Гьулувраву буссар циняв витаминну ва минераллу, мукунна инсаннал чурххан аьркинсса, хайр бусса цинярдагу зат­ру.

Гьулувравусса ххяххиялул белок хъинну бигьану лялияйсса бур, цуппагу дикIул белокраха лавхьхьусса бур хъис аьгъушивугу дакъасса. Железо ва фолиевая кислота гьулувраву дусса дур чIярусса цайми продуктылувунияр. Гьулувравусса витаминну ва минераллу бигьану лялияйсса бур. Аваданссар гьулув клетчаткалул ва углевод­рал, яла-яла чIявусса бусса бур ми щюллими гьулувраву.
Хъинну хъинссар кIурхру дучIан дурсса гьулув, цалагу щюлли хъюруврал тIин бусса. Гьулуврал яла ххуймур хасият дур цивура нитратру, радионук­ленну я къабайсса, мунияту ва дур хъинну экологиялул чулуха марцIсса продукт.
Ссанни хъинсса гьулув?
Гьулув хъинссар къюкIлин, оьттун. Гьулурал оьттуву на­цIушиву чан дайсса дур, дукра лялиян дан кумаг байсса бур. Обмен веществ ххуй шайсса дур. Гьулувраву дусса дур изофлавонну, цалгу дурухлу (рак) хьун къаритайсса.
Хьунадакьай ттучаннай дахлай цIана щюллисса, ятIул­сса, михакрангсса гьулув. Вегетарианцынал учай гьулув дикIун кIанай дацIайссар куну. БучIиссар миннайн вих хьун, белок буссар миву, цив­ппагу бигьану лялияйсса дикIул белокнияр, железа тIурча шиву гьарзассар хъюруврал вайми журардавунияр.
Дуки-хIачIиялул промышленностьраву гьулув дичайсса дур чIярусса продуктырдавун: колбасардавун, консервардавун, ххира дакъасса кканпитIирттавун, щикIалатирттавун, кофелувун.
Гьулуврал ца порциялуву дур, 90% фолиевая кислотIалул ссуткалийсса нормалул, мунияту гьулув хъинссар лякьлуву оьрчI бусса хъаннин. Клетчатка хъинссар дукра лялиян дан, мукунна дайшишруну шайсса дур ххюттулийсса дурухлурдан. Шиву изофлавонну буну тIий, гьулув ккалли дайсса дур антиоксидантну.
Вайми продуктырдах бурувгун, Гьулувраву шархьун махъгу чурххан хайр бусса затру даххана къархьуну личIайсса дур.
— Гьулуврал кашалул иммунитет цIакь дайсса дур, обмен веществ цилла нирхираву дитайсса дур, къюкI, туннурду цIакь байсса бур.
— Гьулуврал оьттуву нацIуши­ву чан дайсса дур, мунияту хъин­ссар диабет дусса инсантуран.
— ЦIумулий, ххюттуй щаву думиннан гьулуврал каша хъин­ссар.
— Гьулув шархьсса щин хIачIларча хъинссар мочекаменная болезнь дуни, нерварду сукку хьуни, бачIи-бачIи стакан гьантлун шамийла.
— Гьулуврал иникьали лагавривух хIала дурну дукларча, бурчу ччувччуну хьусса щаву ччяни хъин шайссар.
МахIатталсса иш, болгарнал целительтурал гьулуврал иникIмалий хъин дайсса дур дурухлурдугу (злокачественный опухоллу). Укунсса иникIмалувун дичайсса дур кьакьан дурсса нувщул тIутIив. Дарув баншиврул аьркинну дур 1 хъунна къуса гьулуврал иникьаллул, 1 хъунна къуса тIутIал. Миннул ялунгу дутIин дачIи литIра щаращисса щинал, 3 ссятрай дамлий дишайсса дур, гъилисса кIанттай. ХIачIайссар гьантлун 3-ла дукра дукан 30 минутIрал хьхьичI.

ЦIуллуну битаннав. Т. ХIажиева