Дагъусттан Республикалул шяраваллил хозяйство уттизаманнул техника ва технологияртту ишла даврийну хьхьичIуннай даву мурадрайсса приоритет программалул лагрулуву «Дагагрокомплекс» ООО –лул
2013-шинал бувну буссия италиянал «Fenco» компаниялул оборудованиялул щаллу бувсса томатру дувайсса завод.

Ва заводраща кьинилун 600 тонна помидордаясса продукция итадакьин бюхъайсса бур. Жула республикалий ва хъанай бур ца сезондалий 8000-лийсса тоннарду томатрал итадакьин бюхъайсса заводну. Заводрал баян буллай бур дагъусттаннал шяраваллил хозяйствалуха зузиминная томатрал бакIлахъия кьамул дуллалишиву. Ва завод тIитIаврийну шяраваллил хозяйствалуха зузиминнан хъуннасса куклушинна хъанай дур.
«Дагагрокомплекс» ООО-лул иширайну дачин дурсса ва инвестициялул проект хIакьинусса кьини Ухссавнил Ккавкказнаву ца яла хъуннамурну ккаллину дур. Ва проектрал лагрулуву дурну дур буниялагу чIярусса давурттив: машан ларсун дур 202 уттизаманнул техника, 15-хъул шиннардий ка къаларну диркIсса 6000-хъул гектар аьрщарал хIадур дурну дур шяраваллил хозяйствардай ишла дуллан, дакьин дурну, цIудуккан дурну дур Къизлардал ва Тарумовкаллал райондалийсса 185,5 километралийхсса хъуруннайн щин дишайсса система, машан ларсун дур хъуруннайн щин дишайсса 25-хъул система. Му бакъассагу, бувну бур «Дагагрокомплекс» ООО-лул зузалтран­сса аьркинсса оргтехникалул ва кьай-кьуйлул щаллу бувсса гостиница.
ЧIал къавхьуну, бувну къуртал бавай бур Тарумовкаллал шяравусса 6 гектар аьрщарайх­сса теплица. ХIадурну бур му къуртал байхту ахънилссаннул гьаннарду бувгьуну, ми гьарта-гьарза буван. Мукунма дайдирхьуну дур 60-нния лирчусса тоннарду ахънилссаннул ядуван бюхъайсса къатри дуллай. Октябрь зуруй зузи бан тIий бур шяраваллил хозяйствалул бакIлахъия ядуван бюхъайсса американал мантажирттайн бувну бувсса складру. Мукунма американал ца хъинну машгьурсса компаниялул проектрайн бувну 50-хъул тонна къалмул дишин бюхъайсса къатри дуллай бур.
Уттизаманнул технологияр­ттайн бувну шяраваллил хозяйствалул бакIлахъия дугьлай байбивхьусса 2013- шиная шихунмай республикалий шяраваллил хозяйствалул итадакьлакьимур чIаланну гьарза хьунни.
«Дагагрокомплекс» ООО баян буллай бур ва заводрайн томатру дансса продукция кьамул дуллай бушиву. Му завод­райн продукция ларсун бучIан бюхъайссар Къизлардал райондалийсса «Южное» тIисса шяравусса «Речное» тIисса поселокрайн.
ХIасул хьусса суаллал хIакъираву цIухху-бусу буван бюхъайссар ва тел: 8 920 773 60 60