Лакрал райондалул администрациялул спорткомитетрал сипталийну гьарцагу байрандалун хасну Гъумук шайссар личIи-личIисса спорт­рал бяст-ччаллу. Ва ххуллухгу Ххувшаврил байрандалун хас бувну хьунни районнал дянивсса лачIунбуккаврил турнир.
Муний гьуртту хьунни Лакрал, Ккуллал, ЧIарадиял, УнцIукIуллал, Гергебиллал районнал ва Ххажалмащиял, Къуппиял, ЦIахъардал командартту – цинявппа 120 лачIунукку.

Турнир тIиртIуна Райондалул КIулшиву дулаврил управлениялул каялувчи Явсупи ХIамзаевлул. Гьуртту хъанахъиминнан тIай­лабацIу чIа тIисса ихтилатру бувуна Лакрал райондалул бакIчи Юсуп МахIаммадовлул ва Гъумучиял лицейрал директор МахIаммад Хъунбуттаевлул.
Турнирданул финалданийн бувкIуна га кьини, ДР-лул бакIчи Рамазан АьбдуллатIиповлул цIания, Лакрал райондалул ветерантал барча бан бувкIсса ДР-лул Халкьуннал Мажлисрал депутат Камил Давдиев ва культуралул министрнал кумагчи Супиян Оьмаров.
Камил Давдиев:
— На личIи-личIисса аьрххирдай ччя-ччяни учIара Лакрал ва Ккуллал районнайн. Цал увкIун цал учIаннин Лакрал райондалий ци-дунугу ххуйчулиннайсса дахханашиннарду хьуну лякъай, муния ххари шара. ХIакьинусса кьини тIурчарив лапра авадансса дур. Ххюлусмав тIиртIуну дур дяъвилий жанну дуллусса вирттаврансса гьайкал. Лавгмунил аьпа ябуллалисса байрандалийн бучIан чIал шаврия хIайп тIий ура. Районнал щархъаву кIукунсса гьайкаллу нажагьссарагу дакъахьунссар, ххаллилсса гьайкал дия, тIий буслай бия кIикку гьуртту хьуми. Махъсса шиннардий респуб­ликалий гьайкаллу цIудуккан даврих хъуннасса къулагъас дуллай бур, Лакрал райондалийгу му масъала хьхьичIххуттай бур.
Ветерантал барча бан ххаллил­сса концерт хIадур дурну дия Магьирлугърал къатлул зузалтралгу, ОьрчIал магьирлугърал школалулгу. ХIакьину хъун хъанахъисса ник оьшивурттал ххуллия буруччинсса чаран чIалай бур ми спортрахун ва магьирлугърахун бичавриву. Лакрал райондалул каялувчитурал му чулухуннайсса къулагъас асар хъанай дур. Мяйра район гьуртту хъанахъисса лачIунбуккаврил турнирданул агьамшиву хъуннассар. ОьрчIру гьурттусса мероприятиялий дусшиврул гьану цIакь хъанахъиссар. Турнир Ххувшаврил кьини дуллай бушиврулгу оьрчIаву ватандалухсса ччаву куртI дуллалиссар. Райондалул бакIчи Юсуп МахIаммадовлуйн, ванал чIарав бацIлацIиминнайн ва щалва жямат­райнгу барчаллагьрай ххарисса гьавасращал най ура ялавай.
Супиян Оьмаров:
— Цаппара шиннардил хьхьичI Лаккуйнай нанитари ттул пикрирду гъав лагайва, лакрал вирдакIну хъанахъисса Гъумучи цил бюх­ттулсса цIанин къалайкьсса тагьарданий чIалай. Махъ-зуманив шиная-шинайн чIаланну цIубуклай бур. ХIакьину Гъумукун ухлахийни тIурча дакI тирх увкунни, ххуллул тия ва шия бувгьусса мурхьру, марцIшиву ххал шайхту. Ца кьини шанна-шанна мероприятие райондалий душиврулгу исват буллалиссар райондалул бакI дургьуми зий бушиву, ший оьрму тарг тIий бушиву. Спортзал цIубуккан бувну бур, материальная база ххуйсса бур. Культурагу шиннардил хьхьичI лащинсса тагьарданий дуссия. Махъсса кIира-шанна шинал лажиндарай диялсса даву дурну дур, ххуйчулийннайсса дахханашивуртту хьуну дур, янналул, музыкалул инструментирттал лащу-щаллуну бур. Ларгсса шинал республикалул магьирлугърал идарарттал конкурсрай Гъумучиял клуб язи бувгьуссар яла ххуймур магьирлугърал идарану. «Яла хьхьичIунсса магьирлугърал зузала» тIисса цIанин лайкь хьуссар Гъумучиял Магьирлугърал къатлул директор Шамсият Какваева. Мукунма, райондалул библиотекагу лайкь хьуссар магьирлугърал хьхьичIунсса идаралун. Сайки циняв номинациярдаву Лакрал район хьхьичIун дуркссар. Гьашинугу буссар Лакрал райондалул магьирлугърал идарартту конкурсрай гьурттушинна дуллай, дакI дарцIуну ура уттигу миннал цIа щяв къарутанссар тIий.
