Август зурул 26-нний МахIачкъалалий «Молодежь Дагестана» кказитрал редакциялий АьФ-лул ПаччахIлугърал депутат, АьФ-лул ПаччахIлугърал миллатирттал иширттал комитетрал председатель ХIажимет Сапараьлиевлущалсса пресс-конференция хьунни.
Имара Саидова
Пресс-конференциялул даву дайдихьлай ХIажимет Сапараьлиевлул бувсунни цува ччя-ччяни журналистуращал хьунаакьайшиву ва бакIрая ччаннайн бияннин буккайшиву республикалул цинявгу кказит-журналлу. Му бакъассагу, кIицI лавгунни депутат хIисаврай, ччя-ччяни агьалинащал хьунаакьайшиву ва миннал масъалартту бюхъайссаксса щаллу бан хIарачат буллай икIайшиву.
Мукунма ХI. Сапараьлиевлул кутIану бувсунни цала каялувшиву дуллалисса комитетрал даврия.
«Ларгсса шинал дурсса давурттава нава рязийну ливчIунна кIира агьамсса закон кьамул даврийну. 1-мур закон миллатирттал халкьуннал дянив къалмакъаллу хьун къаритаву мурадрай кьянкьасса тIалавшиннарду дуссия циняв муниципал образованиярттал хъуниминная. Мукунма щала билаятрай буссия ахттар буллай миллатирттал дянивсса къалмакъаллу ци тагьарданий дуссарив ххал дуллай.
Ларгсса шинал кьамул дурсса кIилчинмур агьаммур закон дур миграциялун хасъсса масъаларттал хIакъиравусса. Ва масъалагу, циняв депутатъталгу, къуллугъирттаймигу хIала бувххун, щаллу бан аьркинсса масъала бия», — увкунни ХIажимет Сапараьлиевлул.
Журналистуращалсса хьунабакьаврий ХI. Сапараьлиевлул гьаз бунни хIакьинусса кьини Украиннаву хъанахъисса дяъвилул иширттал хIакъиравусса ихтилатгу.
Буллунни суал ДР-лул БакIчи Рамазан АьбдуллатIипIовлул оьрус миллатрал халкь республикалийн бучIан буллалаврил хIакъиравусса. ХIажимет Сапараьлиевлул увкунни: « ХIакьину республикалийн Аьрсатнава бучIан буван аьркинссар аьлимтал, хъунисса пишакартал, гьунар бусса артистътал ва цаймигу жунма за лахьхьин буван бюхъайсса, республикалун хайр биян буван бюхъайсса инсантал. Мукун къуццу тIурчанни жулла республикалул бучIантIимургу хъинчулийнмай баххана хьунтIисса. Лавайсса даражалул пишакартал жучIанма бувцуну, зузи бансса кIантту сакин буллан аьркинссар. Мукунсса инсантал жучIанма бучIан буллан бюхъарчан, на му программалуцIун хъинну акьинна».
Цасса ПаччахIлугърал Экзаменнал хIакъиравусса суаллан жаваб дуллай ХI. Сапараьлиевлул бувсунни цува му экзамен кьамул даврил журалул чул бувгьума акъашиву. Бувсунни цанма хъинну асар хъанай бушиву автоматирттащал лагма рургьуну, ццахханнарал бугьан буллай бушиву экзаменну дуллалисса оьрчIру. Мукунсса низамрайну оьрчIал психикалун хъунмасса зарал биян буллалишиву. Му бакъассагу, ми экзаменну наниссаксса хIаллай, ми хIасул дуллай чIярусса арцу нахIакь харж дуллалишиву.
Журналистурал буллунни суаллу Дарбант шагьрулун 2000 шин шаврин хас бувсса, Азирбижаннал дазуй ялапар хъанахъисса Храх-Уба ва Урьян-Убалул халкьуннан булун аьркинсса компенсациярдал хIакъиравусса. Бизан буллалиминнал хIакъираву ванал бувсунни 900 миллион арцул итабакьин най бушиву. Жул комитетрал мунил хIакъиравугу АьФ-лул КьатIаллил иширттал министрнайн чIарав ацIаву тIалав дуллалисса аьрза тIайла бувкссар, -увкунни.
