СУЛТIАНАХIМАДИЛ ДУШ АЬБИДОВА СУЛТIАНАТ
Январь зурул 30-нний жуятува личIи бунни щалвагу ЧIяйннал жяматран ххирасса ххаллилсса муаьллим, бусравсса СултIанахIмадихъал душ Аьбидова СултIанат. СултIанат бувну бур ЧIяйннал шяраву 24-мур июльданий 1942 шинал, сий дусса, уздансса СултIанахIмадил ва Жаннатлул кулпатраву.
СултIанат ниттил лякьлуву бунува ванил ппу – ЧIяйннал колхозрал председатель, коммунист, СултIанахIмади цала хушрай лавгун ур Буттал КIанттул цIанийсса Хъунмасса дяъвилийн, 1942 шинал ахирданий цувагу шагьид хьуну ур.
1961 шинал марцIсса ххювардай ЧIяйннал школагу къуртал бувну, бувххун бур ДГУ-рал физикалул факультетрайн. Дуклакисса чIумал ванил сурат мудангу факультетрал ХIурматрал улттуй диркIун дур. Университетгу къуртал бувну, зий байбивхьуну бур ЧIяйннал школалий физикалул учительницану, 1966 шинал – Дагъусттаннал Обком ВЛКСМ-рал школарттал отделданий инструкторну, гания махъ зий бивкIун бур учительницану личIи-личIисса школарттай.
СултIанат бия ххаллил бакъасса, хъинну ларайсса тарбия дусса, хъиншиврул бутIа ххишалану буллусса, цачIанма кумаг аьркинну бувкIсса дуклаки оьрчIал нитти-буттащал хъинну иминну ихтилат байсса, дакI мусилсса инсан.
Хъаннил мяърипатран кьимат бишлашийни яла яргмур шартIну хъанай дур ласкъатта буруччаву, кулпат тарбия баву. Аьпа баннав цал, Аьбидхъал Мяммал ва Качардул арсналщар СултIанатлуйн «жул душ» бакъа къаучайва. ВайнначIа тачIав хъамал чан къашайва, тачIав ванил сипатрава пиш чан къашайва.
СултIанатлул цила ласнащал, лакрал жяматрачIа бакъассагу, чIявусса дагъусттанлувтураву дугъришиврий оьрму бутлатисса ХIасанхIусайннущал тарбия бувну, ларайсса кIулшивурттугу ласун бувну, щилкIуй махъ къаучинну, цалва-цалва оьрмурдал ххуллийн буккан бувунни ххювагу душ.
ЧIярусса шиннардий СултIанат зий бивкIсса школалул директор МахIаммадова Уммукусум МахIаммадовна укун тIий бур: «Общаться с Султанат было одно удовольствие. В ней сочетались материнская забота и житейская мудрость. Требовательная в первую очередь к себе, она очень добросовестно выполняла долг учителя и воспитателя. Султанат – образец самых высоких моральных человеческих качеств. Она бескорыстно дарила всем свою любовь и заботу. Тепло ее души будет греть наши сердца еще долгие годы».
47 шинай оьрчIахь дарс дирхьусса СултIанат СултанахIмадовнан хIукуматрал лайкьсса кьимат бивщуну бур: Дагъусттаннал КIулшиву дулаврил министерствалул ХIурматрал грамота, РСФСР-данул просвещениялул отличник, 2012 шинал тIурча – «Почетный работник общего образования РФ».
КьурукIинтнил дякъил ццихь ва кьурчIишивугу дакIурдивун дирчуну, хIайп, дунияллия лавгунни цIагу ххуйсса, цуппагу ххаллилсса жул СултIанат. ХIасратрай ливчIунни ванил лас ХIасанхIусайн, душру – Аида, Аминат, Сумайсат, Баният, Наида, уссу МухIуттин, ссу Тамари, буттауссу Аьбид, буттарссу ПатIимат, Загьиди, Пайнусат, куявтал – Сяид, Апанни, Буниямин, Гъази-МахIаммад, Рустам.
Ва бивкIулул кьурчIишиву кIидачIлай, жижара буллай буру ХIасанхIусайннухь, цинявппагу гъан-маччанахь. Ванин бакъамур оьрмулул бутIа душваран, махънан булуннав. Ва къумасса кьурчIишиву духIансса, лялиян дансса ссавур Заннал дулуннав.
СултIанат алжаннул ххари баннав, гьав нурданул дуцIиннав!
