Цалчин мукунсса вечер хьунни Аьрасатнал Федерациялул ПрезидентначIасса Дагъусттан Республикалул Вакилханалуву, хъирив тIурча — Миллатирттал къатлуву. Вай вечерду Мурад МахIаммадовичлул хас дунни цала дус Расул ХIамзатовлун 90 шин шаврин ва итххявхсса, гьунар бусса оьрчIан Дагъусттаннай тIивтIусса школалун 5 шин шаврин.

Вай хьунабакьавур­ттайн бавтIун бия хъи­нну чIявусса халкь: АьФ-лул ПрезидентначIасса Дагъусттаннал Вакилханалул зузалт, Москавливсса Дагъусттаннал интеллигенция, ишбажаранчитал, банкиртал, культуралул министерствалул департаментрал вакилтал ва цаймигу. ЩябикIансса кIану бакъа, чIявуми бавцIуну бия. Махъру лавхъун, ихтилатру бувну махъ, махъ буллуна Мурад МахIаммадовичлухьхьун. Ванал бувсунни Дагъусттаннай гьунар бусса оьрчIансса школа тIитIинсса пикри цанма цукун хьуссаривгу. Мукунсса школалия мунан бавну бия Американаву хъамалу усса чIумал. Ватандалийн зана хьуну махъ ванал хIадур бувну бур мукунмасса школа МахIачкъалаливгу тIитIаврил ялувсса республикалул каялувшиннарачIансса сипта. Га чIумал президентну ивкIсса МухIу Аьлиевлул личIлулну вичIидирхьуну Мурад МахIаммадовичлух, бигар бивхьуну бур Культуралул министерствалий ва даву щаллу дуван. Гания шиннай ларгунни ххюра шин. Гьунар бусса, итххявхсса оьрчIансса Мурад Къажлаевлул цIанийсса школалия бувсун махъ, бавтIминнал ххалдунни му школалиясса фильмгу. Муних бурувгминнан чIалай бия му школалул даву лавайсса даражалий най душиву, му тIитIингу хъинну хъунма­сса захIмат бивхьуну бушиву. Муния махъ артистурал кка­ккан бунни музыкалул номерду. Ххишала дакъа ххаллилсса дуэт дия ДР-лул халкьуннал артист Мурад Абуевлул (скрипка) ва ДР-лул лайкь хьусса артистка Диана Увайсовал (фортепиано). ВичIидирхьуминнал гурсса хъатру ришлай, ми ялагу, ялагу буккан бувна. Миннал хъирив Мурад МахIаммадовичлул баян бувна «Гуниб» вокалданул ансамбльданул номер. Му ансамбльданул увкунни Аьрасатнал ва Дагъусттаннал композитортурал чивчусса личIи-личIийсса мазурдийсса балайрду. Мигу вечерданийн бавтIминнал гурсса хъатурдийну хьунабавкьунни. Тамашачитурал дакIурдиву ляличIийссава асарду кьабивтунни нотарду дакъана Мурад Къажлаевлул произведенияртту пианинолий щаллу бувсса, Великобританиянаву ялапар хъанахъисса, японнал пианистка Чисато Кусунокил. Сайки мукьцIалла минутI хьунни ванил пианино бишлай, бавтIминнал ялагу тавакъю буллай, макьанну руцлай.
Артистурая махъ бавтIминнал хьхьичIун бувккуна Миллатирттал къатлул исполнительный директор. Мунил лавайсса кьимат бивщунни артистуран ва гьарцаманан дуллунни ХIурматрал грамотартту ва бахшишру. Мукунма лавайсса кьимат бивщунни итххявхсса оьрчIансса музыкалул школалул каялувчи Мурад МахIаммадовичлулмур даврингу.
