«Илчи» кказитрал 35-мур номерданий Лакрал райондалул бакIчи Юсуп МахIаммадовлущалсса ихтилатраву («Хъуначунал маслихIатраягу ххариссара») бувсун буссия ШавкIравсса ххуллул шанбачIулия Ххюлусмав-Буршайнсса ххуллийсса давурттая. Ххяллурдугу пIякь чин дуллай, къувирду дуклай, сайки 10-12 метралийх утта буллай бия 5 километралийхсса, — КIулушацIрал шяравун бияннинсса, ххуллу. Ва ххуллийсса давуртту къуртал дан пландалий ккаккан дурну дусса дур 2016 шинал ахирданийннин.
Зулайхат Тахакьаева
Ларгсса нюжмардий редакциялийн оьвтIий бия Ххюлусматусса хъамитайпа, ххуллийсса давуртту дарцIуну дур, кIай циван дарцIуссар, тIий. «Гъумучиял тиясса ххуллу гьан-бучIан захIматсса бур. КIинтнивун буххайхту микI-чIикIирайх лапва нигьачIину бикIанссар. Ттунма цичIав хьурча, ва ххуллийх бучIан багьантIисса оьрчIал оьрмурдая нигьачIий бура», — тIий бия кIа.
Ца ванил бакъассагу, Лаккуй ялапар хъанахъисса оьрмулул угьарасса цумацагу инсаннал дакIния къалагайсса бур ххуллурдал буруккин. Миннал пикри-ххажалатгу дурчIлачIисса дур. Мунияту хъиривмур кьинива лавгра Лаккуйн ва суалданул ялув.
Юсуп МахIаммадов ттул суалданий махIаттал хьуна. «Зузалт зийнма буссархха», — тIий унува, щак-щуклий, оьвкуна Гъумучиял шяраваллил администрациялул бакIчи Апанни МакьаевлучIан. Ваналгу бувсуна ххуллийсса агьамми давуртту къуртал шавай душиву, зурул ахирданийннин машинартту итабакьлан тIий бушиву.
Ххуллийсса давуртту, тIурчарив, бунияла щириркIунура дур. ПIякь чин бувсса, къувирду дурксса, утта бувсса кIанттурдая кIукIлумур аьрщи дихлай, кьянкьасса дичлай, ккуручайлул кьа дуллай бур.
Ххуллурдал идаралул хъунама инженер Зайнуттинов ГъазимахIаммадлул бувсунни ххуллу 3 шинал лажиндарай къуртал бан ккаккан бувну бухьурчагу, 2 шинал дансса давуртту 3 зурул дянив дуршиву.
«КIулсса куццуй, ларгсса шинал республикалул бюджет кьувкьуну бур. Мунил щавщи гьарца идаралийн бивунни. Хасну жул идаралулмур бюджетрая кьувкьунни 10 млн. къ.. Зузалтрал харжру къалавсун барзру хьунни. Амма жу дан дагьайсса давуртту дурссар куну, дязаннив ххуллу кьабитан намусрал кьамул буллай бакъар, тихамур ххуллу жапасса бушивугу хIисавравун лавсун. Чаранну ляхълай зий буру, кIи ялун най духьувкун, инсантал захIматшиврувун къабагьаншиврул. ХIадисгума бур «Ххуллу бувма хIажлийн лавгманащал архIал ацIайссар» тIисса. Райондалул бакIдургьуминнал ва Гъумучиял шяраваллил администрациялул бакIчиналгу жуха дагьайсса къулагъас ва хIурмат буллай бур. Арцу диялну диркIссания 2016 шиналнинссагума давуртту давияв. Къазий жул, тIайламур бусан, бувагу 3 гьанттар хьусса, Кьурбан-байрандалийн зузалт шаппа-шаппай итабавкьуну. Яла жухун Ххюлусматусса щинаххуллул турбарду бакьин буллалисса давурттугу дахчунни. Дуниял дарщу-дарккусса гьантри бакъасса, цавагу гьантта къазузисса къавхьуссар», — увкунни ванал.
На ва макьала хIадур дуллай бунувагу хьунни вава масъалалул ялув оьвтIутIисса. Ссавур дара ттигу чансса, ва зурул ахирданийннин. Ххуллул зузалтрал махъ буллунни кIинтнивун багьаннин машинартту занансса куццирайн ххуллу буцин, так гьавалул тагьар дахкъачирча.
