Аьдатравун багьсса куццуй, гьарица шинал ахирданий оьрмулуву хьусса дахханашивурттая, асар хьусса, дакIний личIансса иширттая цIухху-бусу бару жу махъ нанисса, сий дусса миллатрал вакилтурахь.
Ва даву дуллалисса чIумал чIалан бикIай гьарицагу инсан, архсса зунттал шяраву ялапар хъанахъимагу, дазул кьатIувмагу, хъунасса къуллугъчигу, укунасса зузалагу миллатрай дакI цIий ушиву, жулва маз, культура дуруччаврил буруккинттарай ушиву.
Укунсса ххаллилсса арсру, душру миллатраву буссаксса, чаннасса бучIантIимунийнсса хьулгу ххишала шай.
Я Аллагь, щалагу миллатран даркьусса, барачатсса шин хьуннав. Жува тIимур Залгу тIий лякъиннав.
Андриана Аьбдуллаева

 
Шарип Шарипов, ДР-лул ХIукуматрал председательнал хъиривчу, экономикалул элмурдал доктор:
2013 шин ттун дакIний лирчIунни республикалул президентнал ттуйнна хъуннасса вихшала дурну, ДР-лул ХIукуматрал хъиривчунал къуллугъ тапшур баврийну.
Гьай-гьай, къуллугърал гьаз шаврийну ттуятусса жаваблувшиннагу гьаз хьуссар. Ттула биялдарайн дагьлагьисса бигьа дакъасса агропромышленностьрал, балугъру буруччаврил, вацIри буруччаврил аралуву утти ттун хъиннура чIалачIи дан багьлай бур ттула кIулшивурттугу, бюхъу-бажаргу, хъиннува хIарачат буллан багьлай бур президентнал командалуву чялишну зун, ттуйнна дурсса вихшала кьукьин къадан.
ХIакьину республикалул агьали чIявусса къювусса масъалартту дузрайн буккан бансса вихшала дирхьуну бур Рамазан ХIажимурадовичлуйн. Ми масъалартту щаллу бавриву президентнал командалувуминнал биялагу хъунмасса бур. Гьамин, ялун багьну зун багьлай бур.
Ларгсса шин дия давуртту щарчусса, учиннуча, ссихI бигьинсса чIун дакъасса. Хьунни личIи-личIисса миллатирттал, пишалул инсантуращалсса хьунабакьавуртту, собранияртту. Ми хьунабакьавуртталгу аьч бунни агьалинал масъалартту ва буруккинтту. Хъиннува асар хьунни ттулла даврил агьамшиву, аьркиншиву, ххишала хьунни агьалинал масъаларттаха зунсса гъира.
Ларгсса шинал дакIний ливчIсса иш мугу хьунни – на увчIунна «Горные территории РД» тIисса Ассоциациялул председательну. Шинал дянив хьунни дазул кьатIувсса аьрххи-ххуллурду. Лавгра Швециянавун, кIийла Германиянавун. Опыт кIибачIлачIисса, ттула даврин мюнпатсса хьунабакьавуртту хьунни вай хIукуматирттайгу.
Цайми билаятирттайн лавгсса чIумал хъиннура асар шай ттула Ватандалухссагу, жула халкьуннахссагу ччаву, жула ляличIишиву. Цуксса хьхьичIуннайсса хIукуматру тай дунугу, дакъар тикку жучIара кунна инсантурал дянив гъилисса, дакIнийхтунусса хIалашиву, куннал куннахсса ччаву, аякьа, цаннал чIарав ца бацIаву, иттату иттав бурувгун аьчухсса ихтилат баву.
Укунма нахIуну, куннан ку бувчIлай личIаннав Дагъусттаннал агьлу.
ЦIусса шин барча дуллай, чIа тIий ура цинявппагу да­гъусттанлувтуран цIушиннарду, тIайлабацIурду, аваданшиву, буллугъшиву, гьарица кулпатраву барачат. Нитти-буттан оьрчIал дард къаккакканнав. ДакIнийсса мурадру бартлаганнав.

 

