Ларгсса нюжмар кьини, декабрь зурул 5-нний, МахIачкъалаллал 17-мур школалий хьунни генерал-майор СалихI Халилович Халиловлун 95 шин шаврин хас бувсса шадлугърал мажлис.

СалихI Халилов дакIнийн утан, ва увсса кьини лахъа-хъун дан бувкIун бия отставкалийсса генерал-майор, республикалул ТОКС-рал каялувчи Оьмар Муртузалиев, ДР-лул аьрали комиссар Дайтбек Мустапаев, генерал-лейтенант МахIаммад ТинамахIаммадов, республикалул Ветерантурал советрал председатель МахIаммад Каримов, МахIачкъалаллал Ленинский райондалул Ветерантурал советрал председатель Басират Аьлиева, АьФ-лул ДОСААФ-рал региондалул отделениялул председатель Шамил Аьлиев, шагьрулул администрациялул ва республикалул СМИ-дал вакилтал, ветерантал, генералнал гъан-маччами ва дустал.
Андриана Аьбдуллаева
Шиккува кIицI бан, генерал СалихI Халилов дакIнийн утлатисса мажлис бансса пикригу хьуну, му бакIуйн буккан бангу хъунмасса захIмат бувну бур МахIачкъала шагьрулул Ленинский райондалул Ветерантурал советрал председатель, жула ла­кку инсан Басират Аьлиевал.
Мажлис байбивхьунни 17-мур школалул чIаравсса СалихI Халиловлул цIанийсса паркраву, ванал улттучIа тIутIив дишаврийну. МахIаммад Каримовлул бувсунни хIакьину генерал СалихI Халилович увсса кьини душиву, Хъунмасса Буттал кIанттул цIанийсса дяъвилуву Ххувшаву ларсун 70 шин хъанахъаврил лагрулувусса мероприятиярттугу ветерантуран пикри хьушиву дайдишин жула ххаллилсса генерал увсса кьинилул мажлисрая.
Гихуннаймур мероприятие ларгунни 17-мур школалул актовый залдануву. Генерал Халилов дакIнийн утлатисса, мунал оьрмулия, давурттая бусласисса ихтилатру бунни МахIаммад Каримовлул, Дайтбек Мустапаевлул, Шамил Аьлиевлул, чIярусса шиннардий генералнащал цачIу зий, хIала-гьурттуну ивкIсса Ибрагьим ХIамзатовлул, шяравучу, гъанчу Аьбдулхаликь Халиловлул.
Халилов СалихI Халилович увну ур 1919 шинал декабрь зурул 5-нний Лакрал райондалийсса Ххутрал шяраву. Школалий дук­лай ивкIун ур марцIну ххювардай, каялувшиву дуллай ивкIун ур комсомолтурал организациялий. Та чIумала ванал ккаккан бувну бур каялувчинал гьунар, инсантал цала лагма лаган бан, цала хъирив бачин бан кIулшиву. СалихI ивкIун ур спортравугу итххявхсса жагьил. ЧIявуну гьуртту шайсса ивкIун ур дучри ххяххан баврил бяст-ччаллаву. СалихIлул ппу Халил ччя-ччяни хIалтIилухун лагайсса ивкIун ур. Хъуна хьуну махъ буттан кумаг буллай, мунащал къазахънал станицардайх занай ивкIсса СалихIлун ччяни лавхьхьуну бур оьрус маз. СалихIлун 14 шин хьусса чIумал дунияллия лавгун ур ванал ппу. Кулпат лащу-щаллу баврил хъаргу чIивисса оьрмулуву СалихIлун лахълан багьну бур. Дуклай унува, колхозрал давурттай зун икIайсса ивкIун ур.
Аькьлу-кIулши дусса, итххявх­сса чIава жагьилнан дарсру бигьану лахьхьайсса диркIун дур. Ванан ччянива учитель хьунсса пикри бивкIун бур. Школа къуртал байхту, увххун ур Гъумучиял педучилищалувун. Амма му къуртал бан кьисмат къавхьуну бур. 1939 шинал ва ЯтIул Аьралуннавун лавгун ур.
Дуклай ивкIун ур Ттуплисуллал стрелково-пулеметный училищалуву. Ватандалийн душман ххявхсса чIумал, цалчинсса гьантрайва, душманнащалсса талатавурттаву гьуртту хьуну ур. Къучагъшиву ккаккан дурну дур Карельский фронтрай. Парос-озеро тIисса нех лахълахъиний ккаккан дурсса къучагъшиврухлу ларсун дур цалчинсса аьрали наградагу – Буттал кIанттул цIанийсса дяъвилул 2-мур даражалул орден.
