Декабрьданул 16-нний «Дагестан» РИА-лий хьунни ДР-лул связьрал ва телекоммуникациялул министрнал хъиривчу Юсуп МалламахIаммадовлул пресс-конференция. Ганал бувсмунийн бувну, дагъусттанлувтал электронный журалул цIухху-бусурдавух гьуртту шаврийну бюхъантIиссар республикалул агьалинал тIайласса пикри-зикри кIул хьун.
ХI. Аьдилов
«Электронный журалул суаллу хIадур бувну бивкIссар ДР-лул приоритетсса проектрал хахливу, га проект диркIссар хас дурну паччахIлугърал органнал давурттал аьчухшиврун. ЦIухху-бусурдайну бюхъантIиссар кIул бан исполнительный властьрал органнал ва кIанттул цилакаялувшиврул органнал иширттал хIакъиравусса граждантурал пикри-зикрирду. Агьалинаща бюхъантIиссар суаллайну кIул бан мюхчаншиву дуруччаврин хасну захIматнийн багьсса масъалартту ва ми щаллу баншиврул дуллалисса давуртту», — увкунни ганал. Ганал увкусса куццуй, цIухху-бусу баврил форма цачIун дурну дур Дагъусттаннал информациярттал каталограл менюравун, му цурдагу ккаккан дурну дур ДР-лул исполнительный властьрал органнал ва кIанттул цилакаялувшиврул органнал официалсса сайтирдал ялувмур бутIуй. Ганал, мукунма, бувсунни мунийну бюхъан тIий бушиву цIухху-бусу буллалийни чIявусса инсантал гьуртту бан му иширавун.
Юсуп МалламахIаммадовлул мукъурттийн бувну, цIана га сайтрай бивхьуну бур оьрмулул мюхчаншиву щаллу даврил хIакъиравусса суаллу. Ми суаллу бивхьуссар декабрьданул 3-нний, лахъигу лагантIиссар зурул 22-нин. ХIакьинунин миннухлу чIурду буллусса ур 800 инсан. Пландалий бур хIакьину уттигу цавай суаллу (опросник) бишин, му лахъилагантIиссар 2015 шинал мартрайннин.
Цуппа опросник буллалиссар «Общественный надзор» порталданий, ганий къашайссар цаннал буллусса чIурду гьарза буван, яни гьарнаща ца чIу бакъа булун къашайссар.
Министрнал хъиривчунал бувсмунийн бувну, шинал лажиндарай порталданийн дуркIун дур сайки 700 обращение, миннувату щаллу дурсса хьуну дур 20%.
Интерактивсса электронный опросник хIадур бувну бур социологиялун хасъсса цIухху-бусу бан ДР-лул связьрал ва коммуникациярттал ва ДР-лул печатьрал ва информациялул министерстварттал.
