Дагъусттаннал луттирду итабакьай идаралий бувккунни жула лакрал ва Да­гъусттаннал хьхьичIунсса аьлимчу, шаэр, чичу Абачара ХIусайнаевлул «Лакрал литературалул шачIантту» тIисса лу. Луттиравун цачIун дурну дур аьлимчунал личIи-личIисса шиннардий чирчусса лакрал литературалиясса макьалартту ва цаппара публицистикалул асарду.
Ва хIисав хъанай бур А. ХIусайнаевлун 90 шинал юбилейран цIа куну язи бувгьусса асардая сакин бувсса кIива томрал кIилчинмур луну.
ТIалав бара, буккияра жула ххаллилсса аьлимчунал ирсиравасса язисса ссайгъат-аманат!
«Адабиятрал лажиндарай» ришлай буру ва луттиравасса кIира макьалагу – жулла лакрал литературалул бакIщаращун хас дурну чирчусса.

Цалчин каних чивчусса лакрал халкьуннал балай

ДукIу, 1985 шинал, машгьурсса аьрабист МахIаммад-Сяид Сяидовлул: «Ва лакку мазрайсса зат бурча, ци бурив ххал бувача, ттисса алфавитрай чивчуну, ттухьхьунгу булала», — увкуна.
ЛухIи ларгсса чIапIив дусса хьхьичIа­заманнул луттираву кIира цанницIун ца ларчIсса чIапIул дянив, щил чивчуссарив, чивчуну бия зу цIана буккинтIисса балай. Цуппа лу дин-чаклиясса бия, цIагу, щил чивчуссаривгу кIул бан хьунсса куццуйгу бакъая. Му ссаясса ци лу бур куну, цIувххукун, нава цIана зухь кIицI бувссаннуяр ххишала Сяидовлулгу ттухь цичIав къабувсуна.
«АцIула, ва ляличIисса, дирикъаяйсса хъус канищагу дуккайссарча» куну, Сяидовлун чичлачимуния на ттунмагу копия бувссия. Сяидовлунгу, ттунмагу оьрус мазрайн таржумагу бувссия.
МахIаммад-Сяидгу дукIува ивкIунни, лу­ттиран хьумургу кIул бан къавхьунни. Му ялун личиннин ссавур дакъа, нагу лакрал халкьуннал хъус залунначIан диян дан пикри бав.
Балайлуя гъалгъа тIуннин, цал мунин цIа дизан багьлай бур. ЦIа дакъа назмулун цIану ганил цалчинсса хха ккалли байссар. Мунийн бувну жувагу жулва балайлийн «Эшкьири тIар ттун хьусса» чинну.
«Эшкьири тIар ттун хьусса» чивчуну бур 1750 шинаяр чIал бакъа. Цанчирча, ва балайлул маз 1734 шинал чивчусса «Ханнал мурад» тIисса луттирал мазнияр чансса хьхьичIавасса бур. «Эшкьири тIар ттун хьусса» тIисса ва балайлуву «са ххуйрика», «нацIурика» увкуну бур, амма гихунмай, цамур кIанай «вилгу гьунар бухьурча» тIий бур. «Ханнал мурадраву» чувчIав ча-лун кIанай ка увкуну бакъар. Мунил барашинна дуллай дур «Эшкьири тIар ттун хьуссаннул» маз «Ханнал мурадрал» мазнияр чансса хьхьичIавассагума бушиврул. Цуппагу кIива кIанттай «ххуйрика, нацIурика», ца кIанттай «бухьурча» тIутIаврил, маз баххана хъанай, ка-лия ча-лийн букIлай, бучIавай бивкIшиву чIалачIи буллай бур.