Зарема Буттаева, ДР-лул культуралул министр:
2013 шин дия республикалул оьрмулуву, хаснува культуралул аралуву хъинну авадансса. Ва шинал иширайну щаллу хьунни жула хIукуматрайгу, дунияллийгу агьамшиву дусса, республикалул, Аьрасатнал ва кьатIаллил билаятирттал СМИ-дай чялав багьну бивкIсса хъуни-хъунисса проектру.
Республикалий кIицI ларгунни кIира агьамсса дата – Дагъусттан Аьрасатнавун бувххун 200 шин шаву ва хъунасса шаэр Р. ХIамзатов увну 90 шин шаву.
Ми иширттацIун дархIусса шадлугърал мероприятиярттугу хьунни республикалийгу, Аьрасатнал шагьрурдайгу. Июль зурул 5-нний Москавлив шадлугърал даражалий тIиртIунни шаэрнан гьайкал. Микку гьуртту хьунни Аьрасатнал Президент Владимир Путин, Дагъусттаннал Президент Рамазан АьбдуллатIипов, ДР-лул Парламентрал председатель Хизри Шихсаидов, Москавуллал мэр Сергей Собянин, Федерациялул Советрал председатель Валентина Матвиенко, АьФ-лул ПрезидентначIасса Дагъусттаннал вакил Александр Ермошкин, шаэрнал дустал, хIукуматрал ва жяматийсса ишккаккулт Евгений Примаков, Александр Дзасохов, СССР-нул Халкьуннал артист Иосиф Кобзон, цаппарасса регионнал каялувчитал, шаэрнал творчество ххирами.
Р. ХIамзатовлул юбилей кIицI лагаву хьунни шиккувамигу, архну, республикалул кьатIув ялапар хъанахъимигу дагъусттанлувтал, мунал творчество ххирасса миллион инсантал цачIун буллалисса ишну. Р. ХIамзатовлул творчество ххираминнан оьрмулухун дакIний личIансса бахшиш дунни «Пери» тIисса чирилул фондрал. Миннал личIи-личIисса билаятирттаясса – Абхазнавасса, Белоруссиянавасса, Израиллаясса, Къазахъисттаннаясса, Китайнавасса ва цаймигу хIукуматирттаясса библиотекарьтурайн оьвкуну, Дагъусттаннайх ца нюжмардийсса этнотур дунни.
Сентябрь зуруй П.С. ХIам­затовал цIанийсса Дагъусттаннал изобразительный искусствардал музейраву тIиртIунни шаэрнан хас дурсса «Завещание» цIанилусса выставка. Художниктурал Союзрал выставочный залдануву тIурча – «Поэт добра и человечности» тIисса Дагъусттаннал художниктурал выставка.
Мукунна шаэрнал юбилейран хас дурсса мероприятиярттал лаг­рулуву хьунни аслисса культуралул фестиваль «Цамаури». Шаэр увсса кьини, сентябрь зурул 9-нний, тIурча, тIиртIунни «КIяла кьурукьру» цIанилусса ХIамзатовлул кьинирду.
Дусшиврул Къатлуву хьусса форумрайн бавтIунни 100-нния ливчусса шаэртал ва чичулт, культуралул ишккаккулт ва билаятрал личIи-личIисса шагьрурдаяссагу, дазул кьатIатуссагу бусравсса хъамал. Октябрь зурул 12-нний Кремлилул съездру бай Дворецраву ларгунни «Мой Дагестан» цIанилусса шадлугърал вечер.
Ялагу ва шин дакIний лирчIунни республикалийн гастроллай билаятрал хьхьичIу-хьхьичIунсса коллективру бучIаврийну. ЖучIанма бувкIунни В. Спиваковлул каялувшиннаралусса «Виртуозы Москвы» оркестр, Н. Сацлул оьрчIал музыкалул театрданул бивхьунни Ш. Чаллаевлул опера «Маугли». Мукунна республикалий ларгунни личIи-личIисса театрдал фестиваллу, цавугу Дагъусттаннал ва Аьрасатнал бакъасса, дазул кьатIаллил коллективругу гьуртту хьусса.
ДакI ххари дансса иш хьунни, Республикалул бакIчи хьхьичIну, шагьрурдайсса ва районнайсса Магьирлугърал къатрал гьанулий сакин бунни 20 Аьрасатнал халкьуннал аслийсса культуралул центрду.
Республикалий ларгунни мукунна аьдатравун дагьсса музыкалул фестиваль «Порт-Петровские» ассамблеи, фестиваль «Каспий – берега дружбы».
Дагъусттаннал культуралул кьинирду хьунни Ставрополлал крайрай, Астраханнал, Ярославрал, Москавуллал, Твердал областирдай.
Ноябрь зуруй Москавлий хьун­ни кIира хъунисса, дакIний личIансса выставкарду.
ЯтIул майданнивсса тарихрал музейраву тIиртIунни «Узоры жизни» цIанилусса Манаба МахIаммадовал выставка, «Коломенское» музей-заповедникраву – «Дагестан глазами Е. Лонсере». Ялун нанисса ЦIусса шин магьирлугърал шинну баян бунни Аьрасатнал Президент В. Путиннул. МуницIун бавхIуну, ялунчIилсса шингу культуралул мероприятиярттал чулуха хъинну авадансса дикIанссар. Хъиривмур шиналгу личIи-личIисса билаятрал, дунияллул даражалийсса фестиваллу, форумру ва выставкартту дансса пикри буссар.
Миннуя цIана къатIунна.
ДР-лул Культуралул министерствалул чулуха ва ттула чулуха барча буллай бура цинявппагу дагъусттанлувтал ЦIусса шинащал. Ва шинал гьарицагу инсаннал оьрмулуву ххуйсса, ххарисса бакъа цичIав къахьуннав. ЧIа тIий бура тIайлабацIу, талихI-тирхханну. Барачатсса, буллугъсса шин хьуннав.

 

Рита Мурачуева, ДР-лул ЦIуллу-сагъшиву дуруччаврил министерствалул хъунмур эксперт:
Ларгсса 2013 шинал ттула оьрмулуву тIааьнну дакIний личIансса ттула дакIниймур бартлавгсса ишру хьунни. Республикалий цIуллу-сагъшиву дуруччаврил даража гьаз хьунни, медициналул аралуву ххуй чулиннайсса дахханашивуртту хьуну. Республикалий зун бивкIунни цIу-цIусса азарханарду, поликлиникарду, ФАП-ру. 2013 шинал бартдиргьунни цIуллу-сагъшиву дуруччаврил модернизациялул Программа. Ххарисса ишру хьунни ттула кулпатравугу. Кулпатри ттул оьр­мулул мяъна-мурад, ттул къинтта, чул бищай кIану. Кулпатравусса ххаришивурттал гьавас бувтун хъару ххяххан дурсса кунма, лехлахи бувара. Ттул арс ХIасан хIакин-травматологну цIакь хьунни. Душ Фарида, ординатурагу къуртал бувну, цила пишалий зий байбивхьунни. ЧIивимур душ Жамиля ца шинал хъунма хьунни. Ци пиша язи бугьанссарив пикри буллай бур. Ласгу, навагу ларгсса шинал бава-ттатта хьуру – ХIасаннул ва Гьумайл арс увну жун ххуйсса бахшиш дунни. Мунан ххаллилсса Мурачуевхъал агьулданунгу, кулпатрангу ттарцIну хьусса ттула ласнал цIа дизарду. Муниягу дакIниву хъуннасса ххаришиву дур.
Гьарицагу инсаннал оьрмулуву укунсса ххаришивуртту чан къаданнав. ОьрчIал оьрчIру буллай, жула наслулия ххари хъанай битаннав.

Щукрулий бикIанну ва дунияллий
Жува лявхъуну тIий
хъунасса Заннайн,
Оьрмулул неъматру
жунма кIулну тIий,
Урттугу, тIутIивгу
давран буну тIий.

ЧIа учинна зунгу так цIуллушиву,
ТалихIсса, ххарисса,
чаннасса шинну,
Бургъил гъилишиву,
щинал марцIшиву
Барча, ххирасса лак,
ЦIушинал хIукъу!

