ГюнгутIул чIу. Ва чIунищал байбишай кIулшивручIансса оьрчIал ххуллу. Му ххуллийх вайннал ка дургьуну нанисса учительнал бугьлай бур хъирив тIутIайх бичинтIисса оьрчIал оьрмулуву хъунмасса кIану. Буну тIий учительтал оьрчIал кIулшиврул мякь лиххан бувайсса щаращив.
Зунттавусса чIявусса щаращая хьусса, Ккуллал райондалийх нанисса, Хъуннеххал киямур чулий дирхьуну дур Хъюйннал шяравалу.
Ва шяравусса школалул хIаятрава баллалисса гюнгутIул чIугу, арх бакъа нанисса аьтарттулмунияр ялтту буклай бур. Ттун ччянива ччан бикIайва архния хъинну лазилавкьуну чIалачIисса Хъюйннал школалийн лавгун, шикку дуклакисса оьрчIащал ва вайннан кIулшиву дуллалисса учительтуращал кIул хьун. Амма, багьантту хъанай, уттинин шиккун гьан къавхьуна. Вана ттун бахтти хьунни 2014-ку шиналсса дуккаврил шинал дайдихьулул 1-мур сентябрьданул байрандалух ябитан.

Школалул жанахIравун уххайхтува, шикку дарс дихьлахьисса АхIмадова ПатIимат АхIмадовнал га цIана чIаравсса классрава ттуйн оьвкуна: «Нану шивун, ХIажимурад. Ттун ина Дарбантлиясса макьаларду чичайнива кIулссарача. На, цавагу лях гьан къабивтун, «Илчи» буккайссар. ХьхьичIара нарагу макьалартту чичайссия кказитрайн», — куну.
Бунияла, ттул хьхьичI бия бувчIинну ихтилат буллалисса, ялун уруган симандалувугу хъинбалардал лишанну хIасул хъанахъисса учительница. ПатIимат АхIмадовал бувсуна цилва 1965-ку шинал Буйнакскалийсса хъаннил педучилище бувккушиву. Ганияр махъ 1971-ку шинал ванил заочнайну къуртал бувну бур Дагъусттаннал университетрал химиялул ва биологиялул факультет. Училище къуртал бувайхту ПатIимат АхIмадовнал 2 шин дурну дур ЧIяйннал школалий зий. Яла цала шяравун зана хьуну, 1967-ку шиная шинмай зий бур буттал шяраву. Ванил даврин кьимат бишлай, 2012-ку шинал дуллуну дур «Почетный работник Народного образования РФ» хIурматрал цIагу.
Хъюйннал байбихьулул школалул директорну зий бия Уцимиева КьурбанпатIимат Аьбдуллаевна. Ванил 1993-ку шинал къуртал бувну бур Буйнакскаллал педколледж. Ганияр махъ КьурбанпатIимат Аьбдуллаевна зий бур Хъюйннал школалий. Махъсса 15 шинал мутталий зий бусса бур школалул директорну. КьурбанпатIимат Аьбдуллаевнал бувсуна школалий зий бушиву Хъювхъиял шярава­сса Алхасова Муслиматгу. Ванил гьашину кIилчинсса шинни тIива школалий зий. Муслиматлул Къизлардай къуртал бувну бур педколледж. Шиккун зун бучIаннин цала Хъювхъиял шяраву цахъис хIаллай зий бивкIун бур. Мукьилчинмур учительницану зун дахьа гьашину бувкIун бия Хасаврай педколледж къуртал бувсса, Хъюйннал шяравасса жагьилсса учительница, Агъаева ПатIимат. Школалул техничкану зий бусса бия ХIасанова Диана. Дукра дувуну зий бусса бия Чупанова Ирина. Школалий бусса бия 11 оьрчI. Миннавату 3 оьрчI ия гьашину цалчинмур классравун лавгсса. КIилчинмур классраву ур тIива 3, шамилчинмуниву – 4, мукьилчинмуниву – 1 оьрчI.
Школалул вих ссир бувккун, ялтту киражрал хIулувхIуну, бакьин бувну бия. Циняв оьрчIру бавтIун, райондалул чулухасса вакил Илиясов Шамил учIайхту, тIиртIуна дуккаврил шин дайдишаврин хас дурсса байран. Цалчин школалияту арх бакъа яхъанахъисса МахIаммадова Жаннатлул шардату ларсун бувкIсса ницIал кIичIулува 11-вагу оьрчIал зумув ницIал къусри дирхьуна. Ванил ницI оьрчIал зумув дихьлахьиний чIа увкуна: «Дуккаву дакъагу, щалва оьрму ницIаяргу нацIуну гьаннав зул», — куну. Хъинну ххуйсса аьдат дия ва. Тяхъашивуртталми давур­ттив дайдишиннин директор Уцимиева КьурбанпатIиматлул, ларгсса шинал ахиратравун лавгсса, школалий зий бивкIсса АхIмадова ХIурун дакIнийн бутлай, минутIрайсса пахъ багьаву баян бувуна. Директорнал кутIану бувсуна школалул хьхьичI бивхьусса масъаларттая, цIусса тIалавшиннардая ва школалул оьр­мулия. Хъирив оьрчIал дурккуна учительтуран, дакьаврин, дусшиврун хас дурсса дикломацияртту. Бувуна чIиви-кьивисса ссувхIатгу. Барча бувуна оьрчIру дуккаврил шинащал Илиясов Шамиллулгу. Дуккавриву хьхьичIунминнан дуллуна грамотартту.
Дарсирайн занг рищуннин, на чан-кьансса ихтилат бувссия ПатIимат АхIмадовнащал. Ванил бувсуна ттухь Хъюйннал шяраву цалчин школа тIивтIуну бивкIшиву 1935-ку шинал. Хъюйннал школа къуртал бувсса оьрчIава бувкшиву лахъсса къуллугъирттайн лавхъсса пишакартал: Даудов Марсель, аьра­ли полковник, ХIажиев Сергей, Каспийскаллал 9-мур школалул директор, АхIмадов Шамил, Ккуллал райондалул КIулшиву дулаврил управлениялул бакIчи, Расулов Аьбдул, «Отличник воздушного транспорта», Гьимбатов Мустангир, летчик, АхIмадов Залимхан, гьавалул жамилул командир, ХIасанова Софья, МахIачкъалаливсса «Кредобанкрал» директор ва мукунма цаймигу.
Яла дайдирхьуна цалчинсса дарсру. Вай хас дурну дия тархъаншиврун, дусшиврун, дяъвирдайн къаршину буккаврин ва буттал шяраваллил, Дагъусттаннал, Аьра­сатнал тарихрая бусаврин. ЧIа учинну жувагу вай оьрчI-душаран тIивтIусса ххуллурду оьрмулуву.