«Эшкьири тIар ттун хьуссаннуву» жунма хьунабакьлай бур: «ЦIуцIабу, ччабу, ччуччабай, вичIуба, бувчIабай (бивчIабай), ахъубун, хIаби, чIаба най, кIунтI укунди, хIатталдий». Совет хIукумат хьуннин лакку мазрай чивчуцири луттирдаву, документирттаву укун чивчуну бикIай. Хаснува Ккурккуллал Зайдул ва Замир Аьли Къаяевлул мазгу укунсса бур. Укунссар жула литературалул маз бивкIсса. Революция хьуну махъру жува «цIуцIаву», ччаву, ччуччавай, ичIува, бивчIавай, ахъувун, хIави, чIава най, кIунтI увкунни, хIатталлий» тIий, б-лун, кIанай в, д-лун кIанай н, л чичлан бивкIсса.
Ттунма кIулссаксса, цIана ца хъусращиял бакъа «бугьун бура», «хIатталдий бивхьсса» куну, махъ кутIа къабай. Циняв лакрал «бувгьуну, бивхьусса» куну, махъ биял бай. «Къабитай» куну, мукъул ахирданий р-гу хъусращиял цIанагу учай. Ванийн бувну, бюхъай, балай Хъусращасса инсанная хъусращиричунал чивчуну бикIангу.
Мазраясса ихтилат къуртал бан, «кашки» парс мазрай «бикIукьай, бивкIссания, хьуссания, щайссания» тIутIисса. Му махъ ишла баврил чивчуманан та мазрая хавар бивкIшиву, та цала заманнай чантI кусса инсан ивкIшиву кIул буллалиссар. Му ца мукъуйну бюхъай­ссар танал халкьуннал балайлул симан чансса даххана дурну дикIангу.
Аьмну лавсун, ванияр 250-300 шинал хьхьичIсса лакку маз уттиминнан бигьану бувчIайсса бур. Му чIумул манзилданий маз нитти-буттан букъавчIай хьуну бакъар.
«Эшкьири тIар ттун хьуссаннуву» шанна личIи-личIисса тема, шанма личIи-личIисса балай бур.
КIилчинмур балайлий бувагу мяйва хха бур. Ваниву цамур душ цама оьрчIахь, ххуйсса унугу, гьунар бакъасса ура тIий, яхIливун увтун, цуппа гужрай буцлаци ан ччай бур. Ихтилатгу гания гихунмай лахъи бувну бакъар.
Шамилчинмур балайлий бувагу мукьва хха бур. Мунивугу цамур душ, цинма хъинну къаччайнма, чил шяравун щар хъанахъаврия гъалгъа тIий бур.
Гьаннайсса, жулла хьхьичI шама личIи-личIисса инсаннал шанна личIи-личIисса хIалданийсса тагьар дур, муних бурувгун, миннал дакIния махъ бувксса куц (интонация) бур; шанма журану сакин бувсса (композиция) шанма личIи-личIисса балайлул жура бур.
Балайлуву ххалли-ххаллилсса лащан бавуртту, шаэрнал ярагъ бур. Амма, на «бургъил кIунтIайтIи дурсса чIаба найрал шаннияр кIунтI кусса дакI» личIаннин, ялами жунна къакIулсса дакъар. Амма вай ххуйшивуртту жучIанма бивми халкьуннал балайрдаву дикIай цайми мукъурттицIун даркьуну, масала:

