Зайнуттиннул арс Аьбдуллаев Шамил
Август зурул 28-нний, зий-занай унува, хар-хавар бакъа, чIун дакъасса бивкIулул жуятува личIи унни хIакьсса зунтталчу, Инишатусса Зайнуттиннул ва Хъурхърал шяраватусса Гуржигьаннул арс, 52 шинавусса Аьбдуллаев Шамил. БухIин, ласун захIматсса, нязанний жуятува личIи хьусса Шамиллул бивкIулул ццах увкуну, микIлачIун бунну.
Ванал бивкIулул кьурчIишиву кIидачIлай, жижара буллай буру ххирасса арснацIа, ишин-итан кIану бакъасса уссицIа, дакI тIайласса дуснацIа хьусса щалвагу кулпатрахь, уссурссуннахь, гъан-маччаминнахь.
Я Раппий, Шамиллун къабуллумур оьрмулул бутIа мунал наслулун ххи бувну лякъиннав, Алжаннул ххари аннав.
Инишиял, Хъурхърал,
Ххутрал жямат
—————————————————
ЗАХАРДУЛ АРС ШАКУЕВ СУЛАЙМАН
Мадарасса хIаллай шаний къашавайгу ивкIун, уттигъанну аьпалул хьунни цалва оьрму махъа нанисса никиран кIулшиву ва тарбия дулаврин хас бувсса ххаллилсса педагог, хIурмат бусса хъуначу Шакуев Сулайман Захардул арс.
Сулайман увссар 1928 шинал Шахьуйннал шяраву Захардул ва Ханичал кулпатраву. Цал буттал шяраву, яла КIундиннал школалий дуклай ивкIссар. Увхссар Гъумучиял педучилищалувун. Амма 1-мур курс къуртал бувну махъ, му кьабитан багьну бур, ичIаллил захIматшивруцIун бавхIуну. Муния махъ почтрай телефонистну зун ивкIун ур, азбука Морзегу лавхьхьуну. ВицIхъав телефонистну зий 2 шин дурну дур.
Шяраваллил оьрчIавух Сулайманнулгу биялсса захIмат бивхьуссар Буттал КIанттул цIанийсса Хъунмасса дяъвилул шиннардий.
Махъ увхссар Дарбантуллал педучилищалувун, 1951 шинал мугу къуртал бувну, зун ивкIссар ХьурукIуннал шяраву дарсру дихьлай. Мукуна зий ивкIссар КIундиннал, Карашрал, цала буттал шяраваллил Шахьуйннал, ГьунчIукьатIрал школардай. Махъ, Гъумук УО-рал медоткабинетравугу зий, Гъумучиял дянивмур даражалул школалий оьрус мазрал ва литературалул дарсругу дихьлай ивкIссар.
Сулайман 1968 шинала лайкь хьуну ур «Заслуженный учитель РД» тIисса бусравсса цIанин.
Муния махъгу, цIуллу-сагъшиврул хIал хьхьара хьуннин, цикссагу шиннардий зий ивкIссар Гъумучиял дянивмур даражалул школданий. Пенсиялийн увккун, даву кьадитан хьхьичIсса шинну гьан дурссар Гъумучиял лицейраву дарсру дихьлай.
Сулайманнул дарсру дирхьусса оьрчIру бур дунияллий ппив хьуну, личIи-личIисса къуллугъирттай, давурттай зий. Чув ухьурчагу, зузисса коллективраву, лагма-ялттуминнаву хIурмат, бусрав бия Сулайман Захаровичлул. Ва ия захIматрал ва Буттал КIанттул цIанийсса Хъунмасса дяъвилул ветеран.
Лавгунни хъуначу, га заманалул бусравсса учительтуравасса ца. Сулайман Захаровичлул бивкIулул кьурчIишиву кIидачIлай, жижара буллай буру ванал кулпатрахь Зояхь, уссихь МахIаммадлухь, душварахь, куявтурахь, миннал наслулухь, махъсса цинявппагу гъан-маччанахь, щалвавагу агьлу-авладрахь. Ванал барачат махъ ливчIун лякъиннав, рухI бигьаний, чурх кIукIлуний бишиннав, пирдавс-алжан нясив баннав.
Шахьуйннал, Гъумучиял
жямат
———————————————
ула даврил уртакь, жунма ххирасса ва бусравсса учительница Къараева Галина Къараевнахь, ванил аьзизсса арс, жул школалул выпускник
Аьбдуллаев Шамил Зайнуттиннул арс
чIун дакъасса бивкIулул жуятува личIи аврийн бувну. Ва хъуннасса кьурчIишиву духIансса ссавургу, цIуллушивугу Аллагьнал вихьхьун дулуннав. Махънал оьрмурдай барачат бишиннав, цал бунагьирттал аьпа баннав, рухI хъинний дишиннав.
МахIачкъалаллал 34-мур школалул коллектив
———————————————
Хъуннасса кьурчIишиву кIидачIлай, жижара буллай буру жущала архIал дуклай бивкIсса Хъурхъиятусса Къараева Гуржигьаннухь, ванил ххирасса арс
Аьбдуллаев Шамил
аьпалухьхьун лагаврийн бувну.
Ва хIасратсса бивкIулул къюву духIансса рухсат Аллагьнал вихьхьун дулуннав.
Цал гьав нурданул дуцIиннав. Махъминнал оьрмурдай барачат бишиннав.
АрхIал дуклай бивкIми
———————————————
ДакIнийхтуну хъуннасса кьурчIишиву кIидачIлай, жижара буллай буру кказитрал дакI тIайласса букку бушивруцIун, жулва редациялулгу дус-ихтивар, ччя-ччяни жула аьлтту буккан бучIайсса Къараева Гуржигьаннухь, ванил аьзизсса арс
Шамил
оьрмулул аргъираву жуятува батIул аврийн бувну. Яраппий, царагу ниттин къаккакканнав арснал бивкIу.
Ва кIусса кьурчIишиву духIан вихьхьун ссавур Аллагьнал дулуннав. Арснан къабуллумур оьрмулул бутIа муная бивзминнан буллуну лякъиннав.
«Илчи» кказитрал коллектив
————————————————-
ДакIнийхтуну хъуннасса кьурчIишиву кIидачIлай, жижара буллай буру Чалабова Мариян Ибрагьимовнахь, ванил аьзизсса уссу
Низами
чIун дакъасса бивкIулул жуятува личIи аврийн бувну.
Ва кьурчIишиву духIансса ссавур вихьхьунгу, вилцириннахьхьунгу Заннал дулуннав.
Барачат махъ ливчIун лякъиннав.
Низамил рухI хъинний дишиннав, Алжаннул ххари аннав!
Лакрал райондалул ва Гъумучиял шяраваллил
администрациярттал зузалт
—————————————————
ДакIнийхтунусса кьурчIишивугу кIидачIлай, жижара буллай буру жула учитель
Шакуев Сулайман Захарович
аьпалул шаврийн бувну ванал кулпатрахь, уссихь, душварахь, махъсса цинявппагу гъан-маччаминнахь. Махъминнал оьрмурдай барачат бишиннав, цIуллушиву дулуннав цинявннахьхьуннагу. Сулайман Захаровичлул аьпа ванал дарс дирхьуминначIа уттаванассар.
Гъумучиял школалий дуклай бивкIсса оьрчIру, душру
