ЦIуссалакрал райондалия

gard_8Шяраваллил хозяйствалул масъалартту ххалбивгьунни

Вай гьантрай «Эффективный АПК» проект бартдигьаврил масъаларду ххалбигьин Республикалул ХIукуматрал хъунаманал хъиривчу Шарип Шарипов ивунни ЦIуссалакрал райондалийн.

Мунащал бия ДР-лул шяраваллил хозяйствалул министрнал цалчинма хъиривчу Камалуттин Камалуттинов, ПаччахIлугърал имуществалул управлениялул министрнал хъиривчу Шихин Жаруллаев, ОАО «Дагагроснабрал» гендиректор Чамсуттин Мутуев, Дагъусттаннал «Минмелиоводхоз» ФГБУ-лул хъунаманал хъиривчу Бигиш Чаниев, Агрохимцентрданул, Россельхозцентрданул вакилтал ва цаймигу.
ЦIуссалакрал райондалул активращалсса совещаниялий ХIукуматрал зампреднал ва мунащалсса делегациялул вичIидирхьунни «Эффективный АПК» проект райондалий цукун бартдигьлай буссарив, агьалинан цуку-цукунсса захIматшивуртту хьунадакьлай дуссарив, хъу-лухччинул ссуттилми давурттив цукун най дуссарив. Агропромышленный комплексрал даврия гьарза-гьартану бувсунни райондалул Шяраваллил хозяйствалул управлениялул хъунама Фейзулла Мирзоевлул. Мунал бувсунни 40% дугьай хъуруннал ишла къадуллай бушиву, 3000 гектар ссуттил­ссаннул дугьан кIанай анжагъ 1515 гектар дургьушиву, мукунна 4 инвестициялул проектгу бартдигьлай бушиву. Ми проектругу дур къюмайтIутIи бугьаврицIун, аьнакIал фермарду даврицIун ва теплица баврицIун дархIусса.
Совещаниялий гьаз бунни цаймигу масъалартту. Шарип Шариповлул кIицI лавгунни ЦIуссалакрал райондалий кунмасса вайва масъаларду ххал бивгьушиву Агъуллал, Рутуллал районнайгу.

Вячеслав Паламарчук ЦIуссалаккуй

Вай гьантрай Ухссавнил территориал округрай­сса Дагъусттаннал бакIчинал полпред Вячеслав Паламарчук ивунни ЦIуссалакрал райондалийн. Му хьунаавкьунни райондалул хъунаманал хъиривчу Аьбдурашид Буттаевлущал ва администрациялул аппаратрал зузалтращал.
Му хьунабакьаврий Паламарчуклухь бувсунни ЦIуссалакрал райондалий Дагъусттан хьхьичIунмай баву мурадрайсса проектру бартдигьаврил бущилия ва ЦIуссалак цIусса миналийн бизан баврил давурттая. Паламарчуклул хъунмур къулагъас дунни «Обеление экономики» проект бартдигьаврих. Ва темалун хасъсса ихтилат бунни райондалул Финансирдал управлениялул хъунама Зарганат Гъазибуттаевал. Аьбдурашид ЯхIияевичлулгу бувсунни социал экономикалул масъалар­тту райондалий цукун щаллу буллай буссарив ва му чулухуннай цуку-цукунсса давурттив дуллай буссарив.
Совещаниялул лагрулий Паламарчуклул агьалигу кьамул бунни. Мунал махъ буллунни агьамсса масъалартту щаллу бан райондалул хъуниминнан ка-кумаг буллан.

Жагьилтурал фестиваль

ЦIуссалакрал райондалул Культуралул ва бигьалагаврил центрданий хьунни жагьилтурал коллективрдал Рес­публикалул фестивальданул ца бутIа. Му фестиваль дуллай бур гьунар бусса жагьилтал ялун личин баву мурадрай ва аьдатрайсса культуралул ххазинардал пропаганда дуваву мурадрай. Ва мероприятие хIасул дурну дия ЦIуссалакрал райондалул администрациялул Жагьилтурал иширтталсса буллалисса комитетращал ва райондалул Культуралул управлениялущал уртакьну. СахIналийн бувккунни 12 шяравасса коллективрду. Миннал цалва гьунарду ккаккан бунни 3 номинациялий: «хореографиялул творчество», «инструментирттал музыка», «вокал». Фестивальданий хьхьичIунну гьуртту хьусса коллективирдан буллунни дипломру ва арцуйнусса бахшишру. Му бакъассагу, ва фестивальданий ххув хьуми гьуртту хьунтIиссар «Таланты Кавказа» тIисса цIанилу хьунтIисса Республикалул фестивальданийгу.

Жул корр.