 
Муслим Даххаев, ДР-лул УФСИН-лул хъунама, виваллил службалул генерал-майор:
— Ларгсса шинал республикалул оьрмулуву чIярусса дахханашивуртту хьунни. Ивтунни цIусса президент, мунал салкьи дунни респуб­ликалул агьамсса масъаларттаха зунсса цIусса команда. Ттула сис­темалувугу евростандартирттайн букIлакIаврицIун бавхIуну тамансса давуртту дарду дуснакь бувминнан ттизаманнул тIалавшиннардаха лархьхьусса шартIру дузал дан. Сайки циняв жула идарартту цIубуккан бувну, бакьин барду.
ТIааьнну дакIний личIансса иш хьунни, хьхьичIунсса подразделение хIисаврай, нава каялувшиву дуллалисса Дагъусттаннал ФСИН-лул управлениялун Ттугъ булаву. Москавлия Аьрасатнал ФСИН-лул хъунаманал цалчинма заместитель В. В. Цатуров увкIун, му ттухьхьун шадлугърал даражалий буллунни. Ва ишгу жула даврин, ттула зузалтрал бихьлахьисса захIматран хъунмасса кьимат бищаврин ккалли буллай ура. Сант дирирну дунура, ттун барча бан ччива ттула коллегахъул – цIанамигу, нава ЦIуссалакрал РОВД-лул хъунаману усса чIумал архIал зий бивкIмигу ЦIусса шинащал.
Хаснува барча бан ччива къуллугърал бурж бартбигьлай къучагъшиврий жанну дуллусса ЦIуссалакрал милицалтрал кулпат­ру, оьрчIру, уссурссу.
Уттиния тихунмай зул оьрмулуву пашмансса лахIза къахьуннав, зун ссалчIав буруккин къабагьаннав. ЦIусса шинал зул кулпатирттавун хIат-хIисав дакъасса ххаришивуртту духханнав.

 

Юсуп МахIаммадов, Лак­рал райондалул бакIчи:
Ва жуятура нанисса шин дакIний лирчIунни республикалий ва райондалий хьусса хъунисса дахханашивурттайну.
ХьхьичIва-хьхьичI республикалул хъунама, мукунма чIярусса министерстварттал ва ведомствар­ттал каялувчитал баххана шаврийну. ДакIний лирчIунни цIуну увчIусса республикалул президентнал ттуйнма ДР-лул ХIукуматрал председательнал хъиривчунал къуллугъ тапшур баврийну ва яла, нава тавакъю бувну, махъунай ттула райондалийн, гава ттула къуллугърайн зана шаврийну. ДакIний личIансса хьунни нава вице-премьернал къуллугърайсса чIумал Правительствалул председательнащал ва министртурал кабинетрал вакилтуращал Лакрал ва Ккуллал райондалийн лагаву. КIирагу райондалул жяматращал хьунабавкьуну, къювулийсса масъаларттал хIакъиравусса ихтилатру шаву.
Микку гьаз хьуссия ШавкIрату Щаравсса ххуллул масъалагу. КIикку буссар ххуй бакъасса, Совет заманная шинмай ламу бишин къахъанахъисса кIану. Ахиргу, му захIматсса масъала щаллу бансса дайдихьу дурссар. Автодорданул хъунаманащал маслихIат ккавккун, квантовый ламу бансса пикри хьу­ссар, проектрал документру щаллу бан арцу итадаркьуссар.
ДакIний личIансса иш хьунни Дагъусттаннал президент Лакрал ва Ккуллал райондалийн учIаву, Гъумук цIусса, ттизаманнул техникалул лащу-щаллусса РОВД-лул къатри дурну къуртал даву. Ми къатри тапшур дуллай райондалий республикалул бакIчи акъассагу, Аьрасатнал МВД-лул СКФО-лул Хъунмур управлениялул каялувчи Сергей Ченчик, ДР-лул МВД-лул министр Аьвдурашид МахIаммадов гьуртту хьусса хъуннасса шадлугърал мажлис шаву.
Цуксса хIайпнугу, оьрмулуву ххаримургу, пашманмургу архIал най бур. ТачIав хъамакъабитансса кьурчIисса ишругу хьунни Лаккуй. Лавмартътурал оьрмулуцIа бунни райондалул виваллил иширттал отделданул ттарцIруну хьусса язи-язисса зузалт.
Ттула оьрмулувугу тIааьнну дакIний личIансса, райондалунгу агьамшиву дусса иш хьунни шинал ахирданий, ноябрь зуруй, нава Владимирскаллал областьрайсса Суздаль шагьрулий хьусса щалагу Аьрасатнал муниципал сакиншиннардал съездрай гьуртту шаву.
Щалагу билаятраясса 650 делегатнавух ххюя делегат Дагъус­ттаннаясса бия. Миннавух нагу ияв. Съездрайн Аьрасатнал президентгу увкIунни.
Му съездрал давриву чIявусса мюнпатсса масъалартту ххалбивгьунни. Хъиривмур кьини Москавлив, Кремлилуву, Владимир Путин хьунаавкьунни съездрал 50 делегатнащал. Щалвагу Ух­ссавнил Ккавкказуллал муниципал сакиншиннардал каялувчитурава бия Минводы шагьрулул ва Краснодардал мэртал. Дагъусттаннал делегатътурава ца на ияв.
Президентнащалсса хьунабакьаву тIааьнну дакIний лирчIунни. КIира ссят ва дачIиннуй ххалбигьлай буссияв хъуннасса агьамшиву дусса масъалартту. ЦIусса шиналгу райондалул даража гьаз бан­сса, агьалинал оьрмулул шартIру ххуй дансса ниятрай зунну. Ялун нанисса цIусса шин даркьусса, тIайлабацIусса хьуннав тIий, барча бан ччай ура лакрал, щалагу Да­гъусттаннал жямат.
Ттявх-шявхлил, пIякь учавур­ттал чIурду бухлавгсса, паракьатсса оьрмулийн бучIаннав. Жула оьрчIал бучIантIимуния нигь-ццах ба­къасса, кьатIув увкма сагъ-саламатну занаикIантIишиврийн вихшала дусса тагьар хIасул хьуннав Да­гъусттаннай. Гьарица къатлуву буллугъшиву, барачат ликканнав. Жува тIимур Залгу тIий лякъиннав.

