Октябрьданул 18-нний МахIачкъалалив хьунни Октябрь революциялул цIанийсса каналданул зумарду марцI даврил шагьрулул субботник. Га дия КОР марцI даврин хасъсса 4 кьинилул (15-18 октябрь) давуртту бакIуйн дуккан даврил субботник.
Ми гьантрал лажиндарай Лениннул, Кировуллал ва Советский районнал администрациярттал бакIчитал ялув бацIаву дуллай бивкIссар тикку дуллалисса давурттал. МахIачкъалаллал администрациялул бакIчинал хъиривчу Камил Изиевлул бувсъсса куццуй, циняв зузалтрацIун цIакь бувну бивкIссар зунсса кIанттурду ва бивтун бивкIссар жаваблувсса инсантал.
Тендерданул хIасиллайн бувну, октябрьданул 1-нния шинмай Кировуллал ва Советский районнал санитариялул тагьарданул жаваб дуллалиссар «Каспий инвест» ООО-рал, Лениннул райондалул марцIшиврул жаваб дулайссар «Комбинат благоустройства» ООО-рал.
Комбинатрал директор Аьлимхан АхIмадпашаевлул бувсунни даву цукун най дуссарив. Тиккун увкIун ия ДР-лул БакIчинал ва ХIукуматрал Администрациялул Виваллил политикалул управлениялул отделданул хъунама Аьлибаг Аьлиев, ганал хъинчулийсса кьимат бивщунни комбинатрал дуллалисса даврин.
«МахIачкъалалив хъуннасса даву дуллай бур КОР марцI даврин хасну, га даву даврил сиптачигу хьуну ур Дагъусттаннал БакIчи Рамазан АьбдуллатIипов. Даву дуллай бур щалла каналданий, лахъи лагантIиссар маркIачIан чIумалнин. ЦIана шагьру марцI баврил давурттайнсса тIалавшинну кьянкьа хьуссар, агарда подрядрал организациярттаща цайнма лавсъсса бурж биттур буллан къабюхъларча, гай танмихIрайн кIункIу бантIиссар», — увкунни Аьлибаг Аьлиевлул. Ганалва мукъурттийн бувну, канал марцI дурну махъ, ганил кIивагу чулух дайгьузанну дантIиссар, канал кIилчингу чапал къахьуншиврул.
Субботникрай гьуртту хьунни министерстварттал ва ведомстварттал зузалтгу.
