувагу, цалва кулпатгу яхъанахъисса шагьру ххирану, муниха аякьа дуллан аькьлу-кIулши дикIан аьркинни, чантI учин бучIир», — увкунни ванал.
Байрандалул гьантрай шагьрулул кIичIиртту цIинцI-ччюрклицIа марцI буллалисса, ва халкь ттукI, гъилишиву дакъа къаличIан идарарттал дурсса давурттая бувсунни бакIчинал хъиривчу Камил Изиевлул. Ванал бусаврийну, хасъсса режимрай зий бивкIун бур шагьрулул Аварий къуллугъ, най диркIун дур кьамул бувсса графикрайсса дежурствартту.
Дурсса давурттаясса ихтилатру бунни шагьрулул шаннагу райондалул администрациярдал хъуниминнал, цаппара предприятиярттал каялувчитурал.
«Каспий –Инвест» ООО-лул хъунаманал бусаврийну, бигьалагай кьинирдай хъун шагьрулий марххала, микIлачIру хьусса кьинирдай машинарду, халкь лагай ххуллурдайн 250 куб къундалул, 18 тонна цIил дирчуну дур. Шагьрулул бакIчинал, хIакьинусса кьинигу кIичIирттава цIинцI-ччюрк дукьаврил масъала яла къизгъинмур бур тIий, хъуннасса аьй дунни ва къуллугърай. Баянгу бунни, анаварсса мутталий цайва бивхьусса бурж биттур буллан бюхълай бакъахьурча, ва къуллугъращал шагьрулул цIакь дурсса кьутIи кьукьинтIишиву. Шиккува мэрнал баян бунни мугьлат бакъа «Горочистка» тIисса шагьрулул муниципал предприятие щурущи бувансса давуртту дайдишин аьркиншиврия.
БатIаврий кIицI лавгунни шагьрулул жяматрансса транспортралмур масъалалиягу. Вания ихтилат буллалисса бакIчинал хъиривчу Абусупиян ХIасановлул бусаврийну, пикрирду бусса бур маршруткарду гьарзану лагайсса цаппара кIичIирттавухсса маршрутру чан дансса ва халкь лахъан-ликкан транспорт дацIайсса остановкарду низамрайн дуцинсса ва ми зузи дуллансса. ХIакьинусса кьини, уттигъанну машан лавсъсса, газрай зунтIисса автобусру бачин буллансса 45 водительнан ми зузи буллан лахьхьингу бувну, хасъсса сертификатру дуллуну дусса дур.