ЧIяйннал жяматрал цIания Шалласу Шалласуев
———————————
АЬВДУЛЛАГЬЛУЛ ДУШ КЬуЦМАЕВА ХХАДИЖАТ
Январь зурул 11-нний, оьрмулул 82 шинаву, къашай хьуну, дунияллия лавгунни 1-мур ЦIувкIратусса ххаллилсса хъамитайпа, захIматрал ветеран Аьвдуллагьлул душ Кьуцмахъал Ххадижат.
Мунил щалва оьрму лавгссар буттал шяраву захIмат буллай, киномеханикну зузисса ласнан кумаг буллай. Киномеханик акъагу Кьуцмахъал Рамазан канил пагьмурду чIявусса, къурнил, лухччинул давурттив ххирасса адамина икIайва, аьпа биву. Мунащал хъар дургьуну зийнма бикIайссия Ххадижат, хъинну захIмат байсса лас ва щар бур тIун бикIайва вайннайн шяраваллил жямат.
Ххадижат бия жяматращал бавкьусса, хIалимсса, дакI-аьмал хъинсса хъамитайпа. Ласнащал ххуйну тарбия бувну, дуккин бувна шама арс ва душ.
Кьуцмахъал Ххадижат дунияллия лагаврил кьурчIишиву кIидачIлай, жижара буллай буру мунил арсурваврахь, душнихь, миннал наслулухь, цинявгу мачча-гъанцириннахь.
Цув Алжаннул ххари баннав, рухI хъинний дишиннав!
1-мур ЦIувкIуллал жямат
————————————
ТIАГЬИРДУЛ АРС СЯИДОВ БУДАЙ
Хъунмасса хIаллай къашавайгу ивкIун, захIматсса азардануща ххассал ан къавхьуну, оьрмулул 76 шинаву дунияллия лавгунни 2-мур ЦIувкIуллал шяраву ялапар хъанахъисса ТIагьирдул арс Сяидов Будай.
Увну ур Будай 1937 шинал майрал 27-нний, 2-мур ЦIувкIуллал шяраву. 1955 шинал ЧIяйннал дянивмур даражалул школагу къуртал бувну, дуклан увххун ур Дагъусттаннал ПаччахIлугърал университетравун химиялул ва биологиялул факультетрайн. 1960 шинал мугу къуртал бувну, зий айивхьуну ур Ккуллал дянивмур даражалул школалий химиялул ва биологиялул учительну. Микку 3 шинай зийгу ивкIун, зана хьуну ур буттал шяравун. Зий ивкIун ур 2-мур ЦIувкIуллул дянивмур даражалул школалий химиялул ва биологиялул учительну, 1978 шинал директорнал заместитель хьуну ур.
Будай ия хIакьсса учитель ва тарбиячи, ванал дарс дишаврил методика дия ляличIийсса, оьрчIан гъира багьансса, хIаз дизансса куццуйсса. Учительну зузиссаксса хIаллай Будайл дурну дур ххуй чулиннай школалул цIагу, сийгу гьаз дансса чIярусса давурттив. Ванал дарс дирхьусса оьрчIал бувгьуссар 1-2-ми кIанттурду райондалул олимпиадарттай бикIу, республикалулминнуй бикIу. ДакI марцIну бивхьусса захIматрахлу хIукуматрал чулухату Будай лайкь хьуссар чIярусса бахшиширттан ва грамотарттан.
Ванал ларсъссар «Отличник народного просвещения», «Заслуженный учитель Республики Дагестан» тIисса бусравсса цIарду. 2001 шинал зий ивкIссар школалул партийный организациялул секретарьну.
Махъсса шиннардий Будай зий уссия шяраваллил администрациялул бакIчину. Администрациялул бакIчину зузиссаксса хIаллай дурну дур чIярусса жяматран хайр бусса давурттив, архсса манзилданийх шяравун щин дурцуну, жяматран хъуннасса рахIатшиву дурну дур, школалий дурну дур парданий зузисса отопление, шяраву зузи дурну дур хьхьичIра къадиркIсса телевидение.
Чув, ци даврий зий унугу, Будайл ккаккан бувссар цува хъинну кIулшиву дусса, аькьлу бусса, даву дачин дан кIулсса каялувчи, аьркиннал чIарав ацIан хIадурсса, уздансса адамина ушиву. Ванал сурат цимирагу шинай лархъун диркIссар «Маяки Кулинского района» тIисса райондалул хIурматрал улттуй.