Эшкьири тIар ттун хьусса,
БацIанни тIар къашайсса…

Бюхттулний къатри дури –
Къабуччара вил ччаврил…

Укунсса хьунабакьавурттал халкьуннал балайрдал кьимат лагь къабуллалиссар: цIуссаннуву бухмигу хьунабакьлакьаву халкьуннал балайрдал законни. «Эшкьири тIар ттун хьуссаннуву» жучIава хIакьину бусса затру хьунабакьлакьаврил жула балайрду цуксса хьхьичIавасса буссарив бусласиссар.
Ва балайлуву пасихIшиврул даража лахъшиврул, махъру багьайкун бювчIан бувну, къалиправу бакьин баврил лакрал халкьуннал балайрду цимирагу ттуршра шинал хьхьичIвагу бивкIшиву чIалачIи буллалиссар.
«Эшкьири тIар ттун хьусса» чагъарданий цалчин чивчусса лакрал халкьуннал балайри.
Вай гьарца зат агьамшиву дусса, лаласунсса затрур.

Эшкьири тIар ттун хьусса

Эшкьири тIар ттун хьусса –
Хьуну дури цIуцIабу,
Ччабури тIар ттун хьусса –
Бугьун бура дардирдал.
Эшкьи къавхьусса рашав,
Къалахъарча бюхттулнин.
Къавхьусса рашав ччабу,
Къабизарча бургъилун.
Бюхттуннин чIалъаь бура*
Бургъил ччуччабай бура.
ВичIуба кьулла бури –
Мякьлил бувчIабай бура*.
Са* ххуйрика* вил яру.
Ахъубун* тIутIинияр,
НацIурика вил дакI ттун,
ЯтIул кIяла гьичнияр.
Мурчал хъюлчутIи бувсса
Шан шинал хIабинияр,
ХъюлчутIи бувну бура
Лавмартнахсса дардирдал.
Бургъил кIунтIайтIи дурсса
ЧIаба найрал шаннияр,
КIунтI укунди дикIул дакI –
Улу тти игьа лагу!
Барт щарния буккайсса
ТIиму мусил оьрчI къиргъу,
ТIиму мусил банава*,
Гьунар бакъасса бури.
Гьунар бусса къиргъулул
Къуру ххюнчIа къабитайр,
Вилгу гьунар бухьурча,
Нагу ххассар мабара.
Барт щарния буккаяр,
Кашки бивкIусса хьурдай.
Ух шярава лагаяр,
ХIатталлий бивхьсса хьурдай.

