Январьданул 21-нний Дагъусттаннал журналистътал ва блогертал хьунабавкьунни жулла республикалийн увкIун ивкIсса этнотурист, фотограф Иван Дементьевскийщал. Пресс-конференциялий Иваннул бувсунни цува республикалийн учIаврил хIакъираву.

ХIасан Аьдилов
Ганал бувсмунийн бувну, Да­гъусттаннайн утти кIилчинни увкIсса. Иван Ухссавнил Ккавкказуллал республикарттайн лагайсса ур этнотурист хIисаврай. Ванал рищайссар суратру ккавкказуллал миллатирттал багьу-бизулия бусласисса, мукунна ласайссар видеокинорду. Масалдаран, дукIу интту Да­гъусттаннайн увкIсса чIумал ванал ларсун дур Бархъаллал шяравусса хъатIул кино. Ванал рищайссар халкьуннал касмурдал суратру ва ласайссар кинорду. ДукIу интту ванал ларсун дур оьргърал усттартураясса кино ва суратру. Ванал ласайсса дур мукунна жулла рес­публикалийсса заповедникирттал суратру, тиккусса нажагь бакъа къахьунабакьайсса лелуххантрал, уртту-тIутIал суратру.
Иван ивну ур гьашину кIинттул 6-7 яруссаннал шяравун. Ванащал лавгун ивкIсса Аьрасатнал ПрезидентначIасса Дагъусттаннал вакилнал кумагчи Вагьабов МахIачлул бувсмунийн бувну, ТIиларатIиял райондалий Иван хъамалу уцлай, ца-ца ба тIий бивкIун бур, амма ярусса махIаттал хьуну бивкIун бур Иваннул хIан дурагу къахIачIайсса духьувкун.
Иван Дементьевскийн суратру заказ дайсса дур Аьрасатнал ТIабиаьт дуруччаврил министерствалул, «Российская газета» кказитрал, Москавуллал оьруснал геог­рафиялул обществалул ва цаймигу организациярдал.
Иваннул мукъурттийн бувну, жучIара дур ххаллилсса тIабиаьт, бигьалаглансса кIанттурду. Га махIаттал хьуну ур Дагъус­ттаннал тIабиаьтрая, личIи-личIисса миллатру бушиврий. «Шикку Да­гъусттаннайгу аьркиншиву дур зулва улча машгьур буллан, туристшиву гьарта-гьарза дуллан, инфраструктура дузал дуллан, шиккун Аьрасатнал цайми регионная бигьалаглан зананшиврул», — увкунни этнотуристнал.