Ярославруллая бувкIсса делегациялувух бия Ярославский областьрал губернаторнал хъиривчу Александр Грибов, Ярославуллал областьрал Думалул председательнал хъиривчу Илья Осипов, Ярославский областьрал правительствалул кьатIаллищалсса
дахIавурттал управлениялул каялувчинал хъиривчу Светлана Ненастина, Ярославский областьрал губернаторнал советник Александр Тимченко, Ярославский областьрал культуралул департаментрал директорнал заместитель Юлия Серова, Информациялул цIусса технологияртту ишла даврил отделданул консультант Роман Пряников, Ярославль шагьрулул Заволжский райондалул администрациялул хъунама Андрей Мамонтов, Ярославль областьрайсса Дагъусттаннал правительствалул вакил Асланбаг Далгатов, Ярославль шагьрулийсса «Дагестан» тIисса жяматийсса культуралул центрданул председатель Шяпи Оьмаров.

Имара Саидова
Ярославль шагьрулия укун бусравсса делегация жулла республикалийн цалчинни бувкIсса. Ялу-ялун цIакь хъанай най дур Ярославуллал областьрал ва Дагъусттаннал дянивсса хIала-гьурттушиврул ва дусшиврул арарду. Махъсса ппурттуву Ярославуллал областьрайгу лавайсса даражалий кIицI лаглай бур Да­гъусттаннал кьинирду.
ДакIнийн бутанну Ярославль шагьрулий, Заволжский райондалий, дацIан дурну душиву Совет Союзрал кIийла Виричу АхIмад-хан Султаннунсса ххаллилсса гьайкалгу.
Ва ххуллухгу Ярославль шагьрулия бувкIсса хъамаллурал цал ттигу исват бунни жулла республикалул чулухунмайсса хIурмат-кьимат.
МахIачкъалалий Ярославу­ллая бувкIсса бусравсса хъамал кьамул бунни ДР-лул ХIукуматрал председательнал 1-ма хъиривчу Анатолий Карибовлул. Мунал кIицI лавгунни уку-укунсса хьунабакьавурттайну жува Аьрасатнал халкьуннащал хIала-гьуртту хьуну, дусшиврул арарду цIакь дуллалишиву ва мунийн бувну укунсса хьунабакьавуртту ччя-чччяни дуллан аьркиншиву.
«Дагъусттаннал ва Ярославуллал областьрал дянивсса культуралул, кIулшивуртту дулаврил, ишбажаранчишиврул, машлул арарду ялу-ялун гьарта-гьарза хъанай най дур. Хъамал жулла аьрщарай буссаксса, миннащал дувантIиссар маслихIатру ккак­лакисса тамансса давуртту», — увкунни Анатолий Карибовлул.
Мукунма ванал бувсунни ларгсса шинал Дагъусттан Аьра­сатнавун бувххун 200 шин шаврин ва хъуна­сса шаэр Расул ХIамзатовлун 90 шин шаврин хас дурсса Дагъусттаннал кьинирду Ярославль шагьрулийгу лавайсса даражалий тIайла дуркшиву.
«ХIакьинусса кьини Ярославуллал областьрай ялапар хъанай бур 4 азарунная ливчусса да­гъусттанлувтал. Ми цивппагу куннащал ку бавкьуну, миллат личIи къабувну, ялапар хъанай буссар. Ва аьрххилий жу кIул хьун ччай буру Дагъусттаннал халкьуннал магьирлугъращал, аьдатирттащал, багьу-бизулущал»,- увкунни Илья Осиповлул.
Ярославуллал областьрая бувкI­сса хъамаллуращал хьунаавкьунни МахIачкъала шагьрулул мэр МахIаммад Сулаймановгу. МахIаммад Сулайманов цувагу делегация жучIава бусса шанмагу гьантлий миннал чIарату арх къаувцун, гьарица иширттавух хIала хьунни.
«Ярославуллал областьрал кьинирду Дагъусттаннай дуллалаву, му жулла республикалий хъанахъисса хъуннасса агьамшиву дусса ишри. Ва хьунабакьаврийну тасттикь хъанай дур Аьрасатнал халкьуннал цашиву», — увкунни МахIаммад Сулаймановлул.