 

МахIаммадхIажи Айдиев, ЦIуссалакрал райондалул бакIчи:
Республикалулгу, райондалулгу оьрмулуву дакIний личIансса иш хьунни Дагъусттаннал президент ахха­на шаву. Рамазан АьбдуллатIипов президентну увчIайхту, райондалул масъалартту лябукку буну щаллу хъанан бивкIунни.
Ларгсса шинал ЦIуссалакрал райондалул агьалинан дакIний личIансса иш хьунни Новостройрай, ЦIуссаккулув, 315 инсаннансса цIусса школа тIитIаву.
Бувну къуртал хьуну, зузи бан хIадурну буссар кIива школа цаймигу: ЦIуминалийсса ЦIуссалакрал шяраву – 704 инсаннансса, ЦIуссамехельтIиял шяраву – 250 инсаннансса.
ЦIусса шинаву цинявппагу да­гъусттанлувтуран чIа тIий ура дакьаву, паракьатшиву. Гьарица ужагъраву барачат ликканнав. Ххаришивуртту чIяру даннав.

 

Сяид Сулайманов, Ккуллал райондалул бакIчи:
Гьашинусса шин дайдирхьуна Дагъусттаннал цIусса Президент Рамазан АьбдуллатIиповлул цала давриву хьхьичIунсса 10 проект дузал буллансса чаранну ляхъла­хъаврияту. Ми ацIвагу масъалалувату жулламур райондалийн багьай­ссагу бия 9 масъала, шяраваллавусса хозяйствардал масъаларттаяту байбивхьуну, цIуллушиву дуруччаврийн бияннинсса. Мунийн бувну, райондалий социал давурттаха зий бивкIру, ми проектирдан аьркинсса арцурду жулла райондалийнгу итадакьиншиврул, аьркинсса чагъарду хIадур буллай. Ккуллал райондалий бувантIиссар шанма оьрчIал багъ: Вихьлив, Ваччав, Ккулув. Бювхъунни жул райондалийсса фермертураща хIукуматрал дуллалисса зана къадайсса кумагрансса грантру ласун. Ми грантру цирдагу дур ца миллиондалияр ххисса. Яла нава рязисса иш мугу хьунни, райондалий ятту-гъаттарал дикI хъуслийн дуккан дувайсса цех тIитIинсса инвестор лякъин бюхъаву. Му цех бикIантIиссар Ваччав. Микку дуван багьлай бур 40 миллиондалунсса давурттив. Чани буцаву, щин дуцаву, аьрщи дулаву жула чулуха дикIантIишиврий кьутIи чирчуну, икьрал дуварду. Ва цех бувсса чIумал, анжагъ инсантуран даву шаву бакъассагу, райондалий­сса шяраваллавусса инсантурангу шиккун ятту-гъаттара булаврийну къажанжи хъанантIиссар. Ва промышленностьрал зумуну ятту-гъаттара биххайсса, дикIуя хъус дувайсса предприятие дикIантIиссар. НакIлия хъус дувайма инвесторнахгу луглай буру.
Цукунсса хьуну ччива ялун нанимур шин? Вай кIивагу суал кунницIун ку бавхIусса бур. Умуд бур дакIниймургу щаллу дуван бю­хъанссар тIисса. Цалчин, буван тIий бур ШавкIуллал шяравалличIату, Хъуннеххал ялтту, Щардалмур аьрщарайнсса ламу. Ялунмур шинал ккаккан бувну бур Ваччату Вихьливсса ххуллу бакьин буван. Гикку кIива ламугу бакьин буван багьлагьиссар. Бакьин бувантIиссар Вихьлияту Къянив бияннинмур ххуллугу. ТIайлар, вай давурттив ца ялунсса шинал дузал дуван къахьунссар, лирчIми хъиривмур шинал дуванссар. Бакьин бувантIиссар Ваччавсса стадион, къуртал бувантIиссар Ваччавсса школа ва ЧIявсса спортзал. ДакIний буру, мукунма, жула шяраваллал бикIу, шагьрурдал бикIу, оьрчIан Ккуллал райондалий лагерь тIитIин. Ванийн уттигу жува пионертурал лагерь учару. ЦIанил иш бакъар, цукун учирчагу, оьрчIан бигьалагансса, цала ватан ххира хьунсса шартIру сакин дуван хьурча. ЯлунчIинсса шинал къабайбиширчагу, жула Ккуллал райондалун буллунни уттигу цIусса шанма школа. Ми школарду бувайхту, Вихьлив буллалимур къуртал бувайхту, вай школардачIа бикIан тIий бур интернатругу, му чIумал хьунтIиссар шяраваллава шагьрурдайн лавгсса жагьилтураща цала оьрчIру Лаккуйн дуклан гьан буллан. ХIасил, жунма яхI буллан багьлай бур, ялун нанисса ник цуксса бюхълай бурив, муксса зунттал тIабиаьтгу, оьрмугу ччан хъанахъисса пикрирдащал тарбия буллан. Му чIумал бучIиссар жунма: «Миллатрал хьхьичIсса буржру жувагу биттур бувссар», — учин.

 