Ва ия ялагу хъамал хъинну ххирасса инсан, ва сагъсса чIумал икIу, къашавайни икIу, сайки царагу кьини къаларгссар ванал къатлувун хъамаличу къаувхсса.
Ялагу ванал цала ххирасса кулпатращал 50 шинал мутталий хъунигу бувну, чивун буккан бувну бур 2 арсгу, 4 душгу.
Будай дунияллия лагаврил кьурчIишиву кIидачIлай, жижара буллай буру ванал кулпатрахь, арсурваврахь, душварахь, гъан-маччаминнахь.
Цал бунагьирттал аьпа баннав, гьав нурданул дуцIиннав, алжаннул ххари аннав.
Гьалмахтал, ванал
дарс дирхьусса оьрчIру, ва ххирами цинявппагу
—————————
ЖАППАРДУЛ АРС РАШИДОВ ХIАНЗА
Декабрь зурул 30-нний, оьрмулул аргъираву, хар-хавар бакъа, лавмартсса канища оьрмулуцIа хьунни ЦIуйшиял шяраваллил ттарцI, ур учинсса инсан Рашидов ХIанза.
ХIанза увну ур 1971 шинал Ккуллал райондалий ЦIуйшиял шяраву. ЦIуйшиял шяраву 8 классгу къуртал бувну, Вихьуллал дянивмур даражалул школа бувккуну бур лавайсса кьиматирттай. Военкоматрал тIайла увккун, Буйнакскалий къуртал бувну бур автошкола, аьралуннаву къуллугъ бувну бур Бакуй. Цала бурж лавхъун учIайхту, зий уссия колхозраву, ниттин кумаг буллай.
Цала дакIнин лавсъсса чIаххувдуш Музиратгу бувцуну, чIал къавхьуну ивзуна Гьанжилив. Азирбижаннал дазуй таможнялий зий уссия, хIурматрайгу уссия цащала зузиминнал дянив. Зий унува, заочнайну ккалай, ларсуна ларайсса кIулшивугу. ХъинмуничIагу, оьмуничIагу ХIанза цалчинмая. ЧIявуссия мунал дустал, гьалмахтал. ХIанзал хIалимсса, дугърисса ихтилатрал махъру гьарицаннан дакIний личIайссия. Цува шагьрулий ялапар хъанай унугу, буттал кIанттущалсса дахIаву чан къадуруна. Шяраву хъанахъисса гьарицагу ишираву чIарав ацIайва, кумаг байва.
ЛичIи унни жуятува ххаллилсса чув, щакъаливххунма кьабивтун жагьилсса кулпатгу, мюрщисса оьрчIругу.
ХIанза аьпалул шаврил дазу-зума дакъасса кьурчIишиву кIидачIлай, жижара буллай буру кулпатрахь Музиратлухь, ссурваврахь Ххадижатлухь, Сарахь, Имашахь, душваврахь Загьрахь, Жумяълухь, арснахь Жаппардухь ва махъсса цинявппагу гъан-маччаминнахь.
Ва кьурчIишиву духIансса каши зухьхьун Заннал дулуннав, Алжаннул ххари аннав, гьав нурданул дуцIиннав.
ЦIуйшиял жямат, дустал, гьалмахтал
———————————————————
СЯИДЛУЛ АРС ГУЙДАЛАЕВ ХIАМЗАТ
Январь зурул 30-нний, 30 шинал оьрмулуву, чIун дакъасса бивкIулул жуятува личIи унни ххаллилсса лаккучу, аькьлу-кIулшилул ва яхI-къириятрал увччусса, дакI-аьмал бавкьусса, жяматраву, гъан-маччаминнаву, цува кIулминначIа хIурмат лавайсса, дакI хъинсса, Вихьлиятусса Гуйдалаев ХIамзат, Ккуллал муниципал райондалул Депутатътурал Собраниялул Председатель.
Увну ур ХIамзат 1983-ку шинал апрель зурул 17-нний Вихьлив Гуйдалаев Сяидлул ва Маржанатлул кулпатраву. 2000-ку шинал ХIамзатлул мусил медальданущал къуртал бувну бур Ваччиял дянивмур даражалул школа. Яла дуклан увххун ур Краснодар шагьрулийсса лавайсса авиациялул институтравун (2000-2003ш.). 2003-ку шинал увххун ур дуклан ДГУ-рал экономикалул факультетрайн. 2008-ку шинал университет къуртал бувайхту зун ивкIун ур Федерал казначействалул отделениялий кIани-кIанттал бюджет щурущи байсса 1-мур категориялул специалистнал къуллугърай.