Таммат*

БувчIин бавуртту

*Ца кIанттай «бюхттуннин», ца кIанттай «бюхттулнин» тIий чивчуну бур. «Бури» къачивчуну, «бура» тIий бур.
*«БивчIабай» тIий бикIан аьркинсса кIанайгу «бувчIабай» тIий бур.
*«Са – ца. Сад тIисса аьраб хIарпирайхчIин чивчуну бур. Та заманнай я «са» учайхьун­ссия, ягу укун чивчуну, «ца» учайхьунссия.
*Ххуйрика, нацIурика – ххуйрича, нацIурича.
*«Ахъубу тIутIинияр» бикIан багьайссия, чивчуну бур «ахъубун тIутIинияр».
*Чивчуну «тIиму мусил бунува» бакъарча, «тIиму мусил банава» бур.
*Таммат – къурталссар (аьраб мазрай).
«ХIикаят – ул завжани» ва мунил агьамшиву

Нава аьйкьлай акъахьурча, 1960 шинал «Оьмар ва Аьишат» чивчусса лакрал чичу МахIаммад-Хан Пашаевлул бувсуна ттухь, ванияр шантту-мукьттуршра шинал хьхьичIва лакку мазрай чивчусса ца хавар бур цачIа куну. ЦIухху-бусулухун агьувкун, хъунбакъасса лухIи лавгсса чагъардал жуж ккаккан бувна. Амма буккин къабуллуна. «Дусшивулий» бищунну тIий, ганахь хIадур бува увкуссия. Лавсун увкIуна цIана зу буккинтIисса куццуй.
Яла га циван пашман хьуссияв, ссайн ягу щийн къаччан бивкIссияв, цала за махъунмай лавсуна. МахIаммад-Хан ивкIуну махъ ва хавар бусса лугу, машинкалий бивщусса цалчинмур экземпляргу щичIан, чун багьссарив къакIулли, бахттиран, кIилчинмур экземпляр «Дусшиву» альманахрал архивраву бакIрайн багьну бур.
ХIисаврах бургарча, хаварданун цIа «ХIикаят ул-завжани» — лас-щарнил хавар, лас-щарниясса бусала диркIун дур, цанчирча, Пашаев МахIаммад-Ханнал цал мукун дусса куццуй аьрабрайгу риртун, яла лиххан дурну, «Ласнал ва щарнил хаварди ва» куну, лакку мазрайн дурцуну дур.
Хаварданул махъва-махъгу тIий бур: «Ва хавар чивчуну бур цамур бухсса луттираяту Юсуп тIисса адиминал 1285 шинал (1885 году)». Я бухмур луттиран цIа, я Юсуп часса цу ивкIссарив Пашаевлул кIицI бувну бакъар.
Хавардануву «савдажар» кусса махъ цалчин хьунабакьлай бия цила миналий, Ираннай, учайсса куццуй «савдагар» тIий. Гания гихунмай МахIаммад-Ханнал г-лия ж бувну, гьар кIанай «савдажар» тIий бур. Ку кIанттурдай «укуну, буллунни» тIий бур. Вай гъалатIру МахIаммад-Ханналлив, Юсуплуллив, юхссагу танаяр хьхьичIманаллив бусан захIматри.
Мазрах бурувгун, «ХIикаят ул-завжани» 1750 шинаяр хьхьичI чивчусса бакъар, цанчирча, 1726-1727 шинал та чIумал дурккуну Убурдал МахIаммадлул цала щарссанийн чивчусса чагъарданул маз ванилссаннуяр мадара личIисса бур. Таний бия укунсса махъру: «На акъахьурчагу, къатлул буруккин бан шайссар вища, бугу байссари гьар симурса». «ХIикаят ул-завжанилулмур» маз бур хIакьину жува гъалгъа тIутIимуничIан хъинну гъансса.
Ча хьусса ци хаварди ва?
1959 шинал Москавлив оьрус мазрай бивщусса «Азаллий цара хьхьу» тIисса аьрабнал хавардал 5-чинмур луттирал 82-86-чинми лажинтирттай бур Шагьра-задал мукьттуршлий ряхцIаллий ряхку хьхьуну бувсъсса «ТIайласса щарссаниясса хавар». Таниву бур жула «Лас-щарнил хаварданул» бутIраха лавхьхьусса тамансса кIанттурду. Амма вай кIивагу хавар бакIрая ччаннайн бияннин ца бур учин къабюхълай бур.
Мукссара лащин дур Айбике Гъаниевал бавтIсса магьравасса «КIия уссу» тIисса лазгиял магьлулгу.
1964 шинал Хъусрахь МихIрав ПянтIурав тIисса къужлулгу, гьашину июнь зуруй Буйнакскалий ЧIурттащатусса хъинну чантI кусса хьхьичIазаманнул дурккучу, 1896 шинал увсса, Сайпуллагь Халиловлулгу бувсуна хъис личIи бакъасса «ХIикаят-ул-завжани». Амма я МихIравл, я Сайпуллагьлул ХIаврал цIа кIицI къадуруна.
Гьашину июльданул 5-нний, МахIач­къалалив яхъанахъисса, кIава ЧIурттащатусса, дуниялгу ккарксса къалайчи, 1906 шинал увсса ХIусманхъал Мусал арс Оьзайпатлул увкунни: «Жул шяраву уссия ХIасайхъал ЩайхмахIаммад тIисса дурккучу – цIанасса профессор Хасаев АхIмадлул ппу. КIаначIа бикIайва хьхьичIазаманнайва турк мазрай чивчусса «АхIмадие» тIисса лу. КIаний бия му ХIавра тIисса щарссаниясса хавар. Оьзай­патлул му кьисса биялну бугу-бувсунни. «АхIмадие» ттуща лякъин къавхьунни.