Дяъви къуртал хьуну махъ СалихI Халилович къуллугъ буллай ивкIун ур Амурдал областьрай, мунияр махъ ва ивтун ур Каунас шагьрулийсса (Литва) дивизиялул командирнал заместительну. КIира шинавату ванайн тапшур бувну бур 44-мур воздушно-десантный дивизиялул командирнал къуллугъ.
1965 шинал, СССР-данул Ми­нистр­­турал Советрал хIукму­лийну, Халиловлун генерал-майорнал чин дуллуну дур.
Гьарца цайнма тапшур бувсса къуллугъ дакI марцIну бартбигьлагьисса, гьунар бусса марцIсса каялувчи СалихI Халилович бусравну ивкIун ур республикалул хъуниминначIагу, архIал зузиминначIагу.
1974 шинал СалихI Халилов ивтун ур Дагъусттаннал аьрали комиссарну. Мунияр махъ ванайн тапшур бувну бур республикалул ДОСААФ. Ва хъунамасса чIумал ва идаралул даража чIаланну гьаз хьуну бур.
СалихI Халиловичлул чялиш­сса гьурттушинна дайсса диркIун дур республикалий хъанахъисса гьарицагу иширттаву. Ва увчIуну ивкIун ур ДАССР-данул Верховный Советрал депутатнугу.
1987 шинал, Дагъусттаннал шяраваллил хозяйствалул институтрал ректор МахIаммад Жамбулатовлул оьвкуну, граждан обороналул хъунама преподавательну му институтраву зун ивкIун ур. 1989 шинал ветерантурал чулуха увчIуну ур СССР-данул халкьуннал депутатну.
1995 шиная 2004 шинайн ияннин СалихI Халилович Дагъусттаннал Ветерантурал Советрал председательну ивкIун ур. Му къуллугърайсса чIумалгу ванал ккаккан дурну дур цалла инсаншиву ва узданшиву. Хъуннасса аякьалулун лавсун бивкIун бур ветерантал ва миннал кулпатру. Буттал кIанттул цIанийсса дяъвилий ккаккан дурсса къучагъшиврун ва мунияр махъ личIи-личIисса давурттай зий ванал бивхьусса захIматран хIукуматрал лавайсса кьимат бивщуну бур. СалихI Халилов цимилагу лайкь хьуну ур ХIукуматрал бюхттул­сса наградарттан. «Заслуженный наставник молодежи РД» тIисса бусравсса цIа хьхьичIра-хьхьичI лайкь дурминнавух СалихI Халиловичгу ур. Миллатирттал дянив­сса дусшиву цIакь даву мурадрай чIярусса шиннардий дакI марцIну бивхьусса захIматрахлу, Аьрасатнал Президентнал хIукмулийну, СалихI Халиловлун дуллуну дур Орден Дружбы.
Ванал наградарттаву дур кIира ЯтIул Ттугълил орден, 1-мур ва 2-мур даражалул Буттал кIанттул цIанийсса дяъвилул орденну, кIира ЯтIул ЦIукул орден, дур «За заслуги перед Вооруженными силами» тIисса орден, мукунна чил билаятирттал орденну. Миннувух дур орден Полярной Звезды (МНР). СалихI Халиловичлул наградарттал ххазналуву чIярур личIи-личIисса медаллу ва грамотарттугу. ЯхI-къирият дусса, ххаллилсса дагъусттанчу генерал СалихI Халиловлул мусил хIарпирдай чирчуссар цалла цIа Дагъусттаннал тарихраву, — бувсунни МахIаммад Каримовлул.
Хъирив ихтилатру бувми цинявппагу кIицI лаглай бия СалихI Халиловичлул ххуй-ххуйсса хасиятру: инсаншиву ва узданшиву, дакI хъун дакъашиву, пахру-ххара бакъашиву, марцIшиву, тIайлашиву.
Генерал дакIнийн утан бавтI­сса цинявннахь, ванал мажлис авадансса программалийну чIюлу бувсса 17-мур школалул учительтурахь ва дуклаки оьрчIахь, Ленин­ккантуллал школа-гимназиялул (№5) токсовцынахь дакIнийхтуну барчаллагь тIисса ихтилат бунни генералнал гъанчу Аьвдулхаликь Халикьовлул.
— Жул Ххутрал шяраву 4 генерал уссар. Амма цалчин му чин ларсун, ххуллу тIивтIума СалихI Халиловри. СалихIлул арс Вячеслав Халиловгу воздушно-десантный аьралуннал генерал-лейтенантри. Ихтилатчитурал кIицI лавгсса куццуй СалихI Халилович оьрмулуву хьхьичIун ххяхлан къаххирасса ивкIхьурчагу, дяъвилул цIараву му мудангу хьхьичIххуттай ивкIссар, — увкунни ванал.