ДР-лул Миллатирттал политикалул министерствалул баян бувну, уттигъанну республикалий хьуссар миллатирттал мазурдийсса материаллал конкурс «Славься, мой край родной!» цIанилусса. Мунивух гьуртту хьуссия республикалул миллатирттал мазурдий чичлачисса журналистъталгу.

Му конкурсрал комиссиялуву бия ДР-лул миллатрал политикалул министрнал цалчинма хъиривчу Зикрулла Илиясов, ДР-лул Журналистътурал союзрал вакилтал, республикалул кказитирттал редактортал.
Декабрьданул 8-нний ДР-лул Миллатрал политикалул министерствалуву хьунни му конкурсрал комиссиялул заседание. Му дачин дурну бия ДР-лул миллатрал политикалул министр Татьяна Гамалей. Муний дунни «Славься, мой край родной!» конкурсрал хIасиллу. Миннуйн бувну, ва конкурсрал цалчинсса кIану буллунни «Дагестанская правда» кказитрал творчествалул коллективран, Дагъусттаннал халкьуннал дянивсса дусшиву цIакь даврийн тIайла дурсса макьаларттахлу.
КIилчинсса премиярттан лайкь хьуминнавух бур «Илчи» кказитрал корреспондент Зулайхат Тахакьаевагу («Если протухнет соль..»). Мукунма кIилчинсса премиярттан лайкь хьунни яру­ссаннал «ХIакъикъат» кказит, «Аварскому театру – 80 лет» цIанилусса материаллахлу (автор Г. Казиев), «Нур» кказитрал редакция – «Две родины одного народа» материалданухлу (автор К. Оьмаханов).
Шамилчинмур премия дуллунни республикалул «Замана» кказитрал корреспондент М. Рабадановлун, ватандалул тарихран ва культуралун хас дурсса макьаларттал циклданухлу; Буйнакскаллал райондалул «Глас народа» кказитрал корреспондент Х. Хайруллаевлун, Севастополь шагьрулийнсса ва райондалул дуклаки оьрчIал аьрххилиясса макьаларттал циклданухлу; ДГУ-рал студентка Э. ХIажиеван «Лезги газет» кказитрай рирщусса «Переживания о родине» цIанилусса макьаларттахлу.
ДР-лул Миллатирттал политикалул министерствалул чулухасса ХIурматрал грамотарттан лайкь хьунни ниттил мазрал учитель А. Кьурбанова ва республикалул «ХIакъикъат» кказитрал корреспондент А. МахIаммадова.
Зулайхат Тахакьаевал «ЦIийн шатта багьарча, банмур ба­къассар» тIисса, ва конкурсраву 2-мур кIанттун лайкь хьусса, макьала дуркссар «Илчи» ва «Молодежь Дагестана» кказитирттай, миннул буккултралгу хъинну ххуйну кьамул дурссар. Муниву автор гьаз буллай бур хIакьинусса кьини цIурувкьюсса, жулва мархри, аьдатру хъамадитлатаврил, жагьилтал бяйкьу, бавкку ххуллурдайн буклакаврил масъала. Ца му дакъасса, Зулайхатлул махъсса цайми макьаларттугу, «Илчи» кказит­рал муданмасса буккултран ххуйну кIулссар, дур ватандалухсса ччаврил дурцIусса, мунил бучIантIимуний дакI цIуцIисса.
Ва премиялущалгу барча буллай Зулайхат Тахакьаева, чIа тIий буру ванин цIу-цIусса ххувшавуртту, хьхьичIуннайшивуртту. Вания тиннай ххари-ххарисса макьалартту чичлансса хъин багьантту чIяву хьуннав Лаккуйгу, аьмну Дагъусттаннайгу.
Бадрижамал Аьлиева