Вай гьарца зат кунничIа ку бивхьукун, на укIлай ура укунсса пикрилийн. «ТIайласса щарссаниясса хаварданулгу», жуламунил аьрабрайсса цIанилгу, мунивусса «арх хьу ттуяту, я малъоьн» кусса аьраб калималулгу барашинна дуллай дур «Лас-щарниясса бусалалул» бакIщаращи ттигу жучIанма биян бувасса аьрабрайсса хавар бивкIшиву.
Ча бувкIсса ци бухьурчагу, лакку мазрай халкьуннавун ххуллу ларсун бур, лакку мазрал ва лакку литературалул памятник хьуну бур. Ва хъинну агьамшиву дусса затри.
Циванни «ХIикаят ул-завжани» лакку хьусса, мунивусса ссайри халкьуннал дакI дакьлай диркIсса?
Щарсса адиминаяр гьар чулуха кьюркьу­ссар, кьадарссар тIисса бусурман диндалул пик­ри хъисгу къатIайлашиву пасихIну чIалачIи бувну бур ва хавардануву. ХIавра лавмартсса, зуна бан ччисса цила ласнауссияргу, лагътураяргу, жамичитураяргу, улу, алвагьсса цила ласнаяргу цимилгу узданни. Кьадарсса арамтурал ци макрурду, ци къия дулларчагу, ХIавра ласнайн хаин дан къархьунни, мунил яхI къагъавгъунни. Мунил тIайлашиву савав хьуну, жяматраща му чарттах дирчIан къархьунни. Хьхьирий жамичитал муний къия дан нанийни, оьсса марч бишлай, мунихун бахчилачаву кьариртукун, тIабиаьт цурдара, Аллагь цувава тIайласса ХIавралухссар учин ччай ур хавар чивчума.
ХIавран, чувнан кунма, янна-ярагъгу бавхIуну, чай буртти дикIангу кIулли. Вай гьарца затраяргу ххишала, ХIавра даража лавайсса аькьлукар, паччахIлугъ тадбирданий дачин дан шайсса бажарданул заллу дур. Куннайн ку биллалисса ил ганил дакьил бувну, нахIу бунни, цалащан бунни. Цила бавцIукун, цинма оьбала бувми, гиккува аьс бан къабивтун, тахсирданун лавхьхьуну, минналсса зула кIанттай зула аьдатрай бувара тIий дур га.
Лахьхьияра, лакку хъамий, кьини дурккукун, му чувшиврий лахъан – вана таржумачинангу, лакрал буккултрангу ххуй дирзсса хаварданул мяъна.
Щарсса ласнайн хаин къашаврицIун, ХIавра зуна буллай ляркъуну, чарттах дирчIарду куну уссил увкукун, ганил ласгу мунийн вих къавхьунни, «ттул щарсса тIуллал яла ххуймур дуя» увкунни. Дивандалий паччахIсса щарссанил вилмур щарсса цукунсса дия куну цIувххукун, зуна бувну тIий чарттах диркIусса щарссанил ласнал ганил сипат дакI мяшсса дурунни: «Валлагь, ттул щарссанил сурат муна му вил сурат дия, личIи дакъасса. Ганил чувшивугу вил чувшиврун лархьхьусса дия, личIи дакъа». Цайми мукъурттийну учин, ттул щарсса паччахIну дитан лайкьсса щарсса дуссия увкунни. Ги­ккува, дивандалийва, цаннан ца бувчIукун, «кIиягу аьтIун бивкIри дянивсса эшкьилул цIакьшиврул».
Ласнал ва щарнил ара ххуйшиву, марцIшиву, цаннал кьадру цаннан бикIаву, миннал ччаву цIакьшиву – хъунмасса талихIри. Вана хаварданул кIилчинсса хъунмур мяъна.
ХIаврал бакIрал ххуйшиву хавардануву дахьра, ялттура кIицI дурну дур, хавар цу­ппамур щалва ганил аькьлу-кIулшилия, ганил виваллил дунияллул гьарташиврия, хъуншиврия бур. ХIаврал цинма язи бувгьумур хъамитайпагу мукунма личIлулсса бур. Ганин ХIавра щарссашиву, ганил бакIран чIявусса ккавкшиву хъютI бакъашиврийну, угьру бигьлагьаврийну кIул хьунни. Ва, хъинну хъирив авцIуну, зат лаласун шайсса инсаннал гьунарди.
Гьаннайсса, «ХIикаят ул-завжани» агьали цIансса, хъамитайпа кьювкьусса заманнай, ми лавай буллалисса, миннахь ва миннал ласурваврахь алвагьсса дарс дихьлахьисса хавар бур. Мунин кьиматгу лавайну къабищун къабучIир.
Гьай-гьай, хавардануву, ттизаманнул чичултрал произведениярттаву кунма, иширал тагьар гьарта-гьарзану, инсантурал хасиятру диялну, чIун наниссаксса, бакIрачIан букIлакIимуних бурувгун, даххана хъанай, ккаккан дурну дакъар. Хавардануву инсантурал цIардугума ца ХIавралсса дакъа дакъар. Му танийсса аьйбри тIий бувчIлангу аьркин бакъар. Му бур та чIумалсса литературалул даража. Мукун бунугу, «Лас-щарниясса бусала» жунма хIаз бизлай бур, цанчирча тIутIимур кутIану, аьщуйн щуну, гъалгъа тIутIими цума цукунссарив чIалачIи увну, увкуну бур, ишру анаварну, хIаз бизанну хъанай бур. «ХIикаят ул-завжани» лакрал ккалай бивкIсса, миннал культура гьаз дуллай бивкIсса, ттигу пахрулий ккалантIисса хаварди.

