Сентябрь зурул 27-нний Цалчинмур ЦIувкIрав мизит тIитIлатIисса шадлугъ дикIантIиссар. Инша Аллагь!
Зузи бантIиссар буттахъал заманнай мукьва мизит бивкIсса шяраву утти ца мизитвагу.
Зузи баннияр, гьай-гьай, мизит буван захIматри. ЦIувкIравсса мизит тIурча буниялттунгу шяраваллил жяматрал бувсса мизит хьунни. Агьалинал дакI дирссаксса арцу дартIунни, дулун ччимур дакIнийхтуну дуллунни.
Арцуйну къавхьума, иширайну, даврийну чIарав авцIунни.
ПатIимат Рамазанова
Мизитрал шяраваллил агьали тарбия баврил чулухуннайсса даву дачин дуллалиссар тIун бикIай. На учивияв, мизит баврилва ЦIувкIуллал жагьилтал ккуркки лаган бунни, цачIун бунни куну.
Бигьалагай кьинирдай цимилагу ларгунни жагьилтурал кьюкьри ЦIувкIрав мизит буллалиминнан кумаг бан. Ларгсса бигьалагай кьинирдайгу канализация дурну къуртал дуван най бия жагьилтал ЦIувкIрав. Миннащал лавгра нагу. Ца ххаришиву дия шяраваллил жагьилтал, уссурвал кунма, лагма лавгун, хайр-мюнпатсса даву дуллай буну. Шиккува кIицI лаган ччива буттал шяраву мизит баврил сиптачиталгу жагьилтал цивппа хьушиву.
Цаппара шиннардил хьхьичIва мизитрал гьанулул дайдихьу дурна Шамил Оьмариевлул.
Яла мизит баврил даву бакIрайн ларсуна Москавлив востоковедениялул факультет бувккусса, диндалул ххуттай цIакьну авцIусса ОьрбакIуй МахIаммадовлул. Му жагьилнал биялсса хIарачат бунни, шяраваллил жямат мукIру бунни шяраву мизит букъавну чара бакъашиврий. Тамансса жагьилтал чялишну хIала бувххун зий бивкIунни. Мунал лагма лавгунни шяраву мизит бакъашиву кьурчIи бизлазисса, му къаххуйшивуну чIалачIисса жагьилтал. ДакIнийхтунура тIисса, хасну ттун ттунма пахру бур буттал шяраваллил жагьилтал мукун хьхьичIун бурувгсса, адаврай къуццу тIутIисса бушиврия. Я Аллагь, мукунми цинявннанма эбратну хьуннав!
Шагьрулийсса ххуйсса давугу кьариртун, шяравун имамну зун учIан хIадурну ур Валил арс МахIаммадрамазан Кьурбанов. Бурганну гихунмай. Цалссарив, на ЦIувкIрав бивсса кьини (сентябрь зурул 15-нний) дарщусса кьини хьурчагу, дякъивух ва кьяркьаравух зий булувкьуну бия жагьилтал канализация дуллай. ТIабиаьтрал макьу дакьиннин ялугьлансса мажалгу чув бур – сентябрь зурул 27-ннин мизит бувну къуртал бан багьлай бур. Гъаравух ва дякъивух зузисса жагьилтурайн я бияйхту, циван ххари къахъанахъави дакIгу. Ччайгу бурхха аьзиз буттал шяраву Аллагьнал Къатта бувнугу, зузи бувнугу!
Иттав макь дучIан дуллалисса щугълурду гьанай бур бакIравугу: лажиннича бартлагантIиссарив буттал шяраваллил аьрщарай бувсса мизитраву чак бан хияллай бивкIминнал хиял?
ХьунтIисса ишри! Бухьхьияра 1-мур ЦIувкIрав сентябрь зурул 27-нний. Мизит тIитIаврил шадлугъ дайдишинтIиссар ссят 11-нний.
