Ккавкказуллал халкьуннал культуралул ва спортрал фестивальданий

gor_16Вай гьантрай Грозналий хьунни гьар шинах шайсса Ккавкказуллал халкьуннал культуралул ва спортрал фестиваль. Тикку дагъусттаннал спортчитурал бувгьунни 2-мур кIану, цалчинмур кIанай бия Чачаннал команда, 3-мур кIанай – Кабардин-Балкарнал команда.

ХIасан Аьдилов
Жулла республикалия­сса спортрал делегациялуву ивкIссар 45 инсан, миннавату 37 ия спортчи, 4 судия, 3 тренер ва 1 командалул каялувчи.
Грозналий бувссар 12 журалул тIуркIурду: куклумур атлетикалул эстафета, ка дишаву (армспорт), алхъан кIункIу даву, алхъандалийх лавай лахъаву, ходулирдай дирину заназаву, кIусса затру манзилданий духхаву, кIушивуртту гьаз даву, тIанкIру даву, лачIун буккаву, минифутбол, силовое троеборье.
Цалчинмур кIану Да­гъус­ттаннал бувгьунни силовое трое­борьелий. Ахъушиял райондалиясса Арсен Аьбдулкеримовлул шанна шинал мутталий цалчинсса кIану бугьайссар силовое троеборьелий.
КIилчинмур кIану силовое троеборьелий бувгьунни Чачаннал республикалул, шамилчинмур – Ставрополлал крайрал.
Минифутболданий цалчинмур кIану бувгьунни Дагъус­ттаннал командалул, финалданий Чачаннал командалуяр ххув хьуну.
Эстафеталий лечавриву жулла командалул 2-мур кIану бувгьунни, цалчинмур – Чачаннал командалул.
Дагъусттаннал лучниктурал бувгьунни 2-мур ва 3-мур кIанттурду.
Лахъишиврий ва лахъшиврий тIанкI давриву жулва спортчитурал 2-мур кIану бувгьунни.
Ходулирдай заназавриву Дагъусттаннал командалул 3-мур кIану бувгьунни, цалчинмур кIанай дур Чачаннал команда, 2-мур кIанай – Ингушналсса.
КIушиву гьаз давриву жула Идрис ХIамзаевлул 3-мур кIану бувгьунни, цалчинмур кIанай ия Чачаннал ва 2-мур кIанай Ингушнал спортчитал.
Алхъан кIункIу давриву жулла командалул 3-мур кIану бувгьунни, 1-мур кIану бур Чачаннал командалухь, 2-мур – Кабардин-Балкарнал командалухь.
ЛачIун буккавриву (лялух мухIлу дархIуну) жулла команда 4-мур кIанай дур.
Дурагу ца медаль Дагъусттаннан ка дишавриву ларсунни Насир Халикьовлул. Командарттава жулва ка дихьултрал бувгьунни 5-мур кIану. 1-мур кIанай дур Чачаннал команда, 2-мур кIанай – Къарачай-Чаргасналсса, 3-мур кIанай – Ухссавнил Осетия – Аланияналсса.
Алхъандалий гьаз шавриву ДР-лул бувгьунни 5-мур кIану. 1-мур кIану бур Ингушетиянал командалухь, 2-мур – Чачаннал командалухь ва 3-мур – КБР командалухь.
ЯлунчIил вара фестиваль хьунтIиссар Дагъусттаннай.