ХIикаят ул-завжани

Ласнал ва щарнил хаварди ва

ХьхьичIсса замандалуву уя ца савдагар. КIаналгу дуя щарсса, цинийн учайсса ХIавра. Цув дуя хъандил яла ххуймур. Савдагарналгу уя уссу. Тажир лавгри савдалий*. Цалва къатлуву кьариртун цалда щарсса. Цала уссугу. Замана лавгукун, тажирнал уссил увкури савдагарсса уссил щарссанихь: ина ттуйн мютIий хьу, на вищал махсара банда увкури. Яла щарссанил увкури: «На Аллагьнаяту нигьа дусара ттула ласнал хIурмат кьабитаврийну. Ялагу нигьа дусара Аллагьнал аькьубалияту». Яла га ласнауссун сси бивзуна, цанба ччимур ганил къабувкун.
Яла ганал мукьа адиминан ттурш-ттуршва шагьи дулдури, зу барашинда дувара ва ттул уссил щарссанил зуна бувшиврил куну. Яла гайндал барашинда дурди ганил зуна бувшиврийча, га диркIури чарттал.
Чарттавун гагу дахьлаган дурну, зана бивкIукун, ца адимина увкIри. Ца кIяласса зад чIалан диркIри чарттал лувату. Яла ганал, чартту гьаз бувну, урувгри, ва цирибав куну. ДикъаркIунна ляркъури га щарсса.
Яла га адиминал увкури: «Ци хатIалийнура ина вай чарттавун дахьлаган дурсса?» — увкуну. Яла ганил бувсри, цила ласнауссил дурунди ва даву ттун, цалва тIимур на къабувкун укуну. Яла му адиминал увкури: «Нану ттущал архIал, на я данда ина, напакьагу булдуну, яндагу дуну», — укунуча, дирзун ларгри ганащал архIал. Ганал ядуллан ивкIри цинна ччийкун.
Ца замана лавгукун, га адиминачIасса лагънал увкури гава цила ласнауссил увкумур. Ганан ччимургу къабуври. Гава ласнауссихь укумур укури. Яла га лагънан сси бивзри. Га лагънал залундал-савдагарнал ца арс ия цама акъасса. Лагънал, ивххун га оьрчI, оьттул гъулугъуну дунура, га чIила щарссанил бакIралу дирхьури, цала залундан га душман хьун. Яла, га оьрчIгу ивххун лявкъуну, чIилагу га щарссанил бакIралу оьттул гъулургъуну ляркъукун, га адиминал увкури: «Ва ттул арс цан иххав?» — куну. Ганил хъа буври: «На къаиххав, мунил тахсир ттуй бакъассар?» — укуну. Яла га адиминал укури: «Ина ттучIату насу», — увкуну. Ца ттуршва шагьигу булдуну дукралун, ганачIату ларгри.
Ца кIанай лявхъри чIявусса цуркинт, муххал щинзирдавун бивчуну, амма, ттуршва шагьи булдуну акъа итакъаакьайва. Ттурш-ттуршва шагьи булдуну циняв итабавкьуну бия, ца мискиннал оьрчI личIаннин. Ганал тIурча, шагьирттугу бакъая, итагу къаакьайва. Ялу ттуршвагу шагьий булдуну*, ХIавралул га итххяххан увна, мув щарссанин кIа савдагарнал буллусса шагьиртту.
Щарсса цила ххуллийх ларгуна. Яла га мискиннал увкуна: «Ва ттуй цIими бивхьуну, на итххяххан увма цури? Ттул цIаний чIярусса арцу дулдуну?». Арамтуралгу увкури: «Ца щарсса дуркIун ва кIанайн, жу вил мискиншив бувсукун, ганил арцу дулдуну, итаакьин увунда», — укуну.
Яла ганил хъирив лавгун, укури: «Ина цирикьай ттуй цIими бивхьуну, ттухлу арцу дулдусса?»* куну. «Нари дулдусса», увкури. Га хIалундий* эшкьи хьури. Ганал ганихь увкури: «На тIимур бува», увкуну. «Арх хьу ттуяту, я малъоьн!»* — увкури. Яла миндал дянив дяъви багьри. Ялун ца адимина увкри. «Зул дяъви цири?» — увкури. «Ва ттул ссурмухьхьури, ттун ва даххан ччай бур – ва мютIий хъанай дакъар», — кури.
Яла му адиминал увкури: «Вила залундайн мютIий хьу», — куну. МютIий дурну дурцуну му ца жамичийнан дарххури чIярусса хъуслих. Жамичий лавгри, архIал щарссагу дурцуну. Жамийлувун увхри, жамичийнал кьаст дурди ганицIун лачIун. Мунал кьас дуркун, ца оьсса марч бивщури. Га жами бюкьлан бавчури. Яла мунал тавба дурди. Марч паракьат хьуну, жами нан бивкIри.
