НАБИНАЛ АРС РАШКЪУЕВ АСЛАН
Уттигъанну, оьрмулул 83 шинаву, аьпалухьхьун лавгунни ххаллилсса, лакрал миллатгу, буттахъал ватангу ххирасса, Гъумучиял Рашкъуев Набинал арс Аслан.
Рашкъухъал Аслан увну ур 1931 шинал Гъумук къуллугъчинал кулпатраву. Гъумук 10 классгу къуртал бувну, яла МахIачкъалалив Дагъусттаннал
шяраваллил хозяйствалул институт бувккуну, агроном хьуну ур. Зун айивхьуну ур Буйнакскаллал райондалийсса колхозрал агрономну. Ялагу цалла касмулущал дархIусса личIи-личIисса давурттай зий ивкIун ур управлениялий, райком партиялул орготделданул хъунаману ва цаймигу давурттай. Чув, ци даврий зурчангу, ванал цайнна тапшур дурсса даву лажин кIялану биттур дайсса диркIун дур.
Лайкь хьуну ур цаппара медаллан ва ХIурматрал грамотарттан.
Пенсиялийн увккун махъ цалва кулпатращал ПатIиматлущал Жунгутайлив ялапар хъанай ивкIун ур.
Асланнул бивкIулул кьурчIишиву кIидачIлай, жижара буллай буру ванал кулпатрахь, кIивагу душнихь, ссурахъу Рашкъуев Рашкъухь ва махъсса цинявппагу гъан-маччаминнахь. Цал бунагьирттал аьпа баннав, рухI хъинний дишиннав. Ванан бакъамур душваран, уссур-ссуннан булуннав.
Гъумучиял жямат,
дустал, гьалмахтал
———————————-
МАХIАММАДЛУЛ АРС КЬУРБАНРАМАЗАНОВ КЬУРБАНРАМАЗАН
Сентябрь зурул 22-нний 83 шинаву оьрмулуцIа хьунни МахIаммадлул арс Кьурбанрамазанов Кьурбанрамазан. Ванал оьрму лавгун бур колхозраву зий, батагъалий. Бутта дяъвилийн уцайхту, бутташиву дан багьну бур Кьурбанрамазаннун. Вайннайн учай «дяъвилул оьрчIру» куну.
1955 шинал ва лавгун ур Туркманисттаннавун, зун увххун ур комбинатравун кьяпричину. Кьурбанрамазан цукун зий ивкIссарив ккаккан буллай дур 6 медальданул ва чIярусса грамотарттал. Ва ур захIматрал ветеран, чIявусса инсантуран эбратну хьусса адамина. Кьурбанрамазан ахиратрал шаврил кьурчIишиву кIидачIлай буру ванал кулпатрахь, арснахь, душварахь, куявтурахь, гъан-маччанахь. Имандалий лавгун лякъиннав. Цув алжаннул ххари аннав!
ЧIяйннал жямат
————————————-
ХIАСАНХIУСАЙННУЛ ДУШ КЬУРБАНОВА ГУЛИЗАР
Вай гьантрай инсульт хьуну, цIуцIи шаний лахъи къалавгун, дунияллия лавгунни 1-мур ЦIувкIратусса ххаллилсса хъамитайпа, захIматрал ветеран, ХIасанхIусайннул душ Кьурбанова Гулизар.
ЧIавасса оьрмулий байбивхьуссар Гулизар колхозрал давурттай зий, ччарча – дояркану, ччарчагу – хъу-лухччинул давурттай. Щалва оьрмугу лавгссар мунил зий, захIмат буллай.
Гулизар бия дакI-аьмал хъинсса, шяраваллил жяматран ххирасса, хIал бавкьусса хъамитайпа. Хъамал ххирасса Кьурбаннул ва Гулизардул къушлий бухху-букку чан къашайва. МяйцIалла шин шавайсса Гулизардул мудангу кIу къабивзун хъамал лахъайва, щин ци хъинбала бувну, цума ххари ан хъинавав тIий чялиш бувкнувасса хъамитайпа бия.
ЧIаххул, гъан-маччами хIайранну бикIайва Гулизардул ичIурасса ятти-гъаттарахасса аякьалий, му инсан тачIав бувххунна, бавкIунна куну, бигьалаглай къаккавкссар тIун бикIайва.
Гулизар дунияллия лагаврил кьурчIишиву кIидачIлай, жижара буллай буру мунил ласнахь Кьурбаннухь, душваврахь, куявтурахь, миннал наслулухь, агьлу-авладрахь.
Гулизардул рухI хъинний дишиннав, Алжаннул ххари буваннав! Махъминнахьхьун цIуллушиву дулуннав!
1-мур ЦIувкIуллал жямат
——————————————
ИСМЯИЛЛУЛ АРС МАХIАММАДОВ ХАН-МАХIАММАД
Уттигъанну, оьрмулул 78 шинаву, аьпалул хьунни КIамахъаллал шяравасса Исмяиллул арс МахIаммадов Хан-МахIаммад.
Хан-МахIаммад ия тIайламур ххирасса, цаятура ва лагмациринная жаваблувшинна дусса, яхI-къирият ххисса ва дугърисса чув. Ва ия, ца цалва тухумран акъа, щалла щарнингу хъуначу хIисаврай бусравсса маслихIатчи ва насихIатчи.
Хан-МахIаммадлул бивтссар ламмамшиву ва танмалшиву цирив къакIулсса, захIмат цирив кIулсса лайкьсса оьрмулул ххуллу. Цалама, чилма личIи къаувну, бумунийн бур учайсса, лагмациринная дакъа, цаятурагу тIалавшиннарду лахъсса инсан ия Хан-МахIаммад.
Хан-МахIаммадлул бивкIулул кьурчIишивугу кIидачIлай, жижара буллай буру ванал кулпатрахь, арсурваврахь, душварахь, уссур-ссуннахь ва махъсса цинявппагу гъан-маччанахь.
Цал бунагьирттал аьпа баннав, рухI кIукIлуний дишиннав, алжан нясивну лякъиннав.
КIамахъаллал
ва Ппалассуннал жямат
——————————————
Вай гьантрай дунияллия лавгунни щаллагу райондалул жяматран ххирасса ва хъинну бусравсса хIакьсса зунтталчу
МахIаммадов ХIажияв
МахIараннул арс.
Ванал бивкIулул кьурчIишиву кIидачIлай буру кулпат Разиятлухь, арсурваврахь, душваврахь, куявтурахь ва цинявппагу гъан-маччанахь.
Алжаннул ххари аннав, гьав нурданул дуцIиннав. Махъ ливчIсса цинявппагу маччаминнан чичру ххуйсса лякъиннав.
Гъазиев Шуаьйл кулпат,
Бавасулайманов Зубаиллул кулпат ва щалагу Хъусращиял жямат ва шяраваллил администрациялул бакIчи Гъазиев Аьбдул
