Ноябрь зурул 10-нний МахIачкъалаллал администрациялул къатраву хьунни Аьрасатнал Виваллил органнал зузалтрал байрандалун хас бувсса шадлугърал мажлис.
Пишалул байрандалущал виваллил иширттал органнал зузалт ва ветерантал барча бунни МахIачкъалаллал
администрациялул хъунаманал кIанайсса МахIаммад Сулаймановлул, МахIачкъала шагьрулул округрал депутатътурал мажлисрал председатель Аьбдулмуъмин Ибрагьимовлул, МахIачкъалаллал УВД-лул хъунама, полициялул полковник НурмахIаммад Муртузааьлиевлул, отставкалийсса КГБ-лул генерал-майор, ДР-лул ветерантурал организациярдал Координационный Советрал председатель Оьмар Муртузааьлиевлул, МахIачкъала шагьрулул прокурор МахIаммад МахIаммадовлул, шагьрулул бакIчинал хъиривчутурал ва жяматрал вакилтурал.
Шадлугърал мажлис тIитIлай, ихтилат бунни МахIаммад Сулаймановлул. Цалва ихтилатраву ванал кIицI лавгунни, Виваллил иширттал органнал зузалал кьини – му жулва билаятрай хьхьичIра-хьхьичI кIицI лаглан бивкIсса пишалул байраннавасса ца душиву. Циксса шинну гьарчагу, власть, политикалул строй, паччахIлугърал управлениялул органнал структура, миннувух виваллил иширттал органналссагу даххана хьурчагу, ва байран мудангу лахъа-хъунну кIицI лагайшиву.
— Ва, цалла жандалий хIайп къаувкуну, жулла мюхчаншиву дуручлай, тахсиркаршивурттайн къарши бавцIусса виваллил органнал зузалтрансса хIурматри.
ХIакьину полициялул зузалтран захIматсса шартIирдай зун багьлай бур, хаснува экстремизмалул, терроризмалул, къачагъшивурттал, сакиншиннарайсса тахсиркаршивурттал мугьалттухьхьун биривсса Дагъусттаннай. Жулла регион щарчусса тагьарданийн бувну щалвагу Аьрасатнал ва дунияллул итталу дур. Сайки гьарца кьини баллай бур экстремизмалуцIун дархIусса тахсиркаршивурттаясса ягу ихтиярду дуруччай органнал зузалт ва миннал гъан-маччами оьрмулуцIа бувсса кьурчIисса хаварду.
Тахсиркаршивурттащалсса талатаву – му аьмсса давур. Ца органнал зузалтрал хIарачатрайну ми духлаган дан къашайссар.
Шагьрулул каялувчитал къулагъас дуллай буссар полициялул зузалт хьунабакьлакьисса масъаларттахгу.
Так ттизаманнул техникалул дузалсса, агьалинал вихшала дихьлахьисса органнащар цалва бигарду багьайкун щаллу бан бюхъайсса. ХIакьину байрандалул кьини цинявппагу МахIачкъала шагьрулул агьалинал цIания на дакIнийхтуну барчаллагь тIий ура жулва шагьрулий низам ва паракьатшиву дуручлачисса виваллил иширттал органнал зузалтрахь, — увкунни МахIаммад Сулаймановлул.
Хъирив виваллил иширттал органнал зузалт ва ветерантал барча буллалисса ихтилат бунни Оьмар Муртузааьлиевлул.
— Гьар мудангу зу буручлай буссару паччахIлугърал ва агьалинал мурадру. Дагъусттаннал виваллил иширттал органнаву мудангу кьянкьасса, жаваблувсса, мюхтажнан кумаг бан хIадурсса ххаллилсса чиваркI зий буссар, — увкунни ванал.
МахIачкъалаллал виваллил иширттал органнал зузалт барча буллалисса ва миннахь дакI марцIну къуллугъ буллай тIий барчаллагь тIисса ихтилатру бунни Аьбдулмуъмин Ибрагьимовлул, МахIаммад МахIаммадовлул, НурмахIаммад Муртузааьлиевлул.
Ихтилатру къуртал хьуну махъ, къуллугърал буржру дакI марцIну биттур буллалисса виваллил органнал зузалтран шагьрулул администрациялул чулуха дуллунни ХIурматрал грамотартту, арцуйнусса бахшишру, мукунна шагьрулул бакIчинал цIаниясса ссятру. Хъирив ккаккан дунни шагьрулул администрациялул Культуралул управлениялул хIадур дурсса концерт. Микку гьуртту хьунни МахIачкъалаливсса искусствалул школардал оьрчIру.
Концерт ларкьунни ДР-лул Халкьуннал артист МухIсин Камаловлул «ХIаписартал» тIисса балай увкуну.
ХIадур бувссар
А. АьдуллаеваЛ
