Аьрасатнал Печатьрал кьини ХIукуматрал къатрал хъунмур залдануву премьер-министр Дмитрий Медведевлул, 2013 шинал регионнал СМИ-рдал зузалтрал бувсса захIматран лахъсса кьимат бишлай, дипломру ва премияртту дуллалисса хъуннасса шадлугъ хьунни. Вания жул хьхьичIмур номерданийгу чивчуну буссия.
ХIукуматрал баян бувсса 10 номинациялува «За вклад с коррупцией и преступностью в республике» тIисса номинациялуву ххув хьуну, дипломран ва 1 миллион арцул премиялун лайкь хьуну бур «Свобода слова» ОАО-лул директор Магьди-МахIаммад Камалов, «Черновик» кказитрал отделданул редактор Маирбек Агъаев ва корреспондент МахIаммад МахIаммадов.
Залму АьбдурахIманова
Республикалул журналистикалуву хьусса укунсса ххаришиврия ва хьхьичIуннайшиврия буслай, вай гьантрай ДР-лул Журналистътурал союзрай хьусса хьунабакьаврий Магьди-МахIаммад Камаловлул журналистътуращалсса гьарта-гьарзасса ихтилатраву бувсунни цангу, цал редакциялунгу ва ххишала бакъа ххарисса, вих хьун захIматсса иш бушиву ва яла ларгсса шинал хIукуматрал премия ласунну тIий, буниялагу «кIири-кIирисса, къизгъинсса» материаллал хъирив цив багьну зийгу къабивкIшиву.
— Жу жулла даврийсса, гьарма цала-цала макьаларттаха зузисса, сентябрьданул ца кьини жучIан жуна цинявннангу кIулсса, хIурмат бусса Алик АьбдулхIамидовлул оьвкунни, Москавлий Связьрал ва информациялул министерствалул хIукуматрал премияртту дулунсса пулансса конкурс баян буллай бурча, гьуртту хьияра чара бакъа куну. Жугу хъунмасса пикри-зикри, бакIцIуцIаву къадурну, цIуну итабакьин хIадур буллалисса номерданийнсса макьала ва ялагу цаппара чагъарду тIайла бувкссия. Муниягу хъамабивтун, жула кказитраха зий, ялагу цукссагу хIал хьуна. Ноябрьданул ахирданий ХIукуматрал телеграмма дуркIунни, жу Аьрасатнал премиялун лайкь хьусса баян буллалисса. ЦIубакIрай вих хьун захIматсса, амма дакIнивун пахру бутлатисса асарду бия. Ва ца жул кказитрал гьунар, хIарачат бакъая, ва жул буккултралгу хIарачатри ва щаллагу республикалийсса журналистътурал сообществалул хIарачатри.
Ттул пикрилий, къабучIиссар журналистътал хIукуматрал чул бувгьуминнайх ва къабувгьуминнайх кIи-шан бачIлан. Журналист му щиякIуй къахъарсса, цаманал бусласимунихгу вичIидирхьуну, цалвамур пикри бусан бюхъайсса пишалул заллури.
Ца мукъуйну, январьданул 13-нний жу шамагу увкIру ХIукуматрал къатлувун. Жухьва-жува буру чув-бунугу махъра-махъсса кьюкьлуву, зума-къирагърайсса кIанттурду бухьунссар тIий, хьхьичIунмайвагу къахъанай. Гивун бувххун, гьарма хьунаакьлай, щяитлатиминнал хъирив бавчукун, хьхьичIра-хьхьичIсса кьюкьлуву Дмитрий Медведевлуйн тIайлану щябивтунну. Номинация баян бувну, Дагъусттан Республикалиясса «Черновик» кказит кувкун, дакIниву цирив ца гьанавиххишиву хьуну, дакI асардал дурцIуна. Гикку жу кунма личIи-личIисса номинациярдаву ххув хьусса цайми регионнал журналистъталгу бия. Масалдаран, ларгсса шинал Дальний Востокрай щин ялтту лагавриясса, хъунисса иширттая бусласисса Дальний Востокрал телевидениялул журналистътурал цанна дуллусса арцул премия щиная зарал бивсса, къатта-къушлицIа, думуницIа хьусса халкьуннансса фондрайн кумагран дуллай бушиву баян бувунни тиккува.
