Октябрь зуруй Оьруснал театрдануву хьунни Дагъусттан Республикалул паччахIлугърал хорданул концерт. Июнь зуруй бивтсса цIусса художествалул каялувчи Наталья Макеевал каялувшиннаралу хорданул хIадур дурну дия личIи-личIисса стиллал, жанрардал ва заманардал музыкалия щаллу дурсса цIусса программа.

Зулайхат Тахакьаева
Дагъусттаннал паччахI­лугърал хорданул цалчин увкунни С. Рахманиновлул «Три русские песни» циклданувасса «Белицы румяницы», мукунма цалчин увкунни ламса мазрай Н. Брамслул балай.
Амма тамашачитурайн яла асар биян бунни Бесланнай хьусса оьзрулун хас бувсса Миясат Муслимовал «Ангелы во крови» луттиравасса назмурдан чивчусса Ширвани Чаллаевлул «Песни об убиенных детях» кантаталувасса 3 бутIа – «Оно», «Почему» ва «Ангелы во крови». Ширвани Чаллаевлул музыка тIутIийни Бесланнал халкьуннал бурхIайх лавгсса лухIи бала цIунилва-цIунилгу асар хъанай, вичIидирхьуминнавун зурзу-кувку багьарчагу, концерт къуртал дуруна Аида ЖахIпаровал хъярчийсса композициялийну.
Муния мукьах октябрь зу­рул 16-17-нний хор ларгссар Кабардин-Балкьарнал хъуншагьру Нальчикрайн гастроллай.
Лаглагисса шин «Культуралул шинну» баян бувну бухьувкун, жулла хорданул гастроллугу хьуссар щалвагу Аьрасатнаву зузисса «Культура России» проектрал лагрулуву.
Хорданул коллектив тиха зана хьуну махъ на хьунабавкьура мунил директор Заира Маннароващал. Ванил бусласимунийн бувну, Нальчикрай хорданул ккаккан дурну дур 2 программа: цалчинмур — ПаччахIлугърал концертный залдануву; кIилчинмур – Ухссавнил Ккавкказнал паччахIлугърал магьирлугърал институтрал хъунмур залдануву. Хорданул коллективрал ляличIишиву дур мунил солистал 16 мазрай балайрду тIий бушиву. Мунищалла хорданул репертуар авадан дуллай дур оьруснал ва кьатIаллил билаятирттал классикалулгу. Амма хъунмур кIану муниву бугьлай бур Дагъусттаннал композитортурал, – Къажлаевлул, Чаллаевлул, Дагировлул, Агабабовлул музыкалул ва миннал бакьин бувсса халкьуннал балайрдал.
Гастроллайсса хорданул концертирттал программа щаллу хьуну дия А. Лоттил, М. Инженьерил, В. Моцартлул, И. Брамслул, М. Мусоргскийл, С. Танеевлул, С. Рахманиновлул ва Дагъусттаннал композитортурал произведениярттая: Ш. Чаллаевлул «Песни об убиенных детях»; М. Къажлаевлул «Гуниб»; С. Агабабовлул «День труда»; Н. Дагировлул «Горский танец»; Аь. Аьликъараевлул бакьин бувсса даргиял халкьуннал балай; А. ЖахIпаровал бакьин бувсса къумукьнал халкьуннал хъярчийсса балай; Долуханяннул бакьин бувсса армяннал халкьуннал балай. Лакку мазрай увкуну бур 1999 шинал ЦIуссалаккуйн боевиктал ххявхсса иширттан хас бувну, тани хорданий каялувшиву дуллай ивкIсса аьпа биву Рамазан ХIажиевлул чивчусса «Аьрщарал къюву» тIисса произведение.
ДР-лул халкьуннал артист МухIсин Камаловлул ва Ка­бар­дин-Балкьарнал музыкалул театрданул солистка, дунияллул халкьуннал конкурсирдал лауреат Лана Куловал увкуну бур «Алеко» опералувасса ариярду. Концертру къуртал дурну дур Анвар Аджиевлул мукъурттий­сса Сергей Агабабовлул «Цвети мой родной край» произведениялийну.
Концертмейстр – Л. Аьбдуллаева. Дирижер Н. Макеева. Концерт дачин дурну бивкIун бур хорданул артистка Р. Наж­муттинова.
Концертрайн бувкIсса Кабардин-Балкьарнал композитортурал, профессортурал, музыкантътурал, Кабардин-Балкьарнал паччахIлугърал премиялул лауреат, Ухссавнил Ккавкказнал паччахIлугърал магьирлугърал институтрал балай учаврил магьирлугърал кафедралул хъунмур, профессор Н. Гасташевал ххуйчулий кIицI ларгун дур Дагъусттаннал хорданул репертуаргу, артистурал балай учаврил магьиршивугу.
Концерт къуртал хьуну махъ Ухссавнил Ккавкказнал паччахIлугърал магьирлугърал институтрал проректор, профессор Беслан Ашхотовлул барчаллагь увкуну бур хорданул коллективрахь цачIанма гастроллай бучIаврихлу, ДР-лул каялувчитурахь ва культуралул министрнахь хорданул коллектив ягу бувну, цайми респуб­ликарттайн ва шагьрурдайн гастроллайн занансса каширду ляхълай бушиврухлу.
Дагъусттаннал хорданул каялувчитал барчаллагьрай бур Кабардин-Балкьарнал магьирлугърал лайкь хьусса деятель, Ухссавнил Ккавкказнал паччахIлугърал магьирлугърал институтрал театрал факультетрал декан, Кабардин-Балкьарнал академический хорданул каялувчи ва дирижер Мадина Мидовайн, концертру сакин дан бувсса кумаграхлу.
Дагъусттаннал паччахI­лугърал хоргу ккаллиссар пахру бан лайкьсса Дагъусттаннал хъуслин, цанчирча хорданул балай учавугу хъанай буну тIий Дагъусттаннал миллатрал культуралул якъабуцайсса бутIану.