2010-ку шинал октябрь зуруй Гуйдалаев ХIамзат увчIуну ур Ккуллал муниципал райондалул Депутатътурал Собраниялул Вихьуллал шяраваллил чулухасса депутатну. Гава зуруй ХIамзат увчIуну ур Ккуллал райондалул Депутатътурал Собраниялул Председательну. ХIамзатлул бур кулпат ва кIива мюрщисса душ.
ХIамзат жуятува личIи шаврил пашманшиву кIидачIлай, дакIнийхтунусса жижара буллай буру ванал кулпатрахь Зинахь, ниттихь Маржанатлухь, буттахь Сяидлухь, уссурваврахь, ссурваврахь ва гъан-маччанахь. ХIамзатлун бакъасса оьрму ванал кIивагу душнин булуннав. Бунагьирттал аьпа буваннав, рухI кIукIлуний дишиннав. Гьав нурданул дуцIиннав. Алжаннул ххари уваннав.
Ккуллал райондалул жямат
———————————————
МАХIАЛ АРС ЦIИМПАЕВ СЯИД
Январь зурул ахирданий, оьрмулул 77 шинаву, аьпалухьхьун лавгунни ДР-лул шяраваллил хозяйствалул лайкь хьусса зузала, захIматрал ветеран, лайкьсса зунтталчу ЦIимпаев Сяид МахIал арс.
Сяид увссар Хъусращиял шяраву. Шяраву школагу къуртал бувну, дуклан увхссар Ленинградрайсса шяраваллил хозяйствалул академиялувун, экономикалул факультетрайн. Академия къуртал бувну махъ къуллугъ буллай ивкIссар Совет аьралуннаву дазу дуручлачиминнал кьюкьраву.
1970 шинал Сяид кулпатращал ивзссар Тарумовкаллал райондалийн. Муния гихуннай Тарумовкаллал район хьуссар ванал кIилчинмур ватанну. ЗахIматрал ххуллу байбивхьуссар райкомрал экономистшиврия. Гихунай зий ивкIссар райондалул халкьуннал ялув бацIаврил комитетрал хъунаману, Кочубейллал КПСС-рал парткомрал секретарьну, Тарумовкаллал райондалул администрациялул пишакарну.
Совет заманалул язими идеаллай, дагъусттаннал аьдатирттай тарбия хьусса хIакьсса зунтталчу Сяид МахIадович Тарумовкаллал райондалул жяматран бусрав хьуссар жаваблувшинна ххисса, сакиншинначинал бюхъу бусса, лавайсса даражалул пишакар хIисаврайгу, гьарцагу ишираву халкьуннал чIарав ацIан хIадурсса инсан ушиврийнугу. Тарумовкаллал райондалул больницалул хIакин Изумрудлущал, цайминнангу эбратранну, тарбия бувссар арс ва душ. Ххаллилсса лас, ппу, маччачу, лавайсса даражалул пишакар акъассагу, Сяид МахIадович ия цува кIулцириннал дакIурдиву чаннасса аьпа кьабивтсса вихшаласса гьалмахчугу, дакI тIайласса дус-ихтиваргу.
ДакIнийхтунусса хъуннасса кьурчIишиву кIидачIлай буру Сяид МахIадовичлул кулпатращал ва цинявппагу гъан-маччацириннащал.
Хъусращиял жямат
———————————————-
МАХIАММАДЛУЛ ДУШ АЬБДУЛЛАЕВА МАРЗИЖАТ
Гьашину январь зуруй, оьрмулул 85 шинаву, аьпалухьхьун лавгунни ххаллилсса зунттал хъамитайпа, ГьунчIукьатIатусса АхIмадов МахIаммадлул душ Марзижат. Ва бувну бур 1929 шинал мадара дурккусса арцул усттарнал кулпатраву.
