Вай гьантрай жулва билаятрай лахъа-хъунну кIицI ларгунни Ленинград фашистътурал блокадалуща щаллуну мурахас бувну 70 шин хьусса дата. Мунин хасну цикссагу батIавуртту хьунни Санкт-Петербург шагьрулийгу.

Дагъусттаннаясса делегациягу гьуртту хьунни Санкт-Петербурграй январьданул 26-нний Пискаревский мемориал хIатталлий хьусса батIавривух. Делегациялул бакIчину ивкIун ур Санкт-Петербурграйсса Дагъус­ттаннал вакил ХIасан ХIасанов. Му пашмансса батIавривух ялагу гьуртту хьуну ур Конституцион судрал судья ХIадис ХIажиев, цала коллективращал, ДР-лул ЗахIматрал ва соцразвитиялул министерствалул зузала МахIаммад Жамаев. Дагъус­ттанная му иширавух гьурттушинна дуван лавгун бур блокадницахъул Марина Владимировна Бесалова ва Ирина Владимировна Сухомлинова.
Подполковник Сергей Вовклул каялувшиннаралусса аьрали оркестрданул Аьрасатнал Федерациялул гимн рурцуну махъ, блокадалул аьра­тталсса метрономрал кьутIлихун, делегациярду куннил хъирив ку лавгун бур Ниттил-Ватандалул монументрачIан – цинярдагу къумасса ниттихъал лишандалучIан. Микку тIутIив дирхьуну дур АьФ-лул Федерал Собраниялул Федерациялул Советрал председатель Валентина Матвиенкол, Санкт-Петербургуллал губернатор Георгий Полтавченкол, Ленинградуллал областьрал губернатор Александр Дрозденкол, ХIукуматрал члентурал, Санкт-Петербург шагьрулул ва Ленинградуллал областьрал парламентирттал депутатътурал, АьФ-лул Президентнал СЗФО-райсса (Северо-Западный федеральный округ) вакил Владимир Булавиннул, АьФ-лул ПаччахIлугърал Думалул, АьФ-лул Конституцион судрал, Санкт-Петербургуллал Уставной суд­рал, Аьрасатнал Аьрали-Хьхьирил флотрал агьаммур командованиялул, Санкт-Петербургуллал Жяматийсса палаталул ва чIярусса цаймигу идарарттал вакилтурал, ветерантурал ва блокадниктурал.
Ва батIавривух гьуртту хъана­хъисса гьарцагу инсаннай диркIун дур «блокадалул» лиссу ларчIун.
Блокадалувусса Ленинградрахлу талай бивкIсса Дагъусттаннаясса аьраличултран хас дурмур мармарчарил улттучIа Дагъусттан Респуб­ликалул Санкт-Петербурграйсса Вакилханалулмур делегациялулгу дирхьуну дур тIутIив. ДакIнийн бивчуну бур цалва ватанлувтал: Совет Союзрал Виричунал цIанин лайкь хьусса Юсуп Акаев, цал цIагу мусил хIарпирдай чирчусса Монументрал аьпалул залдануву, Шагьмардан Шахбазов, ХIасан ХIасанов, МахIарам Керимов, Нурмет Сапар­аьлиев, МихIраб Ибрагьимов ва чIявусса цаймигу.
Шиккува кIицI лаган, Пискаревуллал хIатталу хъанай дур дунияллийсса яла хъуними мемориал комплексирдавасса ца. Хасъсса ккаккан бавурттайн бувну, блокада диркIсса 900 гьантлул дянив шикку уссушиврийсса 186 гьаттаву увччуну ур 420 азара инсан, дякъил, ккашил, бомбардалу ва бита-ххитавурттаву ивкIусса. Миннувух дагъусттанлувталгу.
Ва хIатталлий бусса бур Аьпалул Аллеягу, цувгу 1996 шинал бувсса. Му чIумал Санкт-Петербургуллал губернаторнал хIукмулийн бувну, шикку дацIан дурну дур Белоруссиянавасса 12 азара чIава жагьилнан – Ленинградуллал ремесленный училищардаву дуклай бивкIсса, хас дурсса стелла. ЦIанасса чIумал Аьпалул Аллеялий дусса дур 82 аьпалул ула. Миннувух – блокадалувусса Ленинград буручлай бивкIсса дагъусттанлувтуран хас дурмургу.
Ва кьини аьпалул батIавуртту хьуну дур Санкт-Петербургуллал цаймигу хIатталлай, Буттал КIанттул цIанийсса Хъунмасса дяъвилий, блокадалул Ленинградрахлу талай бивкIсса цаймигу вирттал бувччусса кIанттурдай. Миннувухгу гьуртту хьуну бур цикссагу жула дагъус­ттанлувтал.
Ва иширан хасну Санкт-Петербург шагьрулий мукунна тIиртIуну дур выставкарду, инсталляциярду, хьуну дур культуралул мероприятиярду, аьрали парадру, хьхьурай тIурча – салют.
ХIадур бувссар Бадрижамал Аьлиевал