Май зурул 7-нний Ххюлу­ссуннал шяраву хьунни Буттал кIанттул цIанийсса Хъун дяъвилий жанну дуллусса шяравучутуран дацIан дурсса гьайкал цIудуккан дурну, му тIитIлатIисса шадлугъ. Муний гьуртту хьунни Лакрал райондалул бакIчи Юсуп МахIаммадов, райондалул администрациялул бакIчи Абакар Къюннуев, Лакрал ва Ккуллал районнал аьрали комитетрал каялувчи ХIасан Массуев, Аьрасатнал МВД-лул «Лакский» МО-лул каялувчи Марат МахIмудов, Лакрал ва Ккуллал районнал прокурор Светозар Оьмаров, шагьрурдая бувкIсса Ххюлуссуннал ва Хала­ккиял шяраваллал агьлу, дуклаки оьрчIру.
Зулайхат Тахакьаева
Шадлугъ тIитIлай, Ххюлуссуннал шяраваллил администрациялул бакIчи Шамил Абачараевлул бувкIсса хъамал барча бувна ялун нанисса Ххувшаврил байрандалущал, барчаллагь увкуна гьайкал дан чIарав бавцIуминнахь.
Ватандалухлу жан дуллуминнал аьпа абад буллалисса гьайкал Ххюлуссуннал шяраву дацIан дурну дур 1967 шинал. Му цIудуккан дан­сса шяраваллил бакIчинал пикри хъинчулий ккавккун, шяраваллил бусравсса хъуначутурал маслихIат бувну бур Лаккуя дизан дурсса, Ххюлуссуннащал ца жямат кунма яхъанай бивкIсса чIаххувсса Хала­ккиял шярава аьрая зана къавхьусса чиваркIунналссагу цIарду гьайкалданийн лахъан дан. Му ишираву кIивайвагу жямат лагма лавгун, чIарав бавцIуну бур.
Цалва ихтилатраву райондалул бакIчи Юсуп МахIаммадовлул бувсуна дяъвилул шиннардий Лакрал райондалул агьалинал аьрай ва къинттуллух дурсса гьурттушиннарая, Ххюлуссуннал шяравату увксса Франциянал виричу ХIусайн Кущаевлуя.
— Дунияллий яла оьттул ттур дурксса дяъвилуву Ххувшаву ларсун тамансса шинну ларгун махъ, фашизм цIунила-цIунилгу тIутIайх дичлай дайдирхьунни. Совет Союз лекьа-пIякьу шайхту, ми республикарттай хъанахъисса ишру жунма чIалай бур. Фашистурал хасиятру цаву ду­сса оьхIалчутурая бурув­ччуну ба­къар жулвамур билаятгу. Му жунмагу исват хьунни ларгсса шинал Буршай хьусса оьзрулийну. ХIакьину Украиннаву фашистал властьрачIан бувкIун, дуллалисса давурттаягу жунма баллай бур. Мунияту жула буттал буттахъал оьттухлу ларсъсса Ххувшаврил байран лахъа-хъунну дуллалаврилгу, оьттул майданнайва ливчIминнал аьпа абад бансса давуртталгу агьамшиву ххишалассар. На ши­ккун 19-гу шяраваллил администрациялул бакIчитал гьан банна дакIнийхтунусса захIмат бивхьуну дурсса ва ххаллилсса гьайкал ххал дан, — увкуна ванал.
Ихтилатрая махъ Юсуп МахIам­мадовлулгу, ва шярава увксса хъунасса профессор Муса Абачараевлулгу кьувкьуна гьайкал тIитIаврил лишанну хъанахъисса аьтIласрал ятIул лента. Дуклаки оьрчIал гьайкалданучIа бивхьуна тIутIал шалкри, дурккуна дяъвилун хас дурсса назмурду. ДакIнийн бивчуна ЦIуссалаккуй къачагътуращалсса дяъвилуву жан дуллусса Майрамов Мурад ва цаппара шиннардил хьхьичI ВицIхъиял махIлалий къачагътурайн данди увккун, миннаща ххассал къавхьусса Лакрал РОВД-лул зузала Къунжуев Амсаруллагь.
Гьайкалданий цIарду чирчусса чиваркIуннал рухIирдаяту алхIам бувккуна тамансса шиннардий Ххюлуссуннал шяраваллил бакI дургьуну ивкIсса Гъапуров Оьмар­дул.
Аьлимчу Арсен Магьдиевлул бувсуна Ххюлуссуннал шяраву хIакьинусса кьининин увагу ливчIсса ца ветеран Гъапуров МахIаммадлучIан шяраваллил чиваркI лагайшиву гьарца шинал 9-мур майрай. Школалул чIирайн лархъсса 16 аьраличунал суратращалсса стендрайн уттигу лархъун дусса дур ванал ляркъусса 26 аьра­личунал суратругу. Шяраваллил агьулданухьгу тавакъю бунни цачIара думи диян дувара куну.
ХIайдаров Раппанинал бувсуна дяъви байбивхьусса чIумал цува ивкIшиву 11 шин хьусса чIава жагьил, цанна ххуйну дакIний душиву шяравун аьрая цалчинсса тил дуркIсса чIун. Ххюлуссуннал шярава аьрайн лавгсса 104 чиваркIуннава 63 зана къавхьушиву, 25 хъамитайпа щащарну ва 65 оьрчI ятинталну ливчIшиву. Миннавасса Аьбдуллаева Мариян, Къимпаева Аьйша, Дибирова ПатIимат ххю-ххюва ятингу хъуни буллай, зурулух зий, колхозраву захIмат буллай бивкIшиву.
Шяраву бусравсса Байсарижат Абачараева шадлугърайн бувкIун бия Сталиннул суратращал.
– Ванал ххуттайх нанисса бикIанни аьркинсса билаятрал хъуними. Цаллагу къадуркуссар, цаймигу дукан къабивтссар. Арсгу чIявучивух Ватандалухлу талан тIайла увкссар, — тIий бия ва.
Гьайкал дацIан дан бакIрайн лавсъсса шяраваллил бакIчи Шамил Абачараевлухь ва ванал чIарав бавцIуминнахь барчаллагь увкуна профессор Муса Абачараевлул, тамансса шиннардий шяраваллил бакIчишиву дуллай бивкIсса РайхIанат Сайдиевал, магьирлугърал даврий зий бивкIсса Маданият Къунжуевал, школалул директор Гьарун Къунжуевлул, Халаккиял шяраватусса ХIасанхIусайн Юсуповлул.
Шадлугърай ялагу ихтилатру бувуна аьрали комитетрал каялувчи ХIасан Массуевлул ва Аьрасатнал МВД-лул «Лакский» МО-лул каялувчи Марат МахIмудовлул.