Ччяни ппугу яла лавгун, 4 оьрчI къашавайсса ниттихун багьну бур. 1943 шинал хъунама уссу 18 шинаву цала хушрай дяъвилийн лавгун ур. МарцIсса ххювардай дуклакисса Марзижатгу, 6-чинмур классгу кьабивтун, колхозравун зун лавгун бур. Таний ва хьхьичIунсса зузалашиврий вания кказитрай чивчуну бикIайва. ХьхьичIунсса доярка хIисаврай, Марзижатлун дуллуссия цIанихсса мусил ссят, хъазамраву лачIайсса ВДНХ-лул значок. Сакъатсса ниттил кумагчи хьуну, ванил цила чIивима уссугу, ссугу ччаннай бацIан кумаг бувссар. Ххишала бакъа захIмат ххирасса, гьарманащалгу хIал бавкьусса бия ва.
1957 шинал ва щар хьуна Гъумучатусса Аьбдуллаев ЦIаххуй Кьадинал арснан. Шиккугу ва зий бия цал нис дайсса заводрай, яла Сберкассалий. Марзижатлул цила ласнащал 4 арс хъунигу бувну, чивун буккан бувуна. КIия арс Москавлий бур ххуйсса давурттай зий.
Лайкь хьуна Марзижат медальлан ва хIурматрал грамотарттан.
Марзижатлул бивкIулул кьурчIишиву кIидачIлай, жижара буллай буру ванил арсурваврахь, уссурваврахь, ссил оьрчIахь, ссурахъаврахь, цинявппагу гъан-маччаминнахь. Цил бунагьирттал аьпа баннав. РухI хъинний дишиннав.
ГьунчIукьатIрал ва Гъумучиял жямат
——————————
АБАЧАРАЛ ДУШ АЬЛИЕВА ХАЛУНКАЧАР
Уттигъанну, личIину хъунмасса хIаллай къашавайгу къавхьуну, оьрмулул 88 шинаву, аьпалухьхьун лавгунни щала оьрму захIмат буллай лавгсса зунттал хъамитайпа Аьлиева Халункачар.
Халункачар бувну бур ГьунчIукьатIрал шяраву 1925 шинал.
ГьунчIукьатIрал школалий 6 классгу къуртал бувну, гихунмаймур оьрму колхозраву зий лавгун бур, пенсиялийн букканнин. Цила оьрмулул гьалмахчу, цIанихсса найрдучи Аьлиев Расуллущал Халункачардул лайкьну тарбиягу бувну, чивун буккан бувну бур 3 арс ва 3 душ. Халункачар хъанай бур дяъвилул ва захIматрал ветеран. Лайкь хьуну бур цаппара медаллан ва хIурматрал грамотарттан. Махъсса шиннардий Халункачар Къизлардал райондалий арсначIа ялапар хъанай бия. Чув бухьурчангу Халункачардул хIурмат ГьунчIукьатIрал жяматрачIа бусраврай бия. Цила аманатрайн бувну, Халункачар ГьунчIукьатIув бувччунни.
Ванил бивкIулул кьурчIишиву кIидачIлай, жижара буллай буру ванил арсурваврахь, душваврахь, уссурссуннахь, цинявппагу гъан-маччаминнахь.
Цил бунагьирттал аьпа баннав, рухI алжаннул ххари даннав.
ГьунчIукьатIрал жямат
—————————
Хъуннасса кьурчIишиву кIидачIлай, жижара буллай буру жухьра дарс дирхьусса учительтурахь Касаев АхIмад ТIагьирдул арснахь ва Наида ХIусайннул душнихь, щалвагу агьлу-авладрахь вайннал аьзизсса душ
Кристина
жагьилсса оьрмулий чIун дакъасса бивкIулул жуятува личIи баврийн бувну. Кристинан бакъасса оьрмулул бутIа мунил душнин, зунма цинявннан ххи бувну лякъиннав Заннал. Му къумашиву духIансса ссавургу дулуннав зухьхьун Аллагьнал. Кристинан пирдавс-алжан нясив баннав, гьав нурданул дуцIиннав.
Зиябуттин ХIажимирзаев, Роман Аьбдуллаев, Загьрани Аьбдуллаева хIаласса щалва классрал оьрчIру – душру
ш. ГьунчIукьатIи
—————————-
Бусравсса шяравучу
Сяид МахIал арс
аьпалухьхьун лагаврил жижара буллай, дакIнийхтуну кьурчIишиву кIидачIлай буру ванал кулпатращал Изумрудлущал, арсурвавращал ва щалва агьлу-авладращал.
Махъминнал оьрмурдай барачат бишиннав. Сяидлул рухI хъинний дишиннав, Алжаннул ххари аннав. Амин.
Дустал, гьалмахтал