Ярославуллал областьрал делегациялул чулуха барчаллагь баян буллалисса ихтилат бунни му областьрал губернаторнал хъиривчу Александр Грибовлул:
«Махъсса шиннардий Ярославуллал областьрал ва Дагъусттаннал дянив хIасул хьунни гьарица чулуха хIалимшиву дусса арарду. Хавар буссар Дагъусттаннал авадансса магьирлугърая Ярославуллал агьулданунгу. Региондалийсса школардай хъунасса шаэр Расул ХIамзатовлул творчество лахьлай буссар. Ярославль шагьрулий дацIан дурну ду­ссар Совет Союзрал кIийла Виричу АхIмад-хан Султаннунсса гьайкал. Яла агьаммургу – жулла регионнал дянивсса, цайми миллатирттан эбратну дацIансса, дусшивур. Ярославуллал областьрай чIявусса дагъусттанлув ялапар хъанай бур. Ларгсса шинал жугу Дагъусттаннал кьинирду кIицI ларгссия. Уттирив, мунин жаваб дуллай, Дагъусттаннай жува лахъа-хъун баврия хъунмасса барчаллагьрай буру», — увкунни ванал.
Ва аьрххилул лагрулуву хьунни цикссагу хьунабакьавуртту ва культуралул мероприятиярду.
Ярославуллаясса хъамаллуращал хьунаавкьунни ДР-лул ХIукуматрал председатель Аьвду­ссамад ХIамидовгу.
«ДакIнийхтуну барчаллагь тIий буру Хъунмасса Буттал КIанттул цIанийсса дяъвилий дагъусттанлувтурал бувсса захIмат хъамакъабивтун, му абад баврихлу. 2010-шинал Ярославль шагьрулий АхIмат-хан Султаннун гьайкал дацIан даву, му Ярославль шагьрулул тарихраву бакъассагу, щалва Да­гъусттаннал тарихраву хьусса агьамсса ишри. Гьарца шинал сентябрь-октябрь зурдардий Ярославль шагьрулийсса школардай АхIмад-хан Султаннул цIанийсса кубокрал спортрал соревнованияртту дувайссар.
Му бакъассагу, Ярославль шагьру машгьурссар хъинну хьхьичIавасса шагьрулул тарих ябаврийнугу. Шиккур хIасул хьусса цалчинсса профессиональныйсса оьруснал театр», — увкунни Аьвду­ссамад ХIамидовлул.
Цалва ихтилатраву Александр Грибовлул кIицI лавгунни ДР-лул Президент Рамазан АьбдуллатIипов хъинну гьунар бусса, итххявхсса каялувчи ушиву, ва мунал хIарачатрайну республикалий тамансса дахханашивуртту хъанай душиву. Ванал ялагу бувсунни Ярославуллал областьрал ва Да­гъусттаннал машлул-экономикалул, элмийсса-техникалул арарду хьхьичIуннай даву мурадрайсса кьутIигу чирчушиву. Ва кьутIи чирчуния шихунмай Дагъусттаннал ва Ярославуллал тамансса предприятиярдал давуртту лядуркссар. Ярославуллая Дагъусттаннайн дукIлакIиссар «Ярославские краски» ОАО-лул строительствалун аьркин дайсса материаллу. Да­гъусттаннаягу Ярославрайн гьан дуллай бур ахъулсса ва ахънилсса. Мукунна тайнначIа машгьурну дур Къизлардал ва Дарбантуллал коньякру итадакьайсса заводирттал продукция.
Вайва гьантрай Къумукьнал театрдануву хьунни Ярославуллал областьрал кьинирдан хас дурсса концерт. Му концертрай авадансса программа ккаккан дунни «Серпантин» тIисса Ярославуллал халкьуннал инструментирдал ансамбльданул. КIирагу региондалул дянивсса дусшиврул ва ишбажаранчишиврул арарду хьхьичIуннай даврихлу, жулла республикалул чулуха Ярославуллал областьрал делегациялул вакилтуран дуллунни ХIурматрал грамотарду. Ярославуллал областьрал делегациялулгу регионнал дянивсса хIала-гьурттушиву хьхьичIуннай даврихлу ХIурматрал грамотарду дуллунни ДР-лул ХIукуматрал ва Администрациялул БакIчинал хъунаманал хъиривчу Алексей ХIасановлун ва Миллатирттал политикалул министрнал хъиривчу Зикрула Илиясовлун.
Ярославуллаясса хъамал лавгунни тарихравун багьсса Дарбантуллал шагьру ккаккангу.
ЖучIанма хъамалу бувкIсса делегациялул чулуха цивппа хъинну рязину ливчIсса ва хъунмасса хIаллай дакIния къабу­ккансса аьрххи хьушиву бусласисса ихтилат бунни Александр Грибовлул.