ХIусайн ХIусайнов, Да­гъусттаннал медициналул академиялул фтизиатриялул кафедралул заведующий, профессор:
2013 шин ттула давриву, пишалуцIун бавхIусса иширттаву тIайлабацIу бусса дия учин бю­хъанссар.
Ттущагу, ттул коллегахъащагу, хаснува диспансерданул хъунама хIакин А. А. Адзиевлуща, мукIру бан бювхъунни жула каялувчитал ва жямат республикалий туберкулезрал тагьар ххуй чулий даххана хьушиврий.
Аьвзал заманная шинмай Дагъусттан туберкулез яла хъинну ппив хьусса региондалун ккаллину бивкIссар Аьрасатнаву. Жуярда оьккисса тагьар диркIссар так Туванал автоном республикалий. Махъсса 15 шинал дянив тагьар ялу-ялун ххуй хъанай дур. Туберкулезрал къашавай хъанахъаву республикалий кIилий чан хьуну дур, дянивну Аьрасатнавунияр 1,5 яларайну дур. Ва масъала жула академиялул Ученый советрай, Минздраврал коллегиялий ягу элмийсса конференциярттай ххалбигьлагьисса чIумал цIухлан бикIай, жучIарасса захIматсса шартIирдай, мукунсса къашайшалт хъин бан кIанттурду биял къахъанахъисса чIумал цукун бювхъуссар тагьар къулай дан тIий.
ХьхьичIва-хьхьичI республикалул агьалинал маэшат ххуй хьунни. Мугу хIисавравун ласун багьлагьисса хIуччар, цанчирча туберкулез инсаннал ахIвал-хIалдануцIун дархIусса азаруннин ккаллиссар.
КIилчин, республикалийсса ятту-гъаттара му азарунния хъин бувссар. Шамилчингу, къашай хьун нигьачIаву дусса группарду, яни Дагъусттаннай мукунминнан ккаллисса оьрчIру, мюрщи жагьилтал ва хъами азарунния буруччин бакIра-бакIрах профилактикалул мероприятияртту дуллай бивкIссар.
Ва ялагу, къашайшалт хъин бан хъинну мюнпат бусса кIанттул кьяйдарду ишла дуллай бивкIссар. Ми кьяйдардаву жу ляркъуссагу дур.
Жула тIайлабацIулулгу, харжру гьаз баврилгу гьавас бувтсса Да­гъусттаннал фтизиатортал ва азар духдан гихунмайгу хIарачат буллан тIий буру.
Ва шинал нава рязисса иш цамургу хьунни. «Фтизиатрия» тIисса ттула лу цIунилгу итабакьин хIадур бувну, типографиялийн булав. Ва лу цалчин итабавкьуссия 2004 шинал. Му ишла буллай бивкIссар жулами студентътал ва хIакинтал бакъассагу, Воронежрайсса, Алтайрайсса, Къазаннайсса ва цаймигу шагьрурдайсса ВУЗ-дал студентътал. Медициналул хьхьичIуннайшивурттацIун бавхIусса цIу-цIусса затру ххи бувсса уттимур изданиегу щалагу билаят­рал медициналул институтирттаву ишла буллан ккаккан бувну бур.
Ттула кулпатравугу хъуннасса ххаришиву хьунни ва ларгсса шинал. Ттул арснал арснан душ бунни. Мунингу, аьпа биву, ттула ниттил Марияннул цIа дуларду. Ниттил чаннасса цIа уттара хьуну рязину ура. Ялун нанисса цIусса шинал ттун ччива инсантурал дакIурдиву хъиншиврул кюру бувну. Инсантурал куннал куннайнсса веришиву, хIусутшиву духларгун.
Кьурандалий куну бур, питна бивкIулияр захIматссар куну. Питнарду бухлавгун, инсантураву куннал куннахсса ччаву ххишала хьуннав.
Инсан талихI-тирхханнарай оьрму бутаншиврул чIярусса арцу, хъус-хъиншиву, хъунисса къуллугъру къааьркинссар. Ми ци чулийгу цинявннан биянсса къабикIайссар. Инсаннал дакIниву баргъ бухьурча, чани бухьурча, марцIшиву духьурча – мунивур инсаннал талихI. На чIа тIий ура цинявппагу дагъусттанлувтуран, ттунма ххирасса «Илчи» кказитрал коллективран, цинявппагу буккултран муна мукунсса цила бикIайкунсса талихI.

 

Рамазан Фаталиев, Дагъус­ттаннал Композитортурал союзрал Правлениялул председатель, ДР-лул искусствардал лайкь хьусса зузала, Аьрасатнал Музыкалул обществалул лайкь хьусса зузала, ДР-лул ПаччахIлугърал премиялул лауреат.
2013 шин бигьасса шин дакъая. Ци чулийгу, жула биялдарайн дагьайсса давуртту лайкьну щаллу дан хIарачат буллай бивкIру. Хьунни дакIний личIансса мадарасса концертру, школардал, училищардал ва техникумирттал дуклаки оьрчIащалсса хьунабакьавуртту, личIи-личIисса юбилейрдацIун дархIусса шадлугърал мероприятияртту.
Яла-яла дакIний личIансса, яргсса иш хьунни шаэр Расул ХIамзатовлун 90 шин шаврин хас дурну Москавлив, Кремлилул дворецраву хьусса концертрай гьуртту шаву, мукунна ттула оьрмулул 50 шин хъанахъисса юбилей кIицI лагаву. Ттул юбилей шадлугърал даражалий, лахъа-хъунну кIицI дансса сиптачиталну бувккунни Мазрал, литературалул ва искусствалул институтрал каялувчитал, хаснува искусствалул отделданул хъунмур Э.Б. Аьбдуллаева. Миннахь дакIнийхтуну барчаллагь тIий ура.
ЦIусса шинал гьарицагу инсаннал дакIнийсса мурадру, хияллу бартлаганнав тIий ура. Зувагу, зул гъан-маччамигу цIуллуну, сагъну битаннав.

 

Бадрижат МахIаммад­хIажиева, Лакрал музыкалул ва драмалул театрданул художествалул каялувчи, АьФ-лул искусствалул лайкь хьусса зузала:
2013 шин нава каялувшиву дуллалисса Лакрал театрданун тIайлабацIусса дия. Ххуйсса кка­ккиярттахлу Аьрасатнал шанма театрданувух жуламур театргу лайкь хьунни АьФ-лул ХIукуматрал премиялун.
Волковлул премиялул лауреатътал хIисаврай, жуйн оьвкунни Дунияллул халкьуннал дянивсса театрдал фестивальданийн Ярославль шагьрулийн. Ва хъинну сий дусса, яла хьхьичIунми билаятрал ва дазул кьатIаллил театрду гьуртту хъанахъисса фестивальданий жу ккаккан барду Федерико Гарсиа Лоркал произведениялиясса «Бернардо Альбал къатта» спектакль. Зал тамашачитурал бувцIуну бия. Бюхттулсса даражалий кьамул бунни жула артистал.
ТIааьнну дакIний личIансса ишру цаймигу хьунни театрданул оьрмулуву.
Аьрасатнал Федерациялул Культуралул министерствалул кумаграцIух жу лавгру Нальчик­райн гастроллай. Ккаккан барду кIива спектакль «Ромео и Джулье­тта» ва «Бернардо Альбал къатта». КIивагу спектакль аншлаграл даражалий лавгунни. Театрданунгу, агьаммур роль дугьлай бивкIсса актриса Жинасат МахIаммадовангу Кабардин-Балкарнал Культуралул министерствалул чулуха ХIурматрал грамотартту дуллунни.
ЦIана театр зий бур «Камаллул Башир» проектраха. Ва спектакльданул цалчинма режиссер Аслан МахIаммадов хъанахъиссар, кIилчинма режиссер хIисаврай проектраву гьуртту хьунтIиссар Муса Оздоев. Спектакльдануву бикIантIиссар Ширвани Чаллаевлул музыка. Мукунма проектрал давриву гьуртту хьунтIиссар Ибрагьим Супьянов (сценограф), Фатима ХIажибекова (художник по костюмам). Умуд бур укун гьунар бусса инсантурал гьурттушинна дурсса спектакль яргсса, дакIний личIансса хьунссар тIисса.
Ларгсса шин, дайдирхьусса кунна, тIааьнсса, ххарисса иширайну къурталгу хьунни. Шинал ахирданий, творчествалул даврий ва хIукуматрал къуллугърай зий бивхьусса ттул захIматран лайкьсса кьимат бивщунни. Ттун дуллунни республикалул яла бюхттулмур награда – орден «За заслуги перед республикой». Му орденгу тту­хьхьун Республикалул Президентнал дуллунни.
ЦIусса шингу жула театрданун ваниярдагу даркьусса, тIайлабацIусса хьуннав тIий бура. Ччива цинявппагу лакран – респуб­ликалийминнангу, Дагъусттаннал кьатIувминнангу, театр миллатрал культуралул кюру бушиву бувчIлай, му буруччинсса аякьа дуллай. Ччива театр ххирами, тамашачитал ялу-ялун гьарза хъанай, театрданул каши ххи хъанай, даража гьаз хъанай. Жугу булланну жущава шаймур.
Барча буллай бура циняв­ппагу лак, жула культура ххирами, театрданул тамашачитал ЦIусса шинащал! Бивзний ша бакьиннав, дакIниймур бартлаганнав!