Яла, жами кьирийн гъан хьувкун, цамагу жамичийнал кьас дурди мунищал махсартту буллан. Ялагу бивщури цIакьсса ца оьсса марч. Жами ппив хьури. Арамталгу личIи-личIий хьури, хъусгу бат хьури. ХIаврагу уттарану кьирийн дуркри.
Мув кIанугу бивкIун бия чIявуну марч бищайсса, жамирду бюкьайсса. Миккунгу дирчуну дия мурчал ва щатIал чIявусса а-тарду, янна.
Яла ХIавралул цихьва цила пикри буври, валлагьи, уттигу вай хъаннил янналущал духьурча, нара къадитантIий дура, куну. Хъинсса арамтурал яннагу ляркъури, ярагъгу лявкъури. Миккува, залду аьйкьуну кьирийн бувксса кIилданущалсса чугу лявкъури. Арамтурал хъинсса яннагу ларххун, ярагъгу бавхIуну, буртти диркIун ххаллилсса чайгу, къуццу тIий дарчури. Ца шагьрулийн дирди. Га шагьрулул агьали паччахI увчIин къахъанай, кундащал ку билдай, талай лявхъри. ХIавра анаварну биллайми букьан булдан бивкIри. Яла га шагьрулул хъуни арамтурал тIун бивкIри, ва адимина жула паччахI уван хъинни тIий.
Мунияту паччахI хьури. Тахлийгу щядиркIри, паччахIшиврул тажгу бивхьури. Биллай бивкIсса инсанталгу нахIу буври.
Га шагьрулул ччянирасса аьдат дия, бавтIун буми хъами, паччахIначIан лавгун, винма ччимур ихтияр бува,* куну учай­сса. Му аьдатрай, буми шагьрулул хъами паччахIначIан лавгуна, жуяту винма ччимур ихтияр бува, увкуна. Мунилгу ихтияр бувна ца сахIибулхайргу дусса жагьилсса щарсса*. Му дия кIулшилул ва тадбирданул залду.
ДуркIуна му щарсса паччахIсса ХIавра­лучIан, щябивкIуна. Яла ХIавралул бувсуна, на щарссара, куну. Цила кьиссагу* бакIрая ччандайн бияндин мунихь бувсуна. Мунилгу увкуна: «Ттун ина хъамитайпа бушиву бувчIуна вил ссурссулий кьанслу бакъашиврийну. Дардру ккурхIушивгу бувчIуна вил дакIнивату найсса* угьирдайну».
Яла му хъамитайпалухьхьун дуллуна паччахIсса ХIавралул аьдлу-дивандал ихтиярду.
Цаппара заманнавату цала машал базардавату зана ивкIун, шавай увкIуна ХIавралул лас. ИчIура щарсса къаляркъуна. ЦIувххуна цала уссихь: «Ттул щарсса цидурди?» — куну. Яла уссил увкури: «Ина базардайх лавгукун, зуна буллай ляркъуну, чарттах дирчIарду», — куну.
Яла га савдагарнал увкури: «Ттул щарсса тIуллал яла ххуймур дуя. Му мукъуйн на вих акъара», — куну. Яла уссил, аьтIунгу ивкIун, увкури, валлагь, ва ттул махъ тIайлассар, ина ттуйн вих хьу, куну. Яла савдагар мунайн вих хьури.
Муния махъ, хъунма хIал къавхьуну, вилаятрал паччахIнаяту чапар увкIри савдагарначIан, цала чIивима уссугу увцуну, паччахIначIан дивандалийн нану тIий. Лавгри.
Микку паччахIнал – ХIавралул, ласгу чулий ацIан увну, цIувххури мунал чIивима уссихь: «Ина тахсир бакъасса вила уссил щарсса циван дирчIав?» — куну. Къабуслан ивкIри. Бусан уври. Увкури: «Ттула уссу савдалий лавгукун, на учав уссил щарссанихь: «Ина ттун ччимур бува», куну. Мунил увкуна, валлагь, ласнал хIурмат кьабитаврияту нигьа дусара, Аллагьнал аьзавраятугу, Аллагьнал аькьувалиятугу нигьа дусара, куну. Ттун сси бивзуна. На булав мукьа адиминан ца-цаннан ттурш-ттуршва шагьиртту, зу барашинна дувара, ва зуна буллай ляркъунни, увкуну. Яла миннал барашинна дуркун, жу му чарттах дирчIарду», — куну.
Микку савдагарсса уссил увккун увкури: «Ина ттул душман ивкIун ура, утти на ина ивчIанна», — куну.
Диван буллайсса паччахIсса щарссанил увкури: «МаивчIара жул кIанай, вила кIанттай ивчIан ацIу», — куну. КъаивкIури.
