Ларгсса хамис кьини Дагъусттаннайн увкIун ия кIулшиву дулаврил ва элмулул ялув бацIаврил Федерал службалул каялувчи Сергей Кравцов. Ваналгу, ДР-лул БакIчи Рамазан АьбдуллатIиповлулгу каялувшиннаралу хьунни 2014 шиналсса ЕГЭ-рдал хIасиллая ва 2015 шиналсса экзаменнал технологияртту хьхьичIуннай даврия бусласисса батIаву. Муний гьуртту хьунни республикалул шагьрурдал ва районнал бакIчитал, кIулшиву дулаврил управлениярттал каялувчитал.

Зулайхат Тахакьаева
Рамазан АьбдуллатIиповлул дакIнийн бувтуна Сергей Кравцовгу гьурттуну шинал хьхьичI хьусса вара ЕГЭ-рдан хас дурсса совещаниялий учительтурайгу, дук­лаки оьрчIайгу, нитти-буттахъайгу, ДР-лул КIулшиву дулаврил министерствалийгу дурну диркIшиву чIярусса аьйрду.
«ДакI дарцIуну ура хIакьинумур совещание паракьатну гьаншиврий. Шинал лажиндарай жура хъуннасса даву дурссар ЕГЭ хьхьичIми шиннардий кунна «чапалну» къахьуншиврул. Экзаменнал хIасиллу яларайсса душиву тIурча му тай шиннардий ЕГЭ-лул лагма хIасул хьусса тагьарданухсса хIакьри. Гихуннайсса кIира-шанна шинал лажиндарайгу хIасиллу укунна хьхьарасса хьурча, му учительтуралгу, нитти-буттахъалгу, районнал каялувчитуралгу жаваб дуллансса ишри», — увкуна Республикалул БакIчинал.
КIицI лавгуна Аьрасатнаву зий дайдирхьуну душиву дуккаврил цIу-цIусса стандартирттай зун тIалав буллалисса цIусса Закон, му Закондалийн бувну хъуннасса даву дуллан багьлай бушиву жулла республикалийгу, щалва билаятрайгу кIулшиву дулаву цIусса даражалийн дуцин.
«ЕГЭ-рдал сакиншиннарал ялув бацIаву гихуннайгу кьянкьа дан багьлай бур. ХьхьичIра-хьхьичI багьлай бур сакин дан учительтурансса экзамен, хIакьину Аьрасатнавусса ттизаманнул стандартирттацIун дакьинсса даражалийн ми хIадур баншиврул», — увкуна Рамазан АьбдуллатIиповлул.
Бувсуна республикалий чялишну буллай бушиву цIусса детсадру, цувагу га кьини зана хьушиву ЧIарадиял райондалий 250 оьрчIансса детсад тIитIлатIисса шадлугърая.
«Ва укунмасса детсад бакъарча, школа-детсадри, оьрчIру байбихьулул школалийн гьан хIадур буллалисса. Мукунсса школа-детсадру республикалий гихунмай цаймигу тIитIин дакIний буссар. 2016 шинайннин жучIава, Аьрасатнал Президентнал Указрайн ва ХIукуматрал хъунаманал хIукмулийн бувну, щаллу хьун аьркинссар оьрчIан школалийн гьаннинсса кIулшиву дулаврил масъала», — увкуна Респуб­ликалул БакIчинал.
Сергей Кравцовлул цалва ихтилатраву барчаллагь увкуна чIявусса вузирдал ректортурал цIанияту, Дагъусттаннай чIярусса шиннардил мутталий цалчин тIайлану ЕГЭ дулаврихлу.
«ЧIявусса бакъая Дагъустта­н­най ЕГЭ марцIну дулун бюхъан­тIишиврийн вихсса. Амма на Рамазан ХIажимурадовичлущал хьунаакьайхту, бувчIуна, агарда жува ва масъалалул ялув захIмат биширча, тагьар ххуйчулийннай даххана дан хьунтIишиву. Гьарзат багьайсса куццуй хьуссар учингу къахьунссар. Лях-карах цаппарасса буруккинтту хьунабакьлай бия, амма миннул аьмсса тагьар зия къадурунни. ЦIанакул ттуща дакI дарцIуну учин бюхълай бур, чувчIав – я билаятрай, я регионнай, Дагъусттанная оьккину гъалгъа тIий бакъассар, куну. Мукунсса хIасиллу хьусса хIакьину ва залдануву щябивкIминнал хIарачатрайнур. Умуд бур гихуннайгу цинярдагу экзаменну гьашинунияргу марцIну ва лахъсса ккаккиярттащал дулланссар, тIисса», — увкуна Сергей Кравцовлул.
