Республикалул МФЦ-лул пресс-службалул баян бунни, студентътурал-волонтертурал Новостройрал агьалинан МФЦ-рдайхчIин паччахIлугърал ва муниципал услугартту дузал баврия бувчIин буллалисса ка-кумаг буллантIишиву.
Дагъусттаннал МФЦ-лул Аьрасатнал Минюстрал РПА-лул (Аьрасатнал правовая академия) Ухссавнил Ккавкказуллал филиалданущал уртакьну зунсса кьутIи чирчуну дур. Му кьутIилул лагрулий хIасул бувну бур студентътурал-волонтертурал группа, кIани-кIанттурдайн бивну, агьалинан МФЦ-лул къулайшиннарая, мунил даврия балжину бувчIин буллали­сса. Мукунсса группа буклантIиссар Новостройрайсса шяраваллавух. Уттинингу сайки 60 къушлийн бивну бур студентътал МФЦ-лул экспертътуращал архIал консультациярду дуллай.
ЦIуссалакрал райондалул МФЦ-лул директорнал къуллугъ чIумуйну биттур буллалисса Аьбдулжалил Аьбдулжалилов дакI дарцIуну ур студентътуращал уртакьну зузаву Новостройрал агьалинан хайр-мюнпатрансса давуну хьунтIишиврий.
Юридический клиникалул хъунама Шарип Даитмирзаевгу ур му даврия студентътуран-волонтертуран цанмагу мюнпат бикIантIиссар, агьалинан миннал ихтиярду ххуйну дурчIин дулланшиврул цалла кIулшивуртту куртIгу, цIакьгу дуллалиссар, опытгу салкьи хъанахъиссар тIий.