Утти паччахIнал хъун дивандалийн бучIан буври ХIавра чарттал ххуллува буккан бувсса адиминагу, мунал лагъгу. Заллугу чIарав ацIан увну, цIуххури лагънахь. «Ина вила залуннал чIивисса оьрчI циван ивчIав?» — укуну. Къабуслан ивкIри – къабювхъуну, бувсри. Яла лагънал увкури: «ДуркIри ттул залуннал ичIуннай ца бакIрал ххуйсса щарсса. На учав мунихь: «На тIимур бува», — куну – къабурди. Ттун сси бивзри. Яла на иххав залуннал арс. Оьттул дурцIуну дунува, чIила на дишав га щарссанил бакIралу», — куну.
Яла га арс ивкIусса буттал увкури: «На душмантурах дулду дунияллийх луглай – ттул оьрчIал душман ттула ичIува ивкIун ур. На му шикку икъавкIуну къаикIанда», — куну. Яла паччахIсса щарссанил увкури: «Ина ва жул билаятрай маивчIарача, зула кIанай, зула аьдатрай ччимур бара», — куну.
Яла учIан уври хъун дивандалийн та жамичинан ХIавра бавххусса оьрчI-жагьил. Дуллан бивкIри мунахь цIухху-руххурду. Бувсри цимурца. Укури: «На ияв, цурк бувну тIий, щинзирданий авхIуну, дуснакьравун авкьуну. Ца щарсса дуркIун, ттуршва шагьи булдуну, на итаакьин увра. Ттун къакIула нава итаакьин увма цуяв. Яла на цIуххав, ва ттуй цIими бивхьусса инсан цуя, куну. Арамтурал увкуна, ца щарсса дуркIун, ттуршва шагьигу булдуну, итаакьин унна ина, куну. Ци дуври учав мув щарсса. Бувсуна. Учав, хъирив лавгун, ва хъинбала ттун бувсса инаяв. Ная, укуна. Ттун та ччан диркIуна. На учав на тIимур бува, куну. Ина арх хьу ттуяту, я малъоьн увкуна. Яла танилгу ттулгу дяъви багьуна. На лачIлан ивкIра. Ялун ххуллулсса бувккуна. Миннал увкуна, зул дяъвирду цири, увкуну. Яла на учав, ва ттул ссурмухьхьур. Ттун ва даххан дакIнин багьуна. Ванил кьамул къабуллай дур. Яла ми ххуллулссаннал увкуна, ссурмухьхьу залуннайн мютIи хьун аьркинссар, куну. Яла на та, дурцуну базаллувн, даххав ца жамичинан, чIярусса хъуслих». Ми дивандалий бувсса ихтилатрах вичIилий бивкIсса паччахIсса ХIавра, диван къуртал хьувкун, савдагарначIанмай хьуну, мунахь цIувххури: «Да, адиминай, вил щарсса ххуйсса дуссаяв, оьккисса дуссаяв? Чувшив дусса дуссияв, дакъасса дуссияв?» — куну. Яла мунал увкури: «Валлагь, ттул щарссанил суврат муна ва вил суврат дия, личIий дакъасса. Ганил чувшивгу вил чувшиврун лархьхьусса дия, личIий дакъа».
Яла щарссанил увкури: «На вил щарссара», — куну. Амма вил уссил ттуй хъунмасса бухьттан бивхьунди. Миннул цинявппагу утти вил хьхьичI загьир хьунди, ттул тIайлашивугу, ттун ккавкцири затругу вин загьир хьунни», — куну.
Яла микку кIиягу аьтIун бивкIри дянивсса эшкьилул цIакьшиврул. Хъунмасса хIалундий аьтIийгу бивкIун, яла лавгри цалва ичIунмай.
Ца чансса замана лавгун махъ, суждалий дунура хIал бивну, дунияллияту ларгри. ХIайранну аьтIий, ласгу махъ ливчIри. ЧIал къавхьуну, щарссанил хъирив мувгу лавгри.
Ва хавар чивчуну бур цамур бухсса лу­ттираяту Юсуп тIисса адиминал 1285 шинал (1885)*.

БувчIин бавуртту

* Тажир савдалий лавгри – машачи цала машай, дахху-ласу дан лавгуна.
* Ялу ттуршвагу шагьи булдуну – яла ттуршвагу шагьий буллуну бухьунссар.
* Ина цирикьай… ттухлу арцу дуллусса – инаривкьай ттухлу арцу дуллусса?
* Га хIалундай эшкьи хьури – гацIана эшкьи хьуна.
* Малъоьн – лаънатралун-нааьнаралун багьмур. ЩяйтIаннуйнни тIутIисса.
* Винма ччимур ихтияр бува – винма ччимур бувчIа, яла бугьи, язи бугьи.
* СахIиб ул-хайргу дусса жагьилсса щарсса – ккаккан цIу бусса.
* Цила кьисса — цинма хьумур, бакIрачIан бувкIмур, циявасса хавар, бусала.
* Ссурссулийсса кьанслу – хъютI.
* Вай махъва-махъсса кIива хха цала МахIаммад-Хан Пашаевлул махърур.