ПАТААЬЛИЛ АРС ЖАХIПАРОВ АГЪРАГЬИН
Уттигъанну, цIуцIишаний ла­хъигу къалавгун, аьпалул хьунни буттал ватангу, лакку кIанугу ххирасса хIакьсса зунтталчу, техникалул элмурдал кандидат, Аьрасатнал Федерациялул лайкь хьусса зузала ЖахIпаров Агърагьин Патааьлил арс.

Увну ур Агърагьин ЧIурттащиял шяраву 1934 шинал, Ккавкказнаву хъинну машгьурсса заргал Патааьлил ва ХIуруннул кулпатраву (ва кулпатраву 14 оьрчI-душ бувну ХIуруннун Нину-Виричу цIа дуллуну дур). ЧIявусса оьрчIру бусса кулпатраву, ппугу ивкIуну, щалла хъар ниттил хъачIунттайн дагьну дур, мунияту Агърагьиннунгу оьрчIнийва захIматрал кьадругу кIул хьуну бур.
Дяхтта зий киномеханикнал кумагчину, хьхьувай дуклай, МахIачкъалалив школа къуртал бувну бур. Гара шинал Москавлив лавгун дикIул ва накIлил промышленностьрал технологиялул институтравун увххун ур. 1958 шинал институтгу къуртал бувну, зун ивкIун ур Москавуллал «Клейтук» заводрай клей дайсса цехрал мастерну, технологну, яла начальникну. Шичча тIалав увну ур желатиндалул (хIайлул сина) заводрал директорнал цачIава зун. Ванал дипломрал давугу желатиндалиясса дуссия. Яла 1986 шинал Желатиндалул заводрал директор хьуссар.
ЦIа дурксса академик Несмеяновлущал цачIу, тарихраву цалчин, искусственныйсса лухIи икьра бувссар. Ва икьралун цIагу «Искра» дирзссар.
ТIалав увну жулла республикалийн увкIун, Чирюртуллал фосфорданул заводрал каялувшиву дурссар. МахIачкъалалив хамилданул (дрожжилул) завод зузи бан хIадуршин дурссар. Махъунай Москавлив лавгссар Юрий Лужковлул тIалав увну. 1992 шинал Агърагьиннуйн Бирюлевуллал пивзаводгу тапшур бувссар. 1993 шинал ванайнма тапшур бувссар йод бусса хамил итадакьайсса завод. Ва куццуй Агърагьиннуя хьуссар Москавуллал 3 заводрал генеральный директор. Му бакъассагу, Агърагьиннул каялувшиврулу дурссар 14-райра лахъсса къатри, миннувух царай диркIссар 22 зивулийссагу. Дурссар бигьалагай зона. Тулаллал областьрай дурссар хъуруннал хозяйство. Ганин цIагу дирзун дуссар «Малый Чуртах». Гичча цалва зузалтран кьюркьусса продукты дучIан дай­ссия. Укун Агърагьиннул ккаккан бувссар цува ххуйсса хозяйственник ушивугу.
Ванал цIа дагьссар Аьрасатнал Мусил луттиравун. ЧIярусса хъин-хъинсса давурттив дурссар Агърагьиннул цала буттал шяравугу: 500 метралул лахъишиврий хIатталлил лагма чIира бунни, ххуйну бакьин бунни щарнил мизит, цIусса бюх­ттулсса минаралущал, ЧIурттащату ШавкIрав бияннинсса ххуллу гьарта бувну, КIулушацIун бияннин кIяла ххюл бивчунни. Шяраваллил дянивсса цала буттал къатрал эяллая ттизаманнул къатри дунни. Вай гьарзат дурссия Агърагьиннул цала буттал мина ххирану тIий, мина зия къадан.
Дагъусттаннайн къачагътал ххявхсса чIумалгу хъинну личIлулну хъирив агьну ия хъанахъисса иширттал. Москавлив хьунаакьайссия, республикалухлу талай, щавурду дирминнащал. Дагъусттаннан кумагран гьан бувссия цаппара хъуни машинартту продуктылущал ва 500 азарда къуруш арцущал.
Агърагьин цIанихсса, щаллагу республикалий машгьурсса ЖахIпаровхъал кулпатравасса ия. Цалва уссурссуннал кунна, ваналгу кьадиртунни жяматралгу, республикалул агьалиналгу, кIулминналгу, дустуралгу дакIурдиву такIуй цува хъамакъаитансса цIа.
Агърагьин аьпалул шаврил хъуннасса кьурчIишиву кIидачIлай, жижара буллай буру ссихь, арсурваврахь, уссурссуннахь, гъан-маччанахь, щалвавагу жяматрахь, махъсса цинявннахьвагу. Цал гьав нурданул дуцIиннав, Пирдавс алжан нясив баннав. Махънал оьрмурдай барачат бишиннав. Амин!
ЧIурттащиял жямат