Шамиллул арс Дандамаев Батир
Август зурул 18-нний оьрмулул 49 шинаву, хархавар бакъа лавмартсса цIуцIаврил жуятува личIи увунни дакI-аьмал ххуйсса, цумацаннащалгу хIал бавкьусса ГьунчIукьатIатусса Дандамаев Батир Шамиллул арс.
Батир увну ур Къарабудахкантлив учительтурал кулпатраву. МахIачкъалалий 10 классгу бувккуну, шиккува автодорожный техникум къуртал бувну бур отличныйну.
Яла увххун ур Воронежуллал строительный институтравун ххуллурду байсса факультетрайн. Лавайну институтгу къуртал бувну, зий ивкIун ур цаппара хIаллай тийхва. Махъ зана хьуну ур Дагъусттаннайн. Шиккугу цала касмулий зий ивкIун ур Муххал ххуллул управлениялий.
Махъсса шиннардий Дандамаев Батир цала маэшат буллай зий ия предпринимательну. Чув, ци даврий зий ухьурчагу Батирдул цалла дуллалисса даву кIанийн дуртун дуллай аьдатсса ия. Ва ия цала пишалул лавайсса специалист.
Батирдул кулпат бувну, шанма оьрчI бур, ца душ, кIия арс. Мигу цивппа кунма захIмат ххирану, хъунаманал хIурмат буну тарбия буллай ия.
Оьрмулул аргъираву инфаркт хьуну, шанма оьрчIал ялату ппу лавгунни.
Батирдул кьурчIисса бивкIулул жижара буллай буру ванал ниттихь Азинатлухь, кулпатрахь, арсурваврахь, душнихь, ссурваврахь, ссурахъаврахь, цинявппагу гъан-маччаминнахь.
Батирдун къабуллусса оьрму ванал арсурвавран, душнин, уссур-ссуннан булуннав. Я раппий, я Аллагь цал бунагьирттал аьпа баннав. РухI хъинний дишиннав, алжаннул ххари аннав.
ГьунчIукьатIрал жямат
————————————————————————
Минкаиллул душ МахIаммадова Калимат
Август зурул 17 оьрмулул 83 шинаву, личIину хъунмасса хIалллай къашавайгу къавхьуну, жуятува лавгунни дакI-аьмал хIалимсса зунттал хъамитайпа МахIаммадова Калимат.
Калимат бувну бур 1931 шинал ГьунчIукьатIрал шяраву бухгалтернал кулпатраву. Мюрщину буна нинугу диркIуну, вай шанма душ ва ца арс буттал канихун багьну бур. Вайннан мюрщину буна зий, захIмат буллан багьну бур. Калиматлул МахIачкъалалия бувкIун шикку корректортурал курсру къуртал бувну бур. Гания шинмай ва пенсиялийн букканнин Дагкнигиздатрай лакрал отделданий корректорну зий бивкIун бур.
Калимат щар хьуну бур цила шяраватусса Къарагишиев МахIаммадлун. Калиматлул цила даврий бувсса захIматрахлу мадара хIурматрал Грамотартту ва цаймигу бахшишру дуллуну дур. Ва хъанай бур дяъвилул ва захIматрал ветеран.
Калиматлул бивкIулул кьурчIишиву кIидачIлай, жижара буллай буру ванил арснахь, ссурваврахь, ссурахъаврахь, цинявппагу мачча-гъанминнахь.
РухI хъинний дишиннав, алжаннул ххари баннав.
ГьунчIукьатIрал жямат
————————————————————————
Базал душ Багъдуева Гуржагьан
Вай гьантрай, цIуцIи шаний лахъигу лавгун, оьрмулул 81 шинаву аьпалухьхьун лавгунни щала щарнин бусравсса хъамитайпа, хIакьсса зунттал душ Багъдуева Гуржагьан.
Бувну бур Гуржагьан Хъусращиял шяраву 1932 шинал. ЧIяв дянивмур даражалул школагу бувккуну, бувхссия Пединститутравун, физикалул ва математикалул факультетравун. МарцIсса ххювардай вагу бувккуну, физикалул ва математикалул дарсру дихьлай буссия МахIачкъалаллал школардай. ОьрчIру хъуни буллай цаппара шиннардий шаппагу бивкIун ялагу инженерну ГОСТ надзорданий пенсиялийн букканцIа зий буссия. Чув, ци даврий зий бивкIхьурчагу, Гуржагьан бия гьарцаннащалагу хIал бавкьусса, дакI хъинсса, бивкIу-буккулий чара бакъа аьркинсса кьулгьу-кьуран буккайсса, щалагу жяматран бакъа чара бакъасса, щар чанна дан лавхъсса чирахъну хъанахъисса инсан. Гьарцаннанмагу маслихIатчи бия Гуржагьан, цIухху-бусу бан бучIайссия ваничIан. ДакI-аьмал тIивтIусса, учин-бусан, дан-дитан кIулсса Гуржагьан цинявннанма бусравну бикIайссия.
Гуржагьаннул цила оьрмулул дус Багъдуев Гьаруннущал ххаллилсса тарбиягу дуллуну, дуккингу бувну, цала-цала ххуллийн бивчунни мукьвагу оьрчI.
Аьпалувух бишин хIайпсса инсан буссия.
