АрвахI кьини, август зурул 13-нний, Да­гъусттаннайн увкIсса АьФ-лул Ухссавнил Ккавкказуллал иширтталсса буллалисса министр Лев Кузнецов ва ДР-лул БакIчи Рамазан АьбдуллатIипов бивунни инвестициялул объектру буллалисса кIанттурдайн. Миннащал бия АьФ-лул Ухссавнил Ккавкказуллал иширтталсса буллалисса министрнал заместительтал Одес Байсултанов ва Андрей Резников, ДР-лул хIукуматрал председательнал хъиривчу Артур Сибеков, ДР-лул ХIукуматрал ва республикалул БакIчинал администрациялул хъунаманал хъиривчу Исмяил Эфендиев, ДР-лул экономикалул министр Раюдин Юсуфов ва м.ц.
ХьхьичIва-хьхьичI ва делегация бивунни Каспийскаллал листовой пюрундалул завод­райн (КЗЛС). Ва заводрал исполнительный директор Абакар Мудуновлул бувсунни заводрая ва цивппа хьунабакьлакьисса масъаларттая.
КЗЛС – му хъанай дур суткалий 600 тонна листовой пюрундалул итадакьлакьисса ва хъинну хьхьичIуннайсса ттизаманнул технология ишла дуллалисса хъуннасса лагрулул проект.
Ва завод буллай бур Къумтуркъалаллал райондалийсса Тюбе поселокрай. ХIакьинусса кьини заводрал итабакьлакьисса пюрун Сaspian Crystal Clear маркалулу буклай бур. Ва бур чани чIалачIисса, бювчIан бувсса пюрун. Уттиния тихунмай вайннан цIан був­сса, бургъия буручлачисса ва энергия чанну харж байсса пюрун итабакьин дакIний бур. Заводрал продукция дахлан бивкIун бур ва шинал январь зуруя байбивхьуну. Заводрал каялувчитуран Дагъусттаннал, Аьрасатнал кьатIув букканссагу пикри бур. Май зуруя байбивхьуну вай цала продукция республикалул кьатIув тIайла дуклай бур. Уттинин шикку итабавкьусса листовой пюрун Азирбижаннавун, Гуржиянавун, Къазахъисттаннайн ва Украиннавун бивну бур.
Завод ххал бувну мукьах делегация бивунни «Нергиз Дагестан» тIисса Аьрасатнал ва Туркнал цачIу буллалисса янналул (текстильный) фабрикалийн. Дагъусттаннай ва фабрика тIитIаврийну 5 азара инсан даврил щаллу хьун най ур. Ва проект ххуйну щаллу дан бюхъарча 5 шинал лажиндарай фабрикалуща шинай 500 млн. доллардансса хъус дазул кьатIув тIайла дуклан бюхъан тIий бур.
Шичча хъамал «Мараби» тIисса щях дакьайсса плита ва керамикалул гранит дуккан дуллалисса заводрайн бивунни. Ва заводрал проект щаллу дуллай байбивхьуну бур ларгсса шинал апрель зуруй. Шиккусса технологиялул процесс щала автоматикалийсса бикIан тIий бур.
Керамикалул плитка Италиянал сир ва рангру ишла дурну дуллан тIий бур. Мунияту вай ларайсса качествалул дикIаншиврий щак бакъар.
Ахиргу делегация бивунни Новостройрайн – ТIюхчарав ва ЦIуссачIурттахь бу­л­ла­­лисса школардайн. Мукунна вай­н­нал ххал дунни цаппара шяраву дуллалисса къатри.
Новостройрай бувну къуртал шавайсса вай школардая хъиривсса номердай бусан хIарачат банну, школардал директортуращалгу, райондалул каялувчитуращалгу хьунабавкьуну.