Уттигъанну телевизорданувух Андрей Малаховлул гьарца ххуллун кьини ккаккан дувайсса «Сегодня вечером» передачалуву СССР-далул хIурматрал цIанин лайкь хьусса тренер Татьяна Тарасоващалсса хьунабакьаву дия.
На ва хъамитайпалул чумартшиврул, ххаллилшиврул, инсаншиврул хIайран увунав.Ва цичIавату арх акъа щяивкIсса артист Марат Башаров, мунал цалва кулпат бавтсса баяврийн бувну, чунчу увкуну, ккавккунвагу къаччишиврул, цинна дуллусса тIутIивгу ларсун, столдануха бивзун бавчуна. «На вищал ца столданух щявагу къабикIанна», — тIий. Ттун ххай бия реклама шайхту, Марат Башаров ивзун гьан багьлагьисса кунма. Амма Татьяна Тарасовал дуссухалу ганал зия бувуна, явагу ляпI учин къабуллай, ахирданийннин унийва щяивкIун. Аькьлу-кIулши бусласаву уттисса чIумал щинчIаввагу ччан къабикIай.
На цимилгу тикрал бувссар, ци институт, академия инсаннал къуртал буварчагу, гай кIулшивуртту оьрмулуву чIяруссаннаща ишла дуван къархьунна личIайшиву. Амма инсан яхъанахъисса кIанттурдал, лагмасса жяматрал, ккурчIав лавхьхьумунил хъунмасса бияла инсаннал хасият хIасул шаврийн биян бувайшиву оьрмулул кьинирдал тасттикь бувай. Шиккува на ххи бувавияв, яхъанахъисса кIанттурдайсса тIабиаьтралгу хIасул дувайшиву инсаннал хасиятраву, багьу-бизулуву чIярусса хасиятирттал тIимурду. Ми хасиятру ххуй-оьккисса душавурив, му щийнчIав хъар шайсса ишну къабикIайча, дакIних вичIилий, ганил тIимур буллалимурну бикIай.
Жулва зунттаву яхъанахъисса инсантурал хасиятирттаву багьлул ххирасса, якьутирттаха лархьхьусса, хъинну ххуйсса хасиятру хIасул хьуну дур. Яла ххуймурну, чумартшиву ялун личин дувайсса хасиятнурив дикIай оькьини дурксса инсаннал чIарав бавцIуну, ганан кумаг буваву. Явара къабагьлухча, укунма, дакIнил хъиншиврийну.
Уттигъанну, декабрь зурул 5-нний, на Ккуллал райондалия ттучIанма Вихьуллал шяравун хъамалу бувкIсса куяв Ризваннущал ва ванал ппу Идрислущал шагьрулийн най уссияв вайннал чIиви машиналий. КIюрххил ссят 9 хьусса чIумал, Хъювхъиял шярава ливчуну, Къяннал чулинмай кIура баллалисса ххуллул шанбачIулийн бияйхту, жул машиналул махъми ккалусру бувгьусса балка гъаргъуна.
На га цIана ттула дусшиву дусса Хъювхъиял шяраваллил бакIчи ХIасниев НурмахIаммадлучIан лавгссияв жулва хIалкьазия бусан. НурмахIаммад ттун ккурчIав бакIрайн агьуна. Ванал гацIана, машинарттал хIал кIулсса инсанталгу бувцуну, гъавгъсса кIанттая шяравалличIанмай машина кIункIу бувну, дайдирхьуна аьркинсса давурттив. Цала шяравасса Сергей тIисса жагьилначIату, духсса бухьурчагу, дишин бучIисса балка ларсун, га дихьлай байбивхьуна. Машина бакьин буллалисса давурттив лахъи ларгуна ахттая махъ ссят 3 хьуннин. Ряхра ссят дурна Хъювхъиял жагьилтурал жул машиналулун бувххун, га бакьин буллай. На НурмахIаммадлухь уссияв: «Вай машина бакьин буллалисса инсантурал цIарду буси ттухь», — тIий. Амма: «Жу цIарду кIицI дуваншиврул бакъару зун кумаг буллалисса. Зун кIанай ччима инсан хьун бюхъайссия. Зунттал инсаннал къирият тачIаврагу щяв дутан къабучIиссар», — куна. Кумаг буллалисса инсантал ацIунная ливчусса бия. Машиналул гъаргъмур балка дуккаву ва цамур дишаврил давурттив цалла Сергейл дурна.
Хъунмасса барчаллагь зун, Хъювхъиял жагьилтал, бунияласса, чумартсса чIаххул буну тIий!