Гуржагьан ахиратрал хьусса кьурчIишиву кIидачIлай, жижара буллай буру арсурваврахь, душваврахь, уссурссуннахь, гъан-маччанахь , цинявннахьвагу. Цил гьав нурданул дуцIиннав, рухI хъинний дишиннав, махънал оьрмурдай барачат бишиннав. Амин.
Хъусращиял жямат
———————————————————————-
ХIажиаттал душ Абуева Муслимат
Уттигъанну, оьрмулул 90 шинаву, аьпалухьхьун лавгунни ххаллилсса лакку хъамитайпа, хъиншиврул бутIа ххишалану буллусса, дакI-аьмал тIивтIусса, яхI-къирият дусса, мяйжаннугусса зунттал душ Абуева Муслимат.
Бувну бур Муслимат 1924 шинал Гъумучиял шяраву. Къуртал бувну Гъумучиял педучилищагу, бувкIун МахIачкъалалив зун бивкIун бур Дагъусттаннал учебно-педагогический издательствалий корректорну. Шикку хIадур байссия Дагъусттаннал буцири мазурдий итабакьинсса аьлимтурал луттирду, словарьду, школданий дуклаки оьрчIансса учебникру, пособияртту ва м. ц. оьрчIансса литература.
Ва жаваблувшинна ххисса даврий бивхьусса дакIнихтунусса захIматрахлу Муслимат лайкь хьуссар «Отличник печати» хIурматрал лишандалун. Пенсиялийн бувккун махъгу даврий кумаг аьркинний ванин чIявуну оьвчайссия.
Муслимат бия цила даву дакIнихтуну дайсса, захIмат ххирасса, цалама, чилма личIи къаувну цинявннал хIурмат байсса, гьарцаннащалагу хIал бавкьусса. Мунияту цуппагу бусравну, ххирану бикIайва цинявннан.
Муслимат жуятува личIи шаврил хъуннасса кьурчIишиву кIидачIлай, жижара буллай буру арсваврахь, душваврахь, оьрчIал оьрчIахь, уссурссуннахь, гъан-маччаминнахь цинявннахьвагу.
Цил гьав нурданул дуцIиннав, алжаннул ххари баннав. Махънал оьрмурдай барачат бишиннав. Амин.
Гъумучиял жямат,
даврил уртакьтал
———————————————————————-
ХIасаннул душ Аьбдуллаева (Аьлиева) АьтIикIат
Августрал 19-нний оьрмулул 94 шинаву аьпалухьхьун лавгунни ГьунчIукьатIрал шяраватусса Аьбдуллаев ХIасаннул душ АьтIикIат.
АьтIикIат бувну бур 1920 шинал хъудугьул кулпатраву. 1921 шинал къачагъ ХIуцциннал Нажмуттиннул банда 1720 инсаннащал ГьунчIукьатIрайн ххярхсса чIумал АьтIикIатлул ппу ХIасан ЯтIул партизантуран дуканмур ларсун чай буртти най уна бивтун увтссар. АьтIикIатгу Граждан дяъвилуву Совет хIукумат дихьлай ивкIусса ЯтIул партизаннал душ хьуссар. АьтIикIатлул цила оьрму ивкIусса буттал лавсъсса ххуллийх тIайлану най, Совет хIукуматрал идарарттай зий, лавгссар. Ванил цила язи увгьусса МахIаммадханнащал шанма оьрчI хъуни бувссар, душ ва кIия арс.
АьтIикIат зий бивкIссар ГьунчIукьатIрал с/советрал секретарьну 17 шинай,бувчIуну бивкIссар колхозрал ревизионный комиссиялул председательну, бивкIссар «ЯтIул ттугъ» колхозрал завферману. Лайкь хьуссар захIматрал «ЯтIул ттугълил» ва «Знак Почета» орденнан, ларсъссар чIярусса грамотартту ва бахшишру. МахIачкъалалийн бивзун махъ, зий буссия личIи-личIисса кIанттурдай. Чув, ци даврий зурчагу ва бикIайва хIурматран лайкьну, насихIатчину зий. Махъсса шиннардий АьтIикIат пенсиялийн бувккун цила куяв СократлучIа ва душ АсиятлучIа ялапар хъанай буссия.
АьтIикIатлул бивкIулул кьурчIишиву кIидачIлай, жижара буллай буру ванил арснахь, душнихь, вайнная бивзминнахь, куявнахь, ссурахъаврахь, цинявппагу гъан-маччаминнахь.
Цил бунагьирттал аьпа баннав. Циняв АьтIикIатIлул оьрмулувун бияннин ва ххишалагу битаннав Аллагьнал.
ГьунчIукьатIрал жямат
———————————————————————
Хъуннасса кьурчIишиву кIидачIлай, жижара буллай буру миллатрал язисса душ, машгьурсса жяматийсса ва сиясийсса ишккакку
АхIмадлул душ Чавтараева Миси
аьпалул шаврийн бувну, ванил арснахь АхIмадихь, душнихь Рукьижатлухь, ссихь Гулизардухь ва махъсса уссурссуннахь.
Цил гьав нурданул дуцIиннав. Алжаннул ххари баннав. Махънал оьрмурдай барачат бишиннав. Амин.
«Дараччи» клубрал ккуран
