Октябрьданул 21-нний, АьФ-лул ПаччахIлугърал Думалуву Дагъус­ттан Республикалул Кьинирду даврицIун дархIуну, ПаччахIлугърал Думалуву хьунни Миллатирттал иширттал комитетрал члентурал ва Федератив устройствалул комитет­рал члентурал Дагъусттан Республикалул делегациялущалсса хьунабакьаву.

Хьунабакьаву тIитIлай, ПаччахIлугъ­рал Думалул Миллатирттал иширттал комитетрал Председатель ХI. Сафараьлиевлул бувсунни ва хьунабакьаврил хъунмур мурад – цаппара федерал законнаву дахханашивуртту, тIайлабацIанбавуртту даврицIун бавхIусса масъалартту ххалбигьаву бушиву.
Дагъусттаннал БакIчи Рамазан Аьб­­дуллатIиповлул бувсунни цува ПаччахI­лугърал Думалуву зий ивкIсса чIумал цанма Дагъусттаннай хъанахъисса гьарзатрал буруккин бивкIшиву. «Ттун хъинну кIула республика, мудан тихун лагайссияв, яла нава региондалул каялувчи хьувкун, ттун къакIулсса зат шийх бакъая, ттун гьармуния хавар бия. СССР леркьун махъ чIявуми хьхьичIуннайшиврул институтру лиян бувну бур, ягу цIусса дузал бувну бакъар, зий бур кугьнасса институтирттал лагрурдаву. Бухлаган бувну бур хьхьичIуннайшиврул бакIщаращив – чавахъирттал, навтлил отраслирду, газ буккан баву. Миннуха зуншиврул цал хьхьичI республика хьхьичIуннай даврил приоритетру дикIан аьркинни.
Жу власть цIудуккан дуллан бивкIру, цанчирча властьравусса чIявуми инсантал экономикалуха зий къабивкIун бур. ЧIярусса давуртту дахханаххи дан багьунни. Цалчин­сса 2 шинал лажиндарай дурсса давурттайну экономика хьхьичIуннай шаврил бущилун хасну, промышленность хьхьичIуннай шаврил индексран хасну Дагъусттан Аьрасатнаву хьхьичIунми кIанттурдайн бувккунни, налогру салкьи даврил бущилун хасну – 4-мур кIану бугьлай бур, цIуллушиву дуруччаврил модернизациялул чулуха – 6-мур кIанай бур.
Ялун уруган му къаоьккисса иш ххай бур. Амма экономикалул лагру хIисавравун ласурча, жу ттинингу махъва-махъмур кIанай бияв, ттигу тиккува буру. Циванни му мукун хьусса? Цанчирча цаппара отраслирду цIунила цIуну зий байбивхьунни. Жун кумаг буллай бур Аьрасатнал Президентналгу, ХIукуматрал Председательналгу. Амма региондалул иширттахлу жаваб дуллалисса чIявуми федерал каялувчитуран кIулну бакъар жу ссаха зий буссарив, цукунсса захIматшивуртту хьунадакьлай дуссарив.
Мунияту на тавакъю бувссия билаят­рал бакIчинахь Дагъусттаннан хасну личIисса документ кьамул бан. Жун аьр­кинну дур хьхьичIуннайшиврул прог­рамма, хьхьичIуннайшивуртту даврил бакIщаращив уттава буккан баврил программа, хьхьичIуннайшиврул институтру цIубуккан баврил программа. Социал хъиншивурттал щаллу баврил программа аьркинну дакъар».
Республикалул каялувчинал бувсунни дукIу ва гьашину региондалул маэшат ххуй баву мурадрай дурсса ва дуллалисса давур­ттая. Ганал мукунма бувсунни цIанасса ппурттуву паччахIлугърал каялувшиврул система низамрайн дурцуну душиву. Бувсунни миллатирттал дянивсса арардал хIакъиравугу, ЕГЭ дулаврил масъаларттаягу.
Хьунабакьаврил ахирданий ХIажимет Сафараьлиевлул бувсунни ДР-лул делегациялул члентуран ХIурматрал грамотартту дулунсса хIукму кьамул бувну бушиву.
ХIадур бувссар ХI. Аьдиловлул