ЦIусса шинал хьхьичIми гьантрай чIявусса ихтилатру, гъалгъарду хьуна Дагъусттаннал телеканаллавухгу, чивчуна кказитирттайгу, «Илчилийгу» дуркссар МахIачкъалаллан ва Каспийскаллан хасну машан лавсун бивкIсса автобусирттал хIакъиравусса макьалартту.

ДакIнийн бутанну, тай гьант­рай къалмакъаллугума хьу­ссия маршруткарттал шофертуращал багьри лахъ баврил хIакъираву. МахIачкъалаллал бакIчи МахIаммад Сулаймановлул цащалласса хьунабакьаврий махъ буллуна декабрьданул 25-нний, МахIачкъалалив автобусру бувкIукун, маршруткарттах­сса багьри ххи баврил масъала ца чулийн буккан бан («Илчи» №50). Тара хьунабакьаврий икьрал хьуна ЦIусса шинал дайдихьулий МахIачкъалалив автобусругу занази бан, маршруткарттахсса багьригу лахъ бан. ЦIуса шин дучIаннинма бувкIунни МахIачкъалалив цIусса автобусру, ми ккаккан буллай бия телевизорданувухгу. Шагьрулул хъунмур майданнив бия 15 автобус.
МахIачкъалалив бувкIун бур цинявппагу сайки 100 автобус. Ми зий байбишин аьркинссия январьданул цалчинми гьант­рай. Амма ва зурул 12-ннийгу къабувккунни автобусру шагьрулувун. Вай январьданул каникуллу дуссаксса инсантал цIуру-кIурулий бия, автобусру бакъархха, вай чуври, ци був­ссар тIий.
Вай гьантрай жу оьвчарду МахIачкъалаллал администрациялийн. Масъалалул хIакъираву жу буллусса суалданухьхьун жаваб дуллунни хъуншагьрулул администрациялул прессалул къуллугъчи ПатIимат Раджабовал. Ванил мукъурттийн бувну, автобусру хIадурну бур маршрутирттайн буккан. ЦIанасса ппурттуву ххал буллай бур ми паракьат бансса, бакьин буллансса кIанттурду, хIадур буллай бур миннуй зун­сса шофертал, ми шагьрулуву бацIавансса кIанттурду. ЦIана му масъалалуха зий бур. «Январьданул 20-нния тIайла хьуну автобусру зунтIиссар» увкунни ПатIиматлул.
Зананхьуви.
|
ХIасан Аьдилов