Декабрьданул 8-нний цIунилгу даврийн къабувккунни маршруткардал шофертал. КIюрххия маркIачIан чIумалнин шагьрулувух занай бия частный таксирду, дяхтта 150-200 къуруш тIалав дуллай бия, цIан ларкьукун багьа сайки кIилий ххи бувна – 350-500 къуруш. Мукунсса тагьар хьувкун МахIачкъалаллал администрациялул бакIчи МахIаммад Сулайманов хьунаавкьунни шагьрулул маршруткардал шофертуращал.
ХIасан Аьдилов
БатIаврий гьуртту хьунни, мукунма, шагьрулул администрациялул бакIчинал 1-ма хъиривчу Абусупиян ХIасанов, хъиривчу Сергей Цветков, администрациялул Промышленностьрал ва транспортрал управлениялул хъунама Андрей ХIусайнов ва «Махачкалатранс» ва «Махачкалатранс-1» МУП-ирдал каялувчитал.
МахIаммад Сулаймановлул бавтIминнахь бувсунни маршруткардахсса багьри ххи баврил хIукму къавхьуну бивкIшиву. «ХIакьину жу буссияв Республикалул хъунама Рамазан АьбдуллатIиповлучIа му масъалалун хасну хьусса совещаниялий. Жун хъинну бувчIлай бур зул иш-тагьар, зу тIутIимур, зун ччимур, амма му масъала цакуну, най буна чулийн буккан бан къашайссар – аьркинссар агьали хIадур бан му иширайн, «ккуркки столлу», ихтилатру буллан, хаснува жяматращал, кIул бан тайнналмур пикригу. Жу тавакъю буллай буру зухь декабрьданул 25-ннин ссавур дан, та чIумал хьунтIиссар ахир хIукму, шинал ахирданийннин масъала щаллу банну», — увкунни М. Сулаймановлул.
Шагьрулул бакIчинал мукъурттийн бувну, жяматийсса транспортрал бутIувусса тагьар бигьасса дакъар, му захIматсса масъала щаллу баншиврул ссавур дуван аьркинни. «ХIакьинусса кьини МахIачкъалалив зий бур 2290 маршрутрал такси, чIалачIиссаксса, сайки бачIиксса шофертал давугу кьариртун лавгур бур, муния мюнпат чансса хъанай тIий. Шинал ахирданийннин зунтIиссар автобусругу, та чIумал жува ххал банну ссан бацIан най бурив маршруткардахсса багьа», — увкунни ганал.
Яла МахIаммад Сулаймановлул махъ буллунни ихтилат бан маршруткардал шофертурахьхьун. «13 а» маршрутрал шофер Рузман МахIаммадовлул мукъурттийн бувну, шофертуран мюнпат лап чансса хъанай бур ва даврий, зун багьлай бур гьантлий 15-16 ссятрай чан-кьанссарагу (прожиточный минимум) арцу лякъин. «На нава зий ура маршруткалий 1993 шиная шинай. Уттигъанну на лавгра Ухссавнил Ккавкказуллал шагьрурдай тагьар цукунсса дурив ххал дан. ДакI дарцIуну учин бюхълай бур МахIачкъалалив яла чанмур тариф дур куну. Мукунсса хIалкьазиялуцIун жу бакьлай бакъару», — увкунни ганал.
«69а» маршрутрал шофер Камил Багьауттиновлул увкусса куццуй, ганал маршрутрал лахъишиву дур 23 километра, му манзилданий 14 къурушрах инсантал буцлан мюнпат къахъанай бур, кувний цува шофернаятугума харж шай. ЧIявуну машина гъагъай, мугу шофернал жиплива буклакисса харжри. Аьркинни яла гъансса чIумуву тагьар тIайла дацIан дан. Жуща бюхъанссар уттигу 20 гьантлийсса ссавур дан, жунма заралну бунугу», — увкунни Камиллул.
На ихтилат бав Ккулатусса Аскандар тIисса (61-мур маршрут) шофернащал. Лаккучунал хъа бунни, шардай 10 азарда къуруш дакъа къашай, куну. Цанчирча, ганал увкусса куццуй, ляркъумур лаглай дур вай ГСМ-рах, вай газрах, вай запчастирдах, вай налогрур тIий. «Жул оьрчIру маршрутрая лихълай лаглай бур Москавлив, Северданийн, цаймигу кIанттурдайн. Тиха буслай бур шикку жу ххуйну ляхълайгу буру, бакI цIуцIи буллайгу бакъари», — тIий увкунни Аскандардул.
Тиккун увкIунни ца Оьмарасхаб тIисса пенсионер. Ганал ихтилат бунни агьалинал чулухату. «На ласара 12 азарда къуруш пенсиялул, зий чувчIав акъара. Мунияту ЖКХ-лул хIаллихшиннахгу дуллуну, ххуллухгу дуллуну личIлай дур 7-8 азарда къуруш. Миннух на цукун яхьун аьркинссара? Жунгурхха гьармур ххира хьусса. Жунгурхха дукангу, хIачIангу, лаххангу аьркинсса. Пенсионертураяр ххишала духтуртал бур, учительтал бур 8-12 азарда къурушрах дуланмагъ дуллай, гайнналгурхха оьрчI-бакIгу бусса, гайгурхха ругьала дуллай бусса. Зунгу аьркинссар ругьала дуван, масала ссайн буккайрив кIул хьуннин», — увкунни Оьмарасхаблул.
Хьунабакьаврил ахирданий МахIаммад Сулаймановлул шофертурахь уттигу цал тавакъю бунни, ссавургу дурну, хъиривмур кьинигу, ливчIми гьантрайгу буккан циняв даврийн. «Декабрьданул 25-нний зул циняв масъалартту щаллу банну», — увкунни ганал.
Собраниялия махъгу шофертал тамансса хIаллай бия гъалгъа тIий, амма миннал пикри цалийн къабувкIунни. Хъиривмур кьинигу чIявуми маршруткарду зий бакъая. Къазузиминнал зузимигу битлай бакъая зун, бацIан буллай, нигьачIакIул буллай.
P.S. Ва масъала ттигу щаллу къавхьунни, чичара редакциялийн зулвами пикри-зикрирду.
