«Дагстройэкспо» цIанилусса строительствалул ва архитектуралул форумрайнсса хIадуршиннаран хас дурсса совещание хьунни январьданул 30-нний, ДР-лул строительствалул, архитектуралул ва ЖКХ-лул министр Муса Мусаевлул каялувшиннаралу.

Совещаниялул давривух гьур­ттушинна дунни ДР-лул строительствалул, архитектуралул ва ЖКХ-лул министрнал цалчинма хъиривчу МахIаммад ХIусмановлул, хъиривчутал СалахIуттин Тагиевлул ва МахIаммад Аьбдулкаримовлул, Дагъусттан Республикалул хъунама архитектор Увайс Камаловлул, «Выставки Дагестана» программалул координатор Булат Маммаевлул.
Ва батIаврий ххалбивгьунни строительствалул ва архитектуралул форум лавайсса даражалий тIайла буккаврицIун бавхIусса масъалартту. Булат Маммаевлул мукъурттийн бувну, форум баврил программалул проект хIадур дурну, пландалущал архIал дулун най бусса бур ДР-лул ХIукуматравун цIакь даншиврул. Программа хIадур давриву вайннал хIисавравун лавсун бур ва журалул давуртту дуллайна цайми регионнай ва чил билаятирттай дуллай бивкIсса давурттал опыт.
Сакиншинначитурал сипталийн бувну, ва форумрая хьун аьркинссар строительствалул, архитектуралул ва ЖКХ-рал аралувусса специалистурансса пишакаршиврул майдан, цийгу бюхъантIисса опыт кIибачIин, строительствалул рынокрал каширдащал ва уттизаманнул технологиярттащал кIул хьун, уртакьшиврийсса зузаврил цIу-цIусса дахIавуртту дуван ва республикалийн инвестортал кIункIу бан.
Пландалийн бувну, форум хас дуван тIий бур республикардал шагьрурдал ва районнал архитектуралул диц-куц ххуй даврин, къатри бавривусса уттизаманнул цIушиннардищал кIул шаврин.
Форум сакин хьуну бикIан най бур личIи-личIисса мероприятиярттая, миннувух – выставкардугу, дискуссиялул майданнугу, семинарду, «ккуркки столлу» ва конференциярду.
Выставкардай ккаккиялун дирхьуну дикIан тIий дур личIи-личIийсса техника, машинартту ва цамур. Ми цимурцаннунсса павильонну хIадур буллан най бур.
Выставка цурда дансса кIанугу дайдихьулий кIива кка­ккан бувну бивкIун бур: ца — Расул ХIамзатовлул цIанийсса Миллат­рал библиотека, вамургу — «Кас­пий — ЭКСПО» выставкардал центр. Амма, Булат Маммаевлул пикрилийн бувну, ва даву Миллатрал библиотекалувура дарча хъинни, цанчирча инсантуран выставкалийн гьан, бучIан бигьасса, гъансса кIану буну тIий.
Къатри баврил ва архитектуралул форум хьун тIий бур ва шинал апрель зурул ахирданий. Мунивух гьуртту хьун най дур ттуршунния лирчусса фирмарду. Мунийн оьвчин тIий бур Аьрасатнал чIяруми субъектирдаясса, хъунмурчIин Кьиблалул Федерал ва Ухссавнил Ккавкказуллал Федерал округир­ттаясса вакилтурайн, ми округир­ттал каялувчитурайн.
«Дагстройэкспо» строительствалул ва архитектуралул форумрал сакиншинначитурал умуд ва мурад бур ва даву лавайсса даражалий щаллу дувансса.