Цала Мурад МахIамма­довичлул 63 шинни Дагъусттаннал цIа дунияллий лахъ дуллай, бюхттул дуллай. МуначIанмур хIурматгу, мунал бусравгу Москавлив ххишала бакъа хъунмар. Ва кIану тасттикь буллалисса мисаллугу чIявусса буцин хьунссар. Бусанна ца иширая. Буттал КIанттул цIанийсса дяъви къуртал хьуну, Ххувшаву ларсун 60 шин хъанахъисса байран дуван хIадур хъанай бия Москавлив Поклонная горалий. Дунияллул циняв билаятирттаясса хъамаллурайн оьвкуну бия, жула кьуватгу, гужгу, обороноспособностьгу ккаккан дуван. Га чIумал президентну ия Б. Ельцин. АьФ-лул ХIукуматраву гьаз хьуну бур му байрандалул музыкалулмур бутIуй каялувшиву дуванманал ялувсса масъала. Цанна бавми кандидатурардава президентнал язи дургьуну дия Мурад МахIаммадовичлулмур цIа. Му Дагъусттаннансса хъунмасса пахруя, щалвагу Аьрасатнава жула дагъусттанлув язи угьаву. Щалла дунияллийгу Дагъусттан кIулссар Расул ХIамзатовлул прозалийну ва Мурад Къажлаевлул музыкалийну.
Къажлаев Мурад увну ур цIанихсса хIакиннал кулпатраву. Мунал ппу Къажлаев МахIаммад зий ва ялапар хъанай ивкIун ур Азирбижаннаву Бакуй. Лор-хIакин, профессор, медициналул элмурдал доктор Къажлаев МахIаммад ацIрахъул шиннардил мутталий цалла отпус­калий, цамур кIанайн къалавгун, учIайсса ивкIссар аьзизсса Гъумукун. Щалла Лакрал райондалия­сса инсантал муначIан кумаграл, консультациялул хъирив бучIайсса бивкIссар. Мунал ми уква хъин байссагу бивкIссар. Лакрал райондалул администрациялул ва ДР-лул ЦIуллу-сагъшиву дуруччаврил министерствалул МахIаммад Къажлаевлул даврин кьимат бишлай, мунал цIа дуллуссар райондалул больницалун. МахIаммадлун ччай бивкIссар арсгу цала шаттирдайх лавгун, мунаягу хIакин хьуну. Амма музыкалул гьунар тIабиаьтралва буллусса Мурад дуклан увхссар Неязбековлул цIанийсса Бакиннал консерваториялувун, хъинну хъуннасса конкурсравухгу увккун (ца кIанайн — 50 инсан). Му консерватория хъанахъиссар яла сий думи музыкалул дуккаврил идарарттава­сса цану. Бакиннал консерватория бувккуссар цIанихсса, лайкь хьусса артистурал, Рашид Бейбутов, Бюль-Бюль-Оглы, Муслим Магомаев, Мурад Къажлаев кунмасса. Лавайсса даражалий консерваториягу бувккуну, Мурад Къажлаев зана хьуссар Дагъусттаннайн. Цин лар­хьхьусса чIун ларгун махъ, ххаллилсса даврихлу, увчIуссар Дагъусттаннал Композитортурал союзрал председательну. Махъ Совет Союзрал Композитортурал союзрал оьвку­ссар Мурад МахIаммадовичлуйн Москавлив зун, Ю. Силантьевлул цIанийсса оркестрданул каялувчину ва хъунама дирижерну зун. Аваданни Мурад Къажлаевлул биография, му щалва буслан цIана къахьун­ссар. Шиккурив кIицI лаган ччива ца кIану. Бакуй буссар цIанихсса инсантурал Аллея. Муний буссар Муслим Магомаевлул бюст, мукунма машгьурсса цайминналгу. Мурад Къажлаевлул 63 шинал лахъишиврий дурсса давурттиврив къачансса дур. Ттул пикрилий, Мурад МахIаммадовичгу лайкьссар цал цIа абад даврин. Ва кIанттух ДР-лул каялувшиннарал, Культуралул министерствалул къулагъас данссар тIисса умуд бур.
Хъунмар Къажлаевхъал тухум, цил арсру ва душру зузисса личIи-личIисса хъин-хъинсса къуллугъирттай. Минная гьарцаннаягу шикку буслан къахьунссар.
Москавливсса дагъус­ттан­лувтурал цIания дакI­нийх­тунусса барчаллагь учин ччай ура Мурад МахIаммадовичлухь, творчествалул даврихлу, цалла кIулшивуртту ва опыт махъа нанисса никиран буллалаврихлу, цIу-цIусса гьунарду ялун личин буллалаврихлу, Да­гъусттаннал культура ларай дуллалаврихлу. ЧIа тIий ура уттигу чIярусса шиннардий аьзизсса Дагъусттаннал цIаний зун, занансса каши-кьудрат, цIуллушиву. Барчаллагь вин, Мурад МахIаммадович, ва аьрщарай ина ушаврихлу.
МахIаммад Якьубов, ш. Москав