 

Сулайман Маммаев, Да­гъусттаннал медициналул академиялул проректор, виваллил азардал кафедралул заведующий, медициналул элмурдал доктор, профессор:
Жуятура нанисса шин ттун ххарисса, тIайлабацIусса дия. Хъунмур душ Фарида, школагу ххуйну къуртал бувну, Москавлив, лавайсса даражалул экономикалул школалул журналистикалул факультетрайн бувххунни. КIилчингу, жула ректоратрал на къуллугърал гьаз унна – на ивтунна Дагъусттаннал медициналул академиялул цалчинма проректорну. Гьай-гьай, му къуллугърай ттул бигардугу ххишала хьуссар. На жаваб дулайссар медакадемиялуву пишакартал хIадур баврихлу. Му хъуннасса жаваблувшинна дусса давур.
Ларгсса шинал дакIний личIансса иш хьунни ттула щарнил буттал ва ниттил Сиражуттин ва Мариян Илиясовхъал оьрмулул юбилей мачча-гъан, дустал, даврил уртакьталгу лагма лавгун лахъа-хъунну кIицI лагаву. Оьрмулул шинну нанаву ххари хьунсса иш бакъанугу, вай укун бусравну, хIурматрай бушиву тIааьнну асар хъанай бия.
Ялагу, ларгсса шинал ттул бутта Нураттин аьпалухьхьун лавгун 30 шин хьунни. Дата пашмансса дунугу, цинявппа оьрчIру, гъан-маччами бавтIун му дакIнийн утаву нава рязисса иш хьунни.
Ялун нанисса шинал чIа тIий ура цинявппа лакран цIуллушиву, дакьаву. Цаннан ца бувчIлай личIаннав. Каширду ххи даннав. ЩилчIав къушливун пашманшиву къадухханнав, оьрмулул къаувччуну дунияллия цучIав къагьаннав. ЦIусса шин барча тIий ура, мукуна, Гъумук ялапар хъанахъисса аьзиз­сса ттула ниттихь. Вил къушливу бивтнувасса баргъгу, лавхънувасса чирахъгу чан къахьуннав, ххирасса дадай!

 

МахIаммад Сунгъуров, Лакрал райондалул социал ишир­тталсса буллалисса управлениялул хъунама:
Ларгсса шинал жул кулпатраву ххарисса ишру хьунни. Мяйра шин Американаву дурсса ттул арснал Сурхайханнул ахиргу, хъунмасса хIаллай ялугьлай ивкIсса Американал гражданство ларсунни. Утти танал кIира гражданство дуссар – Американалссагу, Аьра­сатналссагу. Цамургу дакIний личIансса ххарисса иш хьунни ттула чIивимур душнил Сагъиратлул хъатIи. ДакIнийхтуну барчаллагь тIий ура ва ххаришиву жул кулпатращал кIидарчIусса, ттула чIарав бавцIусса дустурайн, даврил уртакьтурайн, гъан-маччанайн.
Рязину ура жула миллатран бакъа чара бакъасса «Илчи» кказит миллатрал оьрмулуву хъанахъисса цавагу иширал чIарах къабувккун, лавайсса даражалий буклай, ссавур дакъа ялугьлагьисса буккулт ххари буллай тIий.
ЦIусса шин барча тIий, гьарица лакку ужагърай барачат ликканнав тIий ура. Гьарица инсаннал ахIвал-хIал ххуй хьуннав, каширду ххи хьуннав, дакIниймунийн ияннав. Жула наслу тIайлабавцIусса хьуннав. Лакку билаятрай аргъ дизаннав.

 

