Инсаннал, хаснува адаминал, цалва оьрмулуву дуван аьркинсса агьаммур давривасса цагу, яла агьамми къайгъурдавасса цагу бур къатралсса баву ва цалва оьрчIру къатрал щаллу баву. ХьхьичIва, совет заманнай, агьали къатта-къушлил хIукуматрал щаллу байсса бивкIхьурча, цIанакул му масъала бур ца яла захIматминнувасса ца.
Мукунсса инсантурангу бусса ца чаранну личIлай бур ипотекалий къатта ласаву. Ларгсса нюжмардий яруссаннал «ХIакьикьат» кказитрал редакциялуву хьунни «Дагестанское агентство по ипотечному кредитованию» («Дагипотека») ОАО-рал директор Навруз Мехтихановлущалсса хьунабакьаву.

«Дагипотека» ОАО-лун гьашину хъанай дур 10 шин. Ми шиннардил мутталий, директорнал бусаврийн бувну, республикалий дуллуну дур 6 азарда ипотечный кредит, 9 миллиард къуруширттая лирчусса арцунсса.
ОАО «Дагипотека» сакин бувну бур ДР-лул ХIукуматрал 2004 шинал государственно-частный партнерствалул гьанулий, инсантуран къатри ласаву бигьа даву ва ипотечный кредитованиялул система хьхьичIуннай даву мурад­рай. Ва ОАО хъанай бур ДР-лул ХIукуматрал ХIукмулийн бувну цIакь дурсса «Стимулирование развития жилищного строительства в Республике Дагестан на 2011-2015 годы» Республикалул целевой программа щаллу дуллалисса ца исполнительну.
«Дагипотека» ОАО-лул директорнал бусаврийн бувну, республикалул парламентращалсса уртакьшиврийсса зузавугу тIайла дурну дур ипотечный кредитованиялул шартIру къулай даврийн, респуб­ликалул жилищно-строительный комплекс хьхьичIунмай баврийн ва агьали къатта-къушлил щаллу баврийн.
«Дагипотека» ОАО-лул акционерталну бур ДР-лул ПаччахI­лугърал Имуществалий каялувшиву даврил министерство ва «Дагэнергобанк» ОАО.
— Жу хъанахъиссару ипотечный кредитованиялул пионертал. Ванияр 10 шинал хьхьичI, ва даву дайдихьлахьисса чIумал, хъунмасса захIматращал цалчинсса шаттирду ласлай бавчуссару. Ттуршахъул, азарахъул дагъусттанлувнал цалва къатта-къушлил масъала жул агентствалийхчIин щаллу бувссар. Жуяр махъ яла цайми банкругу байбивхьунни ипотечный кредитованиялул цалла-цаллами программарду щаллу дуллай. Жу хъанахъиссару АьФ-лул ХIукуматрал Москавлив сакин бувсса «АИЖК» (Агентство по ипотечному жилищному кредитованию) ОАО-рал регионал оператортал. Аьрасатнал гьарцагу субъектрай буссар му ОАО-рал оператортал, — увкунни Навруз Мисрихановичлул.
Гихунмай мунал бувсунни цалва агентствалул щаллу дуллалисса программардая. Мукунсса 5 программа дур: «Молодые учителя», «Молодые ученые», «Военная ипотека», «Стандарт» ва «Материнский капитал». Бувсунни цацIунна дакьлакьисса шартIирдайн бувну, кредитрал программа язи дургьуну, гьарца зуруй ккаккан дурссаксса арцу 15-30 шинал мутталий дуллансса куццуй, инсаннал цалла гьарца зуруй ляхълахъисса арцул лагрулухгу урувгун, ласун бюхъайшиву къатта. Бувсунни ми программардал лагрулуву къатта ласласиманан дуллалисса хIалурдая, социал программардая, яла къулайсса дур учительтуранмур программа.
Кредитный договор сакин дуллалисса чIумал къатта ласласиманал (заемщикнал) оьрмулул шинну дикIан аьркинну дур 18 шинаяр къачансса ва ипотекалул кредит дуллуну къуртал хьун нанисса чIумал 65 шинаяр къачIярусса.
ТIайлар, жучIава чIявуми инсантал ипотека, кредит тIисса махъру баяйхтува нигьабусай. Амма, ва идаралул каялувчинал мукъурттийн бувну, кредит­рал программа личIлулну язи дугьарча, инсаннаща бюхълай бур кредит дуллансса цацIунма бакьлакьисса кьяйда личIи бувну, ялунсса шиннардий цалла дуллансса арцугу хIисав дурну, къатта-къушлил масъала бигьану ва анаварну щаллу буван. Лаякъатрай ялапар хъанай, чил инсантуран арцу дуллаяр, чIярусса шиннардивун бунугу, ахиргу цалвану хьунтIисса къат­рах дуллай хъинни тIисса пикри бия ва батIаврийсса чIявуминнал. Ци-бунугу, ва хъинну хъирив лавну, пикри бувну дуван аьркинсса даву дур. Ва масъалалул хIакъираву цIухху-бусу буван бюхълай бур «Дагипотека» ОАО-лул пишакартурачIа ва гьарта-гьарзану кIул буван вайннал сайтрай (www. dagipoteka.ru).