КутIану бусан, премиягу ларсун, шадлугърая махъсса фуршетрай цаннащал ца ихтилатирттай буна, гьарначIан гъан хъанай премьер-министрнал цIунилгу барча буллалийни, гайминначIанияр жучIа мадара хIаллайсса авцIуну яхши-хаш бувуна. Жугу сант дирирну дунура: «Дмитрий Анатольевич, жул сайтрайн уххарав?» — куну суал буллуссия. «ТIайлану бусан, премия дулун хьхьичI ци кказит бурив ххал бан увхссияв зул сайтрайн. БувчIунни зула кьянкьасса позиция бусса кказит бушиву. Мукунма гихунмайгу зузияра», — увкунни.
Мукунма Медведевлущалсса ихтилатраву жу кIицI лагарду Аьрасатнал почталул ва печатьрал изданиярттал дянивсса аварашиврул масъалагу. Тиккувасса Минкомсвязьрал министр Никифоровлухь ва масъалалул хъирив лаву куну, тавакъю бувунни премьернал, — бувсунни Магьди-МахIаммад ХIажиевичлул.
— Ссал, цукунсса гьанулий бавцIуну буссар «Черновик» кказитрал хIарачат?
— Цумур-цагу информация, журналистътурал мазрай, чIун гьан дитарча «скоропортящийся товар» хъанахъиссар. Ххюва гьантлуя гихунмайсса информация му цIусса хаварданун ккалли бан къабучIиссар. Информация булайнигу журналистнал га цанма бавсса, цахьва бувсъсса куццуй информация буккучIан биян барча бакъа, цалвамур пикри-зикри ялув бухIлан къабучIиссар. Кказитрай хъунмурчIин хIарачат бувару аналитикалул макьалартту дулун. Яла жун багьай хасъсса информация, бумунил ялунсса информация кIул баншиврул агентътуращалгу дахIаву дуну зун.
Ттул пикрилий, республикалий хIукуматрал ягу щил-бунугу биялдаралу бакъасса ва бусса пресса тIий жува личIи буллангу къабучIиссару. Ва масъалалия Медведевлулгу цалва ихтилатраву «СМИ таксса заллухъруннахьхьун булун аьркинссар» увкунни .
— Жула хIукуматрал чулуха му премиялущал зу барча бавуртту дияв?
— Цалсса бувару ттигу барча буван. ЦIана жула буккултраясса, жува кунмасса журналистътураясса барча бавурттал махъру кьамул буллай буру.
— КьюлтIсса зат бакъар «Черновик» чIа-чIаннин суд-диваннайх лечлачи буллай, тийн-шийн щун бувайшиву. ЧIявуну цукун личару ми иширттава?
— ТIайлассар, ца дело лакьиннин, цамур ялун дирну лякъай. ЧIявуну ххув хьуну буккару. ЦIанагу судрайн буллуну буссару жу, ца макьалалуву экстремизмалул чулийсса махъру бур тIий. Билаятрай яла ххуймур, гужмур экспертътурал комиссия бучIан бувну, гьарца хха ххалбивгьуну цукунчIавсса экстремизмалул чул бувгьусса махъру бакъашиву чIалачIи бувунни. Бурганну гихунмай ссайн буккайрив.
— Ссан харж дан дакIний буру зува лайкь хьусса премия?
— Премиялул арцу жу най дуна дичарду жучIара хIасул дурсса ХIажимурад Камаловлул цIанийсса фондравун. Мартрал дайдихьулий Дагъусттаннал Журналистътурал союзращал цачIу дансса фондрал давурттан харж дансса умуд буссар. Фондрал даву ца жулла республикалий дакъа, мунил кьатIувгу най духьувкун, пикри буссар Ухссавнил Ккавкказуллал СМИ-рдал дяниву конкурсрал номинациярду баян бан. ИншаАллагь, хьунхьуви ва мурадгу щаллу буван.
