Дагъусттан Республикалул лайкь хьусса культуралул зузала Шерпув Заирбагова каялувшиву дуллалисса Дагъусттаннал балайлул ПаччахIлугърал театрданул коллектив хьунабавкьунни ЦIуссалакрал райондалул культуралул зузалтращал, искусствалул школалий дуклакиминнащал ва райондалул агьалинащал. Му тяхъасса, шадсса мажлис хьунни райондалул Культуралул центрданий.
ЛичIи-личIисса миллатир­ттал дянивсса дусшиву цIакь дуллалисса, культуралул агьали мяйжаннугу гъан бувайшиву исват буллалисса мероприятиялул дайдихьу дуллалисса махъ лахълай, райондалул Культуралул управлениялул хъунмур ПатIимат Кьурбановал барчаллагь увкунни Культуралул министерствалухь ва Республикалул Халкьуннал творчествалул къатлул коллективрахь, райондалий хъанахъисса культуралул мероприятиярдах мудангу дагьайкунсса къулагъас дувайну тIий.
Хъамаллурал концертрал программа авадансса дия. Тамашачитурал личIинува ххарину кьамул увна машгьурсса балайчи Ризван Оьмариев. Концертрай гьуртту хьунни Апанни КьурбанмахIаммадовлул цIанийсса ЦIуссалакрал магьирлугърал школалул «Эдельвейс» тIисса къавтIаврил ансамбльгу.
Хъамал бивунни райондалий дукIу тIивтIусса Аьрасатнал Халкьуннал аьдатрайсса культуралул центрданийнгу. Миккугу, кIава ялув кIицI лавгсса, Апанни КьурбанмахIаммадовлул цIанийсса магьирлугърал школалул оьрчIал дурсса суратирттал выставкагу дия. Му выставка Культуралул къатлул фойелуву дия. Хъамаллуран ккаккан бунни музейравусса экспонатру, музыкалул инструментру бавтIсса уникальныйсса коллекция, миллатрал лаххия, ичIаллил матахI, кьай-кьуй.
«ПаччахIлугърал театр хъин-хъинсса вокалданул композициярдащал бувкIунни райондалийн, миннал оьрус, лакку ва чачан мазурдийсса балайрду увкунни. ЯлунчIил дяъвилий Ххувшаву ларсун 70 шингу лахъа-хъунну дуллан уттива хIадур хъанай бухьувкун, аьра­ли тематикалул балайрдугу бия, — тIий бур ПатIимат Кьурбанова. – Культура мудангу миллатирттал дусшиву цIакь дай ярагъри. Хореографиялул «Эдельвейс» ансамбльданул чIава къавтIалтралгу лакрал ва чачаннал къавтIавуртту дунни. НахIуну, бавкьуну зий буру культуралувугу, мукун зузиний хIасиллугу ххуйсса дур».
П. Рамазанова
А. Аьбдуллаева