Дуккаврил шинал хьунийн Лакрал райондалул бакIчи Юсуп МахIаммадовлул каялувшиннаралу хьунни террорданийн къаршисса комиссиялул батIаву. Муний гьуртту хьунни: комиссиялул секретарь, райондалул бакIчинал хъиривчу Юсуп Рамазанов; райондалул администрациялул террорданийн къаршисса даврил отделданул каялувчи Щамххала Сайпуллаев; Аьрасатнал МВД-лул «Лакский» МО-лул каялувчи Марат МахIмудов; КIулшиву дулаврил управлениялул каялувчи Явсупи ХIамзаев; райондалул больницалул хъунама хIакин АьбдурахIим Дибиров; Агьали социальныйну буруччаврил центрданул хъунама МахIаммад Ссунгъуров; «Ххяххабаргъ» кказитрал редактор Мусалав Мусалаев ва цаймигу.
БатIаврий ххалбигьлай бия дуккаврил идарартту мюхчан баврийн, террорданийн ва экстремизмалийн къаршисса даву чялиш даврийн багьайсса суаллу.
Аьрасатнал МВД-лул «Лакский» МО-лул каялувчи Марат МахIмудовлул бувсуна УУП-лул (участковый уполномоченный полиции) ва ПДН-далул (отдел по делам несовершеннолетних) отделлал МЧС-рал зузалтращал цачIуну ххалбивгьушиву цинявппагу школартту, детсадру ва ялун ххисса кIулшиву дулаврил идарартту ва ми идарарттал лагма-ялттусса кIанттурду.
Балугъраву къабивминнал иширттталсса буллалисса отделданул ялун личин бувну бур оьрчIал тарбиялул ва кIулшиву дулаврил ялув къабацIлацIисса нину-ппу. ПДН-далул профилактикалул сияхIрайсса оьрчIал шаппа-шаппайн лавгун, миннал нитти-буттащал ихтилатру бувну бур.
КIулшиву дулаврил управлениялул каялувчи Явсупи ХIамзаевлул бувсуна Бесланнай теракт хьуну 10 шин там шаврин хасну, «Информационное противодействие идеологии экст­ремизма и терроризма в МР «Лакский район на 2014 – 2016 годы» программалул лагрулуву цинявппагу дуккаврил идарар­ттай дантIишиву низам дуруччай органнал зузалт ва шяраваллал бакIчиталгу гьурттусса давуртту: «Наш мир без террора», «Музыка лучше войны», «Мы, дети, против террора» тIисса темардан хас дурсса классный часру, конкурсру.
БатIаврий ялагу ихтилатру бувуна АьбдурахIим Дибировлул, МахIаммад Сунгъуровлул, Мусалав Мусалаевлул.
БатIаврий гьуртту хъанахъиминнал ихтилатру ххалбивгьуну, террорданийн къаршисса коми­ссиялул хIукмулийн бувну:
— «Лакский» МО-лул каялувчинайн тапшур бунни дуккаврил шинал дайдихьулий школарттай дуллалисса классный часирдай ва нитти-буттахъащалсса собраниярттай отделданул зузалт экстремизмалул ва терроризмалул идеологиялийн къаршисса ихтилатирттащал гьуртту хьун;
КIулшиву дулаврил каялувчинайн, райондалул хъунама хIакиннайн ва агьали социальныйну буруччаврил центрданул хъунаманайн тапшур бунни ми идарартту мюхчан бансса чаранну лякъин; ми идарарттал зузалт террордания ва цIу дагьаврия мюхчан бан лахьлахьисса учениярдай гьуртту хъанан.