Хан Баширов, пианист, Дагъусттаннал Музыкантътурал союзрал правлениялул председатель, Аьрасатнал искусствардал лайкь хьусса зузала, Дагъусттаннал халкьуннал артист:
2013 шинал республикалул тарихраву личIансса хъунисса ишру хьунни. Республикалул агьалинал лахъа-хъунну кIицI ларгунни Дагъусттан Аьрасатнавун бувххун 200 шин бартлагаву, халкьуннал шаэр Расул ХIамзатов увну 90 шин шаву, Аьрасатнал искусствардал лайкь хьусса зузала, композитор Кьасум МахIаммадовлун 70 шин хъанахъисса юбилей ва Дагъус­ттаннал Музыкантътурал союзран 55 шин шаву.
Дагъусттаннал Музыкантътурал союзрал правлениялул председатель хIисаврай, ттун ххуйну дакIний ливчIунни ва союзрал юбилейрацIун бавхIусса аьрххи-ххуллурду, цинярда концертру, хьунабакьавуртту. Мукунсса концертру хьунни Мос­кавлив, Калугалий, Ярославрай, Рязаннай, Твердай, Астраханнай, Волгоградрай, Саратоврай.
Вай цинявппагу шагьрурдайн жу лавгру тийхсса Дагъусттаннал диаспорардал оьвкуну, ялув кIицI ларгсса датардан хас дурсса концертирттащал.
Мура программалул лагрулуву бивру УзбакIнавун, Туркманнавун, Азирбижаннавун. ТIааьнну асар шайва залдануву ца унугу лаккучу лявкъукун. Ми жучIан гъан хьуну, мякьсса цIухху-бусу буллан бикIайва.
Ттун ляличIинува гъира бия Р. ХIамзатовлул юбилейрацIун дархIусса мероприятиярттавух гьуртту хьун. Ттул мунащал ххуйсса дусшиву дуссия, чIярусса шиннардий хIала-гьурттуну зий буссияв, цачIусса аьрххи-ххуллурду хьуссар. Шаэрнал ттуйн хъярчирай «музыкалул Хан, ччаврил Башир» чайссия. Ттун хас бувну укунсса ххаругу чивчуссия:
Пускай все кинжалы на свете
Игра твоя сейчас примирит,
Пусть щедрыми делает жадных
Ее зажигательный ритм.
Шинал лажиндарай жу кка­ккан дарду чирилул концертру ветерантуран, авгъанцинан, къашавайсса оьрчIан. «Мастера искусств России – детям страны», «Подари жизнь», «Поверь в себя», «Я люблю тебя, Россия» цIанилусса чирилул акциярду буллай, жу бивру республикалул кьатIувсса шагьрурдайнгу. Ми акциярдаву хъуннасса гьурттушинна дурну тIий ттун дуллунни грамотартту ва дипломру.
Республикалул магьирлугърал оьрмулуву дакIний личIансса иш хьунни ТIляратIиял райондалий хьусса Дагъусттаннал халкьуннал аслийсса культуралул фестиваль «Цамаури». КIикку хьунни бандура, чагъана бищаврил конкурсру. На уссияв му конкурсрал жюрилул председательну.
Ялагу, яргну дакIний личIанну, Дагъусттаннал халкьуннал лаххи-ликкиялуву кIицI ларгунни Да­гъусттаннал Конституциялул кьини. Москавлив, Зимний Дворецраву ларайсса даражалий ларгунни Дагъусттан Аьрасатнавун бувххун 200 шин шаврин ва Р. ХIамзатов увну 90 шин шаврин хас дурсса концерт.
ДакIний ливчIунни Миллатрал библиотекалуву хьусса МухIуттин Чариновлун 120 шин шаврин хас бувсса мажлис.
ЦIусса шин барча тIий, чIа тIий ура цинявппагу дагъусттанлувтуран, хаснува лакран, цIуллушиву, гьарица ишираву тIайлабацIу, дакьаву, паракьатшиву.
Ялун нанисса шин Балчаннул шин дур. Балчан аькьлу бусса жанаварди.
Къуллугъчитурал бикIу, укунмасса инсантурал бикIу аькьлулува бувксса тIуллу къадуваннав тIий ура.

 

АхIмад Кьурбанов, Да­гъусттаннал университетрал преподаватель, тарихрал элмурдал доктор, профессор:
Ларгсса шин дакIний лирчIунни республикалул каялувчитал баххана шаврийну. Кказитирттай бикIу, интернетраву бикIу агьали чялиш бувккун цIусса каялувчитурал хIакъираву цала пикри-зикри буслай бия. ЧIалай бия жула халкь рес­публикалий хъанахъимуния баччи бакъа бакъашиву, ми Дагъусттаннайсса тагьарданий, Дагъусттаннал бучIантIимуний дакI цIий бушиву. Ччива республикалул каялувчитал ва агьали куннан ку бувчIлай, жяматрал махъ каялувчитурачIан биллай. Къаччива Дагъусттаннай жула агьалигу, хъунимигу цанная ца архсса, гьарицама цайнува цува сукку тIисса тагьар хIасул хьуну.
Умуд бур ЦIусса шинал му чулухуннай ххуйсса дахханашивуртту хьунссар тIисса. Каялувчиталгу, агьалигу цаннан ца бувчIлай, ца ххуллийх бачинссар тIисса. ЦIусса шин барча дуллай, чIа тIий ура Дагъусттаннал халкьуннан талихI, давриву тIайлабацIу, ужагъраву нахIушиву.
Светлана Амирова, Дагъус­ттаннал педуниверситетрал аьмсса педагогикалул ва психологиялул кафедралул доцент, психологиялул элмурдал кандидат:
Ларгсса шин гороскопрайн бувну ттул шин дия. Мунияту чIявусса ттула хьул-умудру бартлагансса вихшала дуссия. Мукун хьугу хьунни.
Ттул оьрмулувугу, давривугу цин лархьхьусса хьхьичIуннайшивуртту, тIайлабацIурду хьунни. Яла-яла, ттула ххирасса, гъансса инсантал цIуллуну, сагъну бушиврия ххарину бивкIра.
Оьрму цила нирхирай най бия. Цала дакIнил лавсъсса пиша лахьлай, дуклай ур хъунама арс, цанна ччисса даврий авцIуну, зий ур чIивима. Ларгсса шинал цалчинмур классравун лавгунни уссил оьрчI. Яла-яла дакIний личIансса ишру хьунни аьзизсса дадан оьрмулул 75 шин шаву ва ттула ниттил ва буттал цачIу оьрму бутлай 50 шин хъанахъисса мусил хъатIул юбилей. Вай юбилейрду цинявппа гъан-маччами, архIал зузими лагма лавгун лахъа-хъунну кIицI даву. Лакрал оьрмулувусса цавагу чIиви-хъунсса иширал чIарах къабуккайсса «Илчи» кказит­ралгу дакIнийхтуну ттула нину-ппу барча баву.
Цуксса жунма къаччайнугу, оьрмулуву ххаримунищал, кьурчIимургу архIал най бур. Дунияллия лаглай бур жунма ххирасса инсантал. Ларгсса шинал аьпалу­хьхьун лавгунни ттул ххирасса ни­ттилссу Мадина. Цил бунагьирттал аьпа баннав.
ДакIний личIансса ишру хьунни республикалул оьрмулуву. ЦIусса президент, цIусса команда, цIусса хьул-умудру. Ттула пикрилий, уттиния тихуннай хьунтIисса хъунисса дахханашивурттал дайдихьу духьунссар.
ЦIусса шинал чIа тIий бура цинявннан цIуллушиву, ссавур. Лакрал агьалинан – жула ххуй-ххуйми аьдатру, культура, яхI-къирият дуруччаву.
Дагъусттаннан — дакьаву, паракьатшиву!

