Декабрьданул 15-нний ДР-лул ХIукуматрал Председатель Аьбдуссамад ХIамидовлучIа хьусса совещаниялий ххалбигьлай бия автобусру ва ЖКХ-нсса техника ласаврил масъалагу.
Бадрижамал Аьлиева
Дурсса кьутIилийн бувну, Дагъусттан Республикалул му масъала щаллу баншиврул чара бакъа аьркинсса арцу дуркIун дур. Контрактрал аьмсса лагру хъанай дур 439 миллион ва 800 азарда къуруш. Миннува республикалулмур бюджетрава ялату нанисса шинал ва 2015 шинал харж буван тIий бур 289 миллион ва 800 азарда къуруш, лирчIми арцу – 150 миллион – Аьрасатнал Федерациялулмур бюджетравасса целевой субсидия хъанай бур.
Ца автобусрал багьа бусса бур 7 миллион ва 300 азарда къуруш, амма республикалул бюджетран му бацIан тIий бусса бур 4 миллион ва 800 азарда къурушран. Пландалуву бур Нефтекамский автомобильный заводрачIату («НЕФАЗ») 60 единица автобусирттал ласун.
Аьбдуссамад ХIамидовлул бигар бивхьунни МахIачкъала шагьрулул администрациялий шагьрулувусса автобусрал остановкарду низамрайн дуцин, общественный транспорт занансса маршрутиртталсса буван, даврил график сакин буван, зунсса техникалул персонал бавтIун, миннал дуккаврилсса буван.
ЦIуну бувкIсса автобусру ци предприятиялул балансрай бикIантIиссар тIисса суал гьаз бувну, МахIачкъала шагьрулул бакIчинал хъиривчу Абуссупиян ХIасановлул, цалгу транспортралми масъалартталсса буллалисса, кIицI лавгунни, цалва пикрилий, му иширан яла дюхъ думур, яла бакьлакьимур организацияну бушиву «Автоколонна 1736», миккува бушиву му организациялул ремонтралмур базагу. Му масъалалулсса буллайрив бусса бур Республикалул Транспортрал ва ххуллул хозяйствалул агентство. Най бусса бур ихтилатру цIусса автобусру ца-кIива предприятиялийх бачIаврил ялувгу. Амма, Абуссупиян ХIасановлул пикрилийн бувну, циняв автобусру ца кIанай, ца предприятиялул базалий бикIарча хъинну бусса бур.
Остановкарду хIадур даврия тIий, Абуссупиян ХIасановлул бувсунни шагьрулул бакIчи МахIаммад Сулаймановлул бигарданийн бувну, сакин бувну бушиву хасъсса комиссия. Мунил дуллалисса ялттубуккавурттал хIасиллайн бувну, шагьрулул остановкардал 90 процентраяргума ххишала приватизировать дурну, инсантурал каруннихь душиву исват хьуну бур. ЦIанасса ппурттуву ми судрал кьаралданий зана даврил ялув зий бусса бур.
А. ХIасановлул бувсунни маршрутру ва автобусру занансса схемарду сайки щаллуну душиву ва миннул график сакин бантIишиву автобусирттах цахва бурувгун.
Ва батIаврил хIасиллу дуллай, Абуссупиян ХIасановлул увкунни:
— Шагьрулун ласлай буссар 60 автобус «НЕФАЗ». Миву щябикIайми кIанттурду буссар 25, аьмну мивун лагайссар 100 инсан. Мивун чIявусса инсантал лагаврих къабурувгун, ми автобусирттал дур ца диялдакъашиву – миннул лахъишиву дур 12 метра. Мунийн бувну, шагьрулул хъуни кIичIирттавугума къабигьану бикIанссар миннул даву багьайсса куццуй щаллу дуван. Амма, ссахчIав къабурувгун, шагьрулуву булувкьуну хIадур хъанай бур автобусру кьамул буван. Общественный транспортращал архIал хьунтIиссар цIусса зузи кIанттурдугу. Жун чара бакъа аьркинну бур чама-чанну 100 водитель хIадур уван, сменардал графикгу хIисавравун лавсун.
