Гьашину хъунасса шаэр, Аьрасатнал, дунияллул литературалул классик Михаил Юрьевич Лермонтов ниттил увну 200 шин шаврицIун дархIусса чIярусса мероприятияртту хъанай дур Да­гъусттаннайгу, аьмну Аьрасатнавугу. Октябрьданул 14-нний мукунсса батIаву хьунни Каспийск шагьрулийгу. Бадрижамал Аьлиева Каспийскаллал ЦБС-лул 4-мур филиалдануву хьунни «Лермонтов и Кавказ» тIисса цIанилусса литературалул вечер. Мунивух гьуртту хьунни Каспийск шагьрулул администрациялучIасса Культуралул иширттал ва жагьилтурал политикалул управлениялул начальник Пайзанат Абачараева, му Управлениялул хьхьичIунсса пишакар Мурад МахIаммадов, ЦБС-лул директор, шагьрулул Хъаннил союзрал, «Матери России» жяматийсса сакиншиннарал председатель Таиса МахIаммадова, Каспийскаллал оьрчIал творчествалул къатлул директор Гюльнара Селимханова, мукунма шагьрулул школардал дуклаки оьрчIру. БатIаврил дайдихьулий махъ лахълай, Таиса Билаловнал цилва ихтилатраву чIурчIав дунни Михаил Лермонтов дунияллул литературалул ца караматсса лишан хъанай ушиврий, кутIасса оьрмулул лахъишиврий мунаща бювхъушиврий дунияллул литературалувун уххан бюхъансса бюхттулсса даражалийсса произведенияртту чичин. Дуклаки оьрчIал гьарта-гьарзану бувсунни хъунасса шаэрнал оьрмулия ва творчествалия, му хьхьичIа хьхьичI Ккавкказнавун увкIун ивкIшиву цалла цIуллу-сагъшиву цIакь дуван оьрчIнийсса чIумала, мунияр махъгу му цимилагу ившиву Ккавкказнавун ва му мунан оьрмулухун ххира хьушиву, Ккавкказнаву шаэр гьурттуну хъанай диркIсса батIавурттая ва хьунабакьавурттая, цанма хIат-хIисав дакъа ххирану бивкIсса Ккавкказнаву бувкIшиву шаэрначIан бивкIугу. Вечерданий дуклаки оьрчIал дурккунни шаэрнал назмурду, ххал дунни анжагъ шаэрну акъассагу, гьунар бусса художникнугу ивкIсса Лермонтовлул суратру, миннуйсса хьхьичIавасса Ккавкказ ва мунил инсантурал багьу-бизу, тIабиаьт. Ва филиалданул заведующая Зугьра Даудовал барчаллагь увкунни ва давривух хьхьичIунсса гьурттушинна дурминнахь, мукунма ва вечер хIадур дуллайна кумаг бувсса шагьрулул 2-мур школалул ва гимназиялул библиотекартал Нина Антоновахь ва Наталья Соколовахь. Гихуннаймур шадлугъ лахъи ларгунни хъунасса шаэрнал цIа ду­сса кIичIираву, кьатIув. Тяхъашиврул программа тIиртIунни ОьрчIал творчествалул къатлул къавтIаврил ансамбльданул. Музыкалул чIунийн най буна бавтIунни ва кIичIираву ялапар хъанахъими. Шиккугу ихтилатру бунни Таиса МахIаммадовал, Гульнара Селимхановал, Пайзанат Абачараевал. Ва проектрал сиптачи Таиса Билаловнахь барчаллагь тIий, Пайзанат Асельдеровнал увкунни: — ХIакьину Таиса Билаловнал цIусса аьдатрал гьану бивзунни – цIанихсса инсантурал юбилейрду миннал цIа дирзсса кIичIирттаву дуллан, — куну. Шаэрнал цIа дусса кIичIиравугу шагьрулул школарттал дуклаки оьрчIал ва республикалул чтецтурал конкурсирттал лауреатътал Таиса Темировал ва Шагьри ХIамзатовал пасихIну, дюхханну дурккунни шаэрнал назмурду. Ва давривух хьхьичIунну гьуртту хьуминнан дуллунни ХIурматрал грамотарду, хъунасса шаэрнал цIа ларсун нанисса кIичIираву цикссагу шиннардий ялапар хъанахъисса оьрмулул бугьарасса инсантуран буллунни Барчаллагьрал чагъарду ва хъамакъабитулунсса бахшишру. Лермонтовлул цIанийсса кIичIиравумур байрангу хьунни мунивух гьуртту хьуминнан ва ми­кку ялапар хъанахъиминнан цукссагу хIаллай хъамакъадитансса.