Ванал ялагу кIицI лавгуна ЕГЭ хьхьарану дулаврия буруккин буллангу аьркин бакъашиву, цанчирча Аьрасатнаву биялну бусса бур дук­лан гъира бусса оьрчIру, миннал кIулшивуртту хьхьарасса духьурчагума, кьамулгу бувну, дуккин бан хIадурсса. Дагъусттаннайсса тагьар хIисав дурну, гьашину баллу лагь бувну бур оьрчIру аттестатру къалавсун къаличIаншиврул.
Сергей Кравцовлул бувсуна ДР-лул КIулшиву дулаврил ва элмулул министерствалущал кьутIигу чирчуну, ххалдиргьуну душиву республикалул кIулшиву дулаву хьхьичIуннай дансса план. Баян бувуна гьунттиймур кьинива хьунтIишиву математикалул ва оьрус мазрал учительтурансса ва педагогтурал пишакаршиву ларай дайсса институтрал зузалтрансса цалчинсса семинар. Укунсса семинарду уттинин буллай бусса бур билаятрал 3 региондалий.
Федерал ведомствалул каялувчинал кIицI лавгуна 2014 шинал ца Дагъусттаннай бакъасса, щалвагу билаятрайва гьарцагу дарсирал дянивсса бал, ларгсса шинах бурувгун, лагьсса хьушиву. «Мунил бусласи­ссар хьхьичIми шиннардий экзамен дулавриву диялдакъашивуртту чIярусса диркIшиврия. ХIакьинусса хIасиллу хьхьарасса духьурчагу, ми тIайласса шаву жунма мюнпатсса ишри. Аьрасатнал ХIукуматрал хъунаманал хъиривчу Ольга Голодецлул ЕГЭ-рдал хIасиллан хас дурсса совещаниялий хаснува кIицI лавгуна ЕГЭ-рду тIайлану хьушиву Дагъусттаннай, Ингушнаву ва цаймигу регионнай. Ухссавнил Ккав­кказнавугу бюхъан тIий бур ЕГЭ-рду марцIну дулун. Дагъусттаннайнгу вания тихунмай ЕГЭ-туристал къазананссар», — увкуна Сергей Кравцовлул.
Совещаниялул жям дуллай, Республикалул БакIчинал цIунилгу дакIнийн бувтуна республикалий дан дакIнийсса давурттая, миккува учительнал кумаг бакъа ми мурадру чулийн буккан бан къахьунтIишивугу кIицI лаглай. «ХIакьину жулва хьхьичIсса яла агьаммур мурад бур учительнал, хIакиннал ва захIматкашнал кьимат лахъ баву. Школалий яла агьаммур дарснугу хьун аьркинссар захIматрал дарс, кулпатрал хъунмур вихшала – оьрчI захIмат ххирану вардиш аву. За кIулсса, конкурентшиву духIан бюхъайсса оьрчIру хъуни къабувссаксса жущава я Дагъус­ттан, я жулла аьмсса ватан – Аьрасат ччаннай бацIан бан къахьунтIиссар. Сергей Сергеевич жула республикалул тарихравун агьссар Дагъус­ттаннал марцIсса цIа зана дурсса инсан хIисаврай», — увкуна Рамазан АьбдуллатIиповлул.
Журналистурал суаллан жавабру дуллай, Сергей Кравцовлул кIицI лавгуна, Дагъусттаннай ба­къасса, щалва билаятрайва ттигу зийнма бушиву дагьайкунсса кIулшиву къадуллалисса вузру.
«Шинал хьхьичI Рамазан ХIа­жимурадовичлул тавакъю бувна жухь, республикалий зузисса вузру ва филиаллу ххал бувара, тIий. ЦIанасса чIумал 20 вузраща чIумуйнусса зерххуну дуссар лицензияртту, ми цин лархьхьусса даражалул кIулшиву дулуншиврул аьркинсса тIалавшиннарду биттур буллай бакъа тIий. Республикалий бур хьхьичIунсса вузругу, масалдаран Дагъусттаннал паччахIлугърал университет ва цаймигу паччахIлугърал вузру. Агарда, вузрал духьурча паччахIлугърал лицензия, буллай бухьурча паччахIлугърал дип­лом, му аьркинссар Аьрасатнал стандартирттацIун бавкьуну зун», — увкуна Сергей Кравцовлул.
Республикалул БакIчинал кIицI лавгуна Рособрнадзорданул ва Аьра­сатнал КIулшиву дулаврил министерствалул каялувчитал вузирдал системалуву низам дишавриха зун дакIний бушиву.
Ахирданий Сергей Кравцовлул дипломру буллуна республикалул ЦОИ-лул (Центр обработки информации) каялувчинан ва ЕГЭ-рду низамрай дуллуминнун ккалли хьусса республикалул 3 пунктрал каялувчинан: Хасавюртуллал, МахIачкъалаллал ва Лакрал райондалул.