АЬБДУЛЛУЛ ДУШ АЬБДУЛЛАЕВА ЖАМИЛАТ
Вай гьантрай дунияллия лавгунни СумбатIуллал шяравасса ххаллилсса хъамитайпа, захIматрал ветеран, Халкьуннал просвещениялул отличник, Аьбдуллул душ Аьбдуллаева Жамилат. Му хъинну кIулссар щаллагу Ккуллал райондалул жяматран, зий бивкIссар райондалул давурттай личIи-личIисса къуллугъирттай.
Бувссар Жамилат 1932 шинал СумбатIуллал шяраву, му ниттил бувну шанма барз шайхту, мунил ппу дунияллия лавгун ур, ниттингу цинмалу 4 оьрчI ччаннай бацIан буллан багьну бур.
Щурагь педучилищагу къуртал бувну, Жамилат буттал шяраваллил школалий зун бивкIссар. Цаппара шиннардива къуртал бувссар Дагъусттаннал педагогикалул институтгу.
Цилла даву хъинну кIулсса, инсантуращал зун кIулсса, бюхъу-бажар бусса Жамилат зий бивкIссар СумбатIуллал шяраваллил советрал председательнугу, Ккуллал райОНОрал инспекторнугу, райондалул агитациялул ва пропагандалул отделданул хъунаманал хъиривмурну. Цаппара шиннардий зий бивкIссар Ккуллал райком партиялул секретарьнугу. Муния махъ чIярусса шиннардий зий бивкIун бур «Каспий» тIисса мебельданул фирмалий, отдел кадралул хъунмурну.
ЧIярусса шиннардий дакI марцIну бувсса захIматрахлу Жамилатлун дуллуну дур ДАССР-данул Верховный Советрал грамота, РСФСР-данул ВацIлулсса ва тIаннулсса буллалисса промышленностьрал министерствалул чулухасса хIурматрал грамота ва тамансса медальлу ва цаймигу бахшишру. Дуллуну дур халкьуннал просвещениялул отличник тIисса бусравсса цIагу.
Аьбдуллаева Жамилат партиялул саллатIтурал кьюкьлувассар: партиялул чув зун тIалав буврив, миккун анавар буккайсса ва жяматрал къайгъурдаха зузаву цийвасса буржну чIалачIисса.
Жамилат дунияллия лагаврил кьурчIишиву кIидачIлай, жижара буллай буру мунил арснахь, мунал наслулухь, ссийхь, гъан-маччанахь, агьлу-авладрахь.
Жамилатлул рухI бигьаний дишиннав. Алжаннул ххари баннав.
СумбатIуллал жямат
——————————-
ИБАЙДУЛЛАГЬЛУЛ ДУШ ДАВДИЕВА НИГАР
Декабрь зурул 25-нний Давдиева Нигар (Мадина), захIматсса азарунния хъин бан къавхьуну, жуятува личIи хьуну хъанай бур 40 гьантта.
Нигар бувну бур 1967 шинал Султанов Ибайдуллагьлул ва Султанова Ххадижатлул кулпатраву Щардал шяраву. Щардал шяраваллил дянивмур даражалул школагу къуртал бувну, бувкIун Нигар МахIачкъалалив, зий бивкIун бур личIи-личIисса давурттай. Яла бувххун бур Каспийскалийсса кирпичру бай заводрайн. Муния махъ зий буссия ттучандалий, кафелуву. Махъсса шиннардий зий буссия ЦIуссалаккуйсса теплицардаву.
Нигардул, чув, ци дуллай бунугу, даву дайва дакIнийхтуну, дан аьркинсса куццуй, цила кIанийн дуртун. Зузисса кIанава барчаллагьру, бахшишру дикIайва. Нигар бия дакI-аьмал хъинсса, инсаншиврул бутIа хъунмасса бусса, хъунанал хIурмат, чIивинах аякьа дусса, зунттал аьдатругу, данмургу, дитанмургу кIулсса, ххаллилсса хъамитайпа. ЗахIматсса азаруннил къабивтунни, кIия щаллу къабувсса оьрчI ва душгу кьабивтун, жуятува аьпалул хьуну лавгунни.
Жагьилнува аьпалувун лавгсса ванил бивкIулул кьурчIишиву кIидачIлай, жижара буллай буру ласнахь, оьрчIахь, душнихь, ванил уссихь, ссурваврахь, цинявппагу гъан-маччанахь, ванил ляхъиндалухь. Цил гьав нурданул дуцIиннав, алжаннул ххари баннав. Ванин къабуллусса оьрму махъминнан булуннав, барачат бишиннав. Амин.
Ккуллал ва Щардал жямат
————————————-
ИСМЯИЛЛУЛ ДУШ МАХIАММАДОВА АЬЙШАТ
Уттигъанну лавгунни дунияллия Карашрал шяравасса Исмяиллул ва Уммукусумлул душ МахIаммадова Аьйшат, захIматрал ветеран, ххаллилсса хъамитайпа, яхIлувсса нину.
Бувссар Аьйшат 1928 шинал Карашав. Билаллун щар хьуну махъ лавгссар Карашрал къутандалийн. Фермалий каялувшиву дуллалисса лас Билаллущал хъар дургьуну зий бивкIссар. Хъуни бувссар арулва душ ва ца арс. МахIачкъалалив бивзун махъгу зий бивкIссар личIи-личIисса давурттай. Мунил оьрму лавгссар захIмат буллай, ци даврий зурчагу лажин кIялану даву дуллай. Му бия дакI-аьмал хъинсса, жяматращал хIал бавкьусса хъамитайпа.
