Ноябрьданул 26-нний МахIачкъалалив Р. ХIамзатовлул цIанийсса Миллатрал библиотекалуву хьунни халкьуннал творчествалиясса, фольклорданул ирсираясса, этнографиялиясса, тарихраясса ва краеведениялиясса видеолул ва анимациялул кинордал Региондалул ТIиртIусса «Радуга» конкурсрал хIасиллу дуллалисса шадлугърайсса батIаву.
Бадрижамал Аьлиева
Гьашинумур «Радуга» конкурс республикалий дуллалиссар 12-чин. Конкурс дуллалиссар АьФ-лул Культуралул министерствалул ва Аьрасатнал ПаччахIлугърал халкьуннал творчествалул къатлул чIаравбацIаврийну Республикалул Халкьуннал творчествалул къатлул, республикалул министерствардащал ва ведомствардащал цачIуну.
Конкурсрал жюрилуву бия режиссер, АьФ-лул Кинематографистурал союзрал Дагъусттанналмур отделениялул директор МахIаммад Сулайманов, режиссер, ДР-лул искусствалул лайкь хьусса ишккакку Кьурбан Ибрагьимов, искусствоведениялул доктор Мисрихан Маммаев, «Дагъусттан» ГТРК-лул тематикалул вещаниялул директор Салам Хавчаев, музыкант, ДР-лул искусствалул лайкь хьусса ишккакку Юрий Ханжов, искусствовед, РАН ДНЦ-рал ИЯЛИ-лул хьхьичIунсса элмийсса зузала Гулизар Султанова, Дунияллул халкьуннал искусствоведтурал ассоциациялул член Татьяна Петенина, режиссер, АьФ-лул культуралул лайкь хьусса зузала ПаттахI Кьурбанов.
Конкурсрай ккаккан дурну дия 30-нния лирчусса давурттив, МахIачкъалалиясса, Дарбантлиясса, Къизлардаясса, Южно-Сухокумскалиясса автортурал. Миннува конкурсравух гьуртту хьун язи дургьуссар 16 даву.
Конкурс цуппа хьунни личIи-личIийсса номинациярдайн бувну. Ва шиналсса «Радуга» конкурсрал язимур фильмран ккалли дурну, муний ххув хьунни Назира Аьлиевал фильм «О чем молчат камни». Ва дур Къара-Корейш шяраваллил тарихраясса фильм.
«Режиссерское мастерство» номинациялуву ххув хьунни ХIамзат Аьлиевлул «Дорогами дождей» фильм. Ва дур дагъусттаннал, лакрал язисса шаэр МахIаммад-Загьид Аминовлуясса кино.
«Сценарное искусство» номинациялуву хьхьичIунмунин ккалли дунни Эльдар Ферзиевлул «Христианство в Дербенте» фильм. ЦIанийн бувнува бувчIлай бур ва ссаясса дуссарив — Дарбантлив ххачпарастнал дин хIасул ва ппив шаврия.
«Операторское мастерство» номинациялуву ххув хьунни Марианна МахIаммадовал ва Фарид Муслимовлул цачIусса фильм «Праздник первой борозды».
«Лучшее музыкальное содержание» номинациялуву жюрилул язи дургьунни Александр Евтушенкол «Маленький мир огромной степи» цIанилусса нугъайннал миллатрал тарихрая ва культуралиясса кино.
«Помним и гордимся» номинациялуву хьхьичIунмунин хIисав дунни Николай Клинчаевлул «Январское утро» фильм. Му хас дурну дур 1996 шинал Къизлардай хьусса, шагьру боевиктурал бувгьусса чIумалсса иширттан.
Конкурсраву хьхьичIун ливчусса автортал лайкь хьунни дипломирттан ва арцуйнусса бахшиширттан.
«Радуга» конкурсраву ххув хьусса цинярдагу фильмру ккаккан дувантIиссар «Дагестан» ГТРК-лий ва «Дагестан» РГВК-лий.
Жуварив ва конкурсрачIан зана хьунну кказитрал хъиривми номердай, шиву гьуртту хьусса лакращал хьунабавкьуну.