Лапва хIайран увунна на Оьр­чIал магьирлугърал школалул концертрал. ХIайп тIий ура культуралул министр Зарема Буттаева жущалва бакъашиву. На ттунна диск дувара учав, чара бакъа ганингу ккаккан данна. Эмаратсса костюмру, музыкалул инструментирттал дузалшинна – укунсса материальная база нажагьссавагу школарттай бакъассар. Ларгсса шинал на бакIрайн агьунна ххячча дакъасса ца дачIу дакъа цичIар дакъасса школалийн.
Концертрайгу, турнирданийгу ларайсса сакиншинна асар хъанай дур. Низам дуруччай органнал зузалт цалва-цалва кIанттай бур, каялувчи цува ур гьарца мероприятиялий. Лакрал райондалулмур команда ххув хъанай душиврулгу бусласиссар ший спортрах дагьай­ссаксса къулагъас душивруя. Мунияту пахрулул хъячавайсса дакIнищал най ура шия.
Командарттал дянив цалчинмур кIану бувгьунни Лакрал райондалул командалул (тренер МахIмудов ХIажимурад), кIилчинмур кIану – Гергебиллал райондалул командалул, шамилчинмур кIану – Ххажалмащиял командалул.
Гъумучиял командалул ла­чIун­буккултрава цалчинсса кIан­тту бувгьунни: Исмяилов Баширдул (20 кг.); Муртазааьлиев КьурбанмахIаммадлул (22 кг.); Сулайманов ХIасаннул (29 кг.); Тажуттинов АхIмадлул (35 кг.); Тажуттинов Оьмарасхаблул (42 кг.); Мучиев ХIамзатлул (46 кг.); Щамххалов Ризваннул (50 кг.); Сулайманов Аьбдулжалиллул (54 кг.); Кьурбанов Сулайманнул (75 кг.). КIилчинсса кIантту бувгьунни: Ханов ХIасанбасрил (20 кг.); Ханов Иманаьлил (22 кг.); Эфендиев МахIмудлул (24 кг.); Насухов Ибрагьимлул (54 кг.); ХIабиев ХIажинал (58 кг.). шамилчинсса кIантту бувгьунни ХIусманов Мурадлул (22 кг.); Исмяилов Батирдул (27 кг.).
«За лучшую технику» номинациялуву бахшиш ларсунни Сулайманов Аьбдулжалиллул, «За волю к победе» номинациялуву – ХIабиев ХIажинал.
Ккуллал райондалул лачIун­буккултрава цалчинмур кIану бувгьунни Ибрагьимов Исуплул (58 кг.), кIилчинмур кIану – Гъазиев Амирдул (50 кг.), шамилчинмур кIану – Кьадиров Эльдардул (46 кг.).
Ххувхьуминнан бахшишру дуллалисса шадлугърай гьуртту хьунни райондалул администрациялул бакIчи Абакар Къюннуев, ванал хъиривчу Юсуп Рамазанов, КIулшиву дулаврил управлениялул каялувчи Явсупи ХIамзаев, Спорт­рал ва физкультуралул комитетрал пишакар Малик ХIусманов, Шяраваллил хозяйствалул ва экономикалул управлениялул каялувчи Ризван Оьмаханов, Счетная палаталул хъунама ХIусайн Куччаев, Дагъус­ттаннал шяраваллил хозяйствалул академиялул преподаватель Аслан Къажлаев.