Аьйшатлул бивкIулул кьурчIишиву кIидачIлай, жижара буллай буру арснахь, душваврахь, миннал наслулухь, гъан-маччацириннахь.
Аьйшатлул бунагьирттал аьпа баннав, гьав нурданул дуцIиннав, рухI алжаннул ххари даннав. Мунил барачат махънан кьабивтун лякъиннав.
Карашрал жямат
—————————————
АЬЛИЛ АРС ХIАСАНХIАЖИЕВ ХIИЗБУЛЛАГЬ
Цаяра чIивима уссу ХIусайн аьпалул хьуну, мунал леххаврий Лаккуя МахIачкъалалив увкIун уна, уссугу паракьат увну, хIатталлия най буна, хархавар бакъа, оьрмулул 81 шинаву, ХIизбуллагьгу машиналувува къуртал хьунни.
ХIизбуллагь увну ур 1933 шинал ГьунчIукьатIрал шяраву Аьлил ва Сабиратлул кулпатраву. Аьлил ва Сабиратлул 9 оьрчI бия: 6 арс, 3 душ. 1942 шинал даэлий къашавай хьуну Аьлигу ивкIуну, Сабиратлул хъунмасса захIмат бивхьуну хъуни бувну бур оьрчIру. Цалва уссурвал куна, ХIизбуллагьгу чIивиния захIмат ххирану, зий аьдат хьуну ия. 1953 шинал Гъумучиял дянивмур даражалул школагу къуртал бувну, увххун ур Губкиннул цIанийсса Москавуллал газонефтяной институтравун. Мугу ххуйну къуртал бувну, зун ивкIун ур цалла касмулий. ХIизбуллагь цалла даву ларайну кIулсса пишакар ушиву чIалай, му тIайла увккун ур чил хIукуматрайн зун. Тикку ванал ккаккан бувну бур Совет хIукуматрал специалистал щияркIуй лувсса бакъашиву. Тиха зана хьуну махъ ХIизбуллагьлул Дагъусттаннай зий диялсса шинну дунни. Ванал даврин кьимат бишлай, ва лайкь хьунни мадарасса ХIурматрал грамотарттан. Ва хъанай ур «Заслуженный нефтяник», лайкь хьуну ур цаппара медаллан. Мяйжаннугу, ХIизбуллагь захIмат ххирасса, цалла касму ларайну кIулсса пишакар ия. Ванал цалва оьрмулул дус Нажаватлущал 3 оьрчI (арс ва 2 душ) хъунигу бувну, ччиманал эбрат ласунну чивун буккан бунни.
Цибанссар, Аллагьутааьланал ХIизбуллагьлунсса кьисмат мукунсса бухьунссия. ХIизбуллагьлул бивкIулул кьурчIишиву кIидачIлай, жижара буллай буру ванал кулпатрахь, арснахь ХIасаннухь, душваврахь, уссурваврахь Илияслухь ва Русланнухь, цинявппагу гъан-маччаминнахь. Цал бунагьирттал аьпа баннав, рухI алжаннул ххари даннав. Ванан бакъамур ванал оьрчIан, оьрчIал оьрчIан булуннав.
ГьунчIукьатIрал жямат
—————————————
АЬЛИЛ АРС ХIАСАНХIАЖИЕВ ХIУСАЙН
Декабрь зурул 11-нний, оьрмулул 72 шинаву, мадара хIаллай къашавайгу хьуну, дунияллия лавгунни ххаллилсса, захIмат ххирасса зунтталчу ХIасанхIажиев ХIусайн.
ХIусайн увну ур 1942 шинал ГьунчIукьатIрал шяраву Аьлил ва Сабиратлул кулпатраву. Ванан цала буттал лажин ккарккун дакъар. Даэлий къашавай хьуну, ванал ппу 1942 шинал ивкIуну ур. ХIусайннул цала шяраву 10 классгу бувккуну, хъирив Орджоникидзелий шяраваллил хозяйствалул институт къуртал бувну, инженер-механикнал диплом лавсун бур. Ва ия цалла даву ларайну кIулсса, карчI дакъасса зузала, пишакар, ванал канила дукъаккайсса даву дакъая.
ХIусайннул кулпат бур Шуниятусса, хъинну ас-ламус бусса зунттал хъамитайпа. Вайннал дянив 2 душ бур. Мигу, ларайсса кIулшивурттугу ларсун, университетраву дарсру дихьлай бур.
Ва лавмартсса цIуцIаврил оьрмулуцIа уван хIайпсса адамина ия ХIусайн. Цума-цаннангу Аллагьнал увния шинмай цанмасса кьадар чивчуну бикIайссар. Мунийн данди ацIан щищачIавгу къашай.
ХIусайннул бивкIулул кьурчIишиву кIидачIлай, жижара буллай буру ванал кулпатрахь, душваврахь, уссурваврахь, ссурваврахь, цинявппагу гъан-маччанахь. Цал рухI хъинний дишиннав, ванан бакъамур душваран, махънан булуннав.
ГьунчIукьатIрал
ва Шуниннал жямат
