Совет Союзрал Виричу Якьув МахIаммад-Аьлиевич Сулайманов дунияллия лавгунни ноябрьданул 7-нний оьрмулул 93 шинаву. Якьув МахIаммад-Аьлиевич увччунни аьраличалтрал хIатталлив. Уччайни хIатталлив бувкIунни ДР-лул вице-премьер Анатолий Карибов, ДР-лул Ветерантурал союзрал председатель МахIаммад Каримов, министерстварттал ва ведомстварттал вакилтал. Виричунащал хIалалшин ласун бувкIунни чIявусса цIа дурксса ватанлувтал дустал, мачча-гъансса.
ХIасан Аьдиловлул
Дагъусттаннал БакIчиналгу, Халкьуннал Мажлисралгу, ХIукуматралгу цIанияту Анатолий Карибовлул жижара бунни Совет Союзрал Виричунал гъан-маччассаннахь ва дустурахь. «Дагъусттанналгу, щалва Аьрасатналгу бусравсса арс Якьув Сулаймановлул бувтссар хъунмасса ва яргсса оьрму. Ганал щалва оьрму Ватандалуха цукун къуллугъ буллан аьркин­ссарив ккаккан буллалисса жунма цинявннансса эбратри. Хъунма­сса Буттал КIанттул цIанийсса дяъвилул цалчинсса гьантрайва лавгссар дуручлан жулла Ватан. Ганайн шамийлла щаву дир­ссар, кIийлла контузия хьуссар. Гьуртту хьуссар Баргълагавал ва Белоруссиянал фронтирдай.
1945 шинал Норденбург тIисса шагьрулия арх бакъа Сулаймановлул цалла кьюкьлущал архIал ххит дуккан дур­ссар душманнал колонна, ти­кку бивкIссар 6 автомашина, 2 танк ва чIявусса немецнал са­ллатIтал ва хIаписартал, ми циняв бухлаган бувссар. Му гьунарданухлу СССР-данул Верховный Советрал Президиумрал ХIукмулийну жула ватанлувнан дуллуссар Совет Союзрал Виричунал цIа ва Лениннул орденгу, «Золотая Звезда» медальгу. Та чIумал мукунсса цIанин лайкь шайсса лап чансса бивкIссар», — увкунни вице-премьернал.
Республикалул жяматрал чулуха ихтилат бунни ДР-лул Хъунилсриннал советрал председательнал хъиривчу Сиражуттин Илиясовлул. Ганал бувсъсса ку­ццуй, Якьув Сулайманов ивкIссар хъинну ххаллилсса инсан. «Га ия щалва цалва оьрмулий Ватандалуха къуллугъ баврил эбратну хъанахъисса, СССР-данул Виричу, хъинну чувшиву дусса инсан, Берлиннайн ивсса Совет Аьралуннал рядовой боец. Га зий ивкIссар билаятрал хозяйствалул яла захIматшивуртту диркIсса кIанттурдай. Якьув Сулайманов – ялун нанисса жагьилтурансса эбратри. Ттун талихI хьуссар сайки 30 шинай га инсаннащал кIулгу хьуну, дусшивугу дахIин. Га ия ххаллил акъасса, буниялагу ххаллил­сса инсан, гьарца ишираву циняв дагъусттанлувтал ганачIан кIункIу шайва», — увкунни Илиясовлул.
Генерал-лейтенант МахIам­мад ТинамахIаммадовлул ихтилатраву кIицI бунни Якьув Сулайманов хъинну за кIулсса, дуллалисса даву бакIуйн дуккан дайсса ивкIшиву цува ссаха зий ухьурчагу, цалла бюхттулсса цIанихгу къаурувгун. «СССР-данул Виричу Якьув Сулайманов призывниктуращалгу хьунаакьайссия, буттахъал цалва арсурваврахь кунма бусайва Ватан ххирану дикIан аьркиншиву ва га цукун дуручлан аьркинссарив», — увкунни генералнал.
СССР-данул Виричу дакI­нийн утлатисса ихтилат бунни мукунма М. ХIажиевлул цIанийсса заводрал директор Аьбдулвагьаб Папалашовлул. «Якьув Сулайманов заводрай зун увкIуна Виричу хIисаврай акъача, га увкIуна укунасса слесарь хIисаврай. Зий ия цал Украиннал Донецкаллал областьрай Красноармейск шагьрулий. Пенсиялийн увккун махъ зана хьуна Дагъусттаннайн, зий ия МахIачкъалаллал машиностроительный заводрай слесарьну, ганая эбрат ласайва ливчIми зузалтрал. Якьув Сулайманов дакIнийн утаву хьунтIиссар ливчIминнан адав-мяърипатрал ва чувшиврул дарсну, мунил агьамшиву хъуннассар, хаснува жулла чIумал», — увкунни ихтилатчинал.
Дягъулул митинграй СССР-данул Виричунал савлугъиннаран дурунни аьралуннал салют, минутIрайсса пахъ багьаву, яла гьаттай дирхьунни тIутIал шалкри ва чIярусса тIутIив.
Совет Союзрал Виричу Якьув Сулайманов мудана яхьун­тIиссар Дагъусттаннал агьалинал дакIурдиву.