 

Айдамир Айдамиров, «Просвещение» элмисса ва производствалул центрданул ООО-лул директор:
ЦIусса шинал байрандалул хIакъираву бур кув «ва жула, лак­рал, байран дакъархха, ххачпарасналли» тIутIисса, вайми бур «бусурман байраннугу аьрабнаятур жула лакрачIан дирсса» тIий, бяст-ччаллихун багьну. Лак кунма азгъунсса миллатран гьарца лахIза – байранни, цанчирчан, Заннал янилу буну тIий. Хьхьарами ссаяту-бунугу аьсив буккайссар, лайкьмирив дакI цIакьну буссар, «гьарзад хъинмунийнни» тIий!
Къирим-татарнал буттал кIану кьабитан буллалийни лаккучунал арснал АхIмад-хан Султаннул увкуссар: «Туну нагу татарда, татар ниттил накI хIарчIсса!», — куну. Шамилчинмур виричушиврул Мусил цIуку булун «национальность» графа даххана дан къарязий хьуссар! ЯхI къабавххуссар (цIанасса усругу лирккун бачIва ччаннащал лажин лякъин левчуминнан эбратну хьун бучIиссар).
Къажлахъал МахIаммад-хан — дунияллийх цIа дурксса отоларинтолог, композитор Къажла­хъал Мурадлул ппу 40-лла шинал мутталий гьарца отпуск гьан бан Бакуяту Лаккуйн учIайсса ивкIссар. Чани хъя куну маркIачIаннин лак хъин буллай, миллатрай дакI цIий, зий ивкIссар гайми цащала зузими курортирдайх буклакисса чIумал. Сайки ттуршра шинал хьхьичI Къаяхъал Аьлил Гъумук бусурман дунияллийх цIа дурксса мадраса тIивтIуну, элмурдал дарсирдал дянив лакку мазрал дарс дишайсса диркIун дур. Цалагу тарихрал ва мазурдил элмурдал луттирду лакку мазрай чивчуну бур, вайминнал аьраб, парс, турк ягу оьрус мазрай чичлачийни! Укунсса азгъунсса буттахъал оьрчIруру жува – лак! Укунсса миллатрах ччаву дусса, яхI-къирият дусса, уздансса инсантал гьарза хьуннав лакраву.
Гьашину дуссия, аьпа баннав, ттул буттал ДучIиннал Айдахъал Зияуттин -хIажинан 85 шин шаврин хас бувсса, чичулт ва жямат бавтIсса, мажлисгу! Чансса бакъая буттахь «ина чичура, интеллигентра, Гьанжилив ва данну, та дулунну» тIутIиссагу, амма мямма «аькьлу буминнахгу» вичIи къадирхьуну зана хьуссар Лаккуйн, буттал шяравун ДучIив! Диян дурссар параннарал ххаллу, лавхъссар чирахъ буттал шяраву! ДучIиннал щар уттара дуклакиссар Лаккуй!
Ларгсса шинаву лакран кьур­чIисса ишругу хьунни: тарихрал элмурдал доктор, цIанихсса лаккучу Хъювхъиял МахIач лажин кIялану Заннал хьхьичI авцIунни! Аьпа баннав! Аьпа баннав циняв гьашину дунияллия лавгсса, жунма бакъа чара бакъасса цинявппагу лакрал! Лавгманал кIанттай арула аннав! Миннал кIанттай бацIансса арсру, душру буллалисса, лак гьарза буллалисса, ниттил маз ябуллалисса жула лакрал нинухъру Заннал ххари буллай, оьрчIаятугу, оьрмулиятугу рязийну битаннав! Жагьилтал оькки ххуй къабизайсса бизаннав, лакку мазгу, зунтталчунал массавгу дуручлачисса, «тIиртIунийн ка диллалисса» хьуннав. Лакран агьамсса, бакъа чара бакъасса «Илчи» кказит­рал зузалтгу дакIнийхтуну барча буллай ура.
Барча, лак, ЦIусса шин! Лак Заннан ххирану, Заннаяту ххарину, «жуламур буну чил къабацIлай» битаннав.

 

Саният Рамазанова, Лак­рал музыкалул ва драмалул театрданул артистка, ДР-лул лайкь хьусса артистка:
Ва жуятура нанисса шин ттун дия творчествалул чулуха тIайлабацIу бусса, хъинну авадансса, личIи-личIисса мюнпатсса аьрххи-ххуллурдацIун дархIусса.
Шин жул театрданул дайдирхьунни «Ромео и Джульетта» спектакльданул премьералия, яла шинал лажиндарай театрданул му цимилагу ккаккан бувссар. Миву на Джульеттал кормилицал роль дугьлай буссияв. Инттухунмай спектакль ккаккан бувссия «Классика на дагестанской сцене» тIисса VII-мур Дагъусттаннал театрдал фестивальданий. Му фестивальданий ттун буллунни «За лучшую женскую роль II плана» диплом. ТIааьнну дакIний личIансса хьунни театрданул республикалул кьатIувсса аьрххи-ххуллурдугу. Жу лавгру Владикавказрайн, Астраханнайн, Нальчикрайн. Лавгру Ярославрайн «Русская драматургия на языках мира» тIисса дунияллул халкьуннал дянив хъинну сий дусса Волковский фестивальданий гьуртту хьун.
Ва фестивальданийн оьвчай­ссар яла хьхьичIунми театрдайн. Аьрасатнал хьхьичIунсса шанма театрдавух лакрал музыкалул ва драмалул театрданийнгу оьвчаву му хъунмасса ишри. Му театрданул бивхьусса захIматран, артистурал гьунарданун бивщусса лайкьсса кьиматри. Та фестивальданий, Волковлул цIанийсса театрдануву жу ккаккан барду Федерика Гарсиа Лоркал произведениялиясса «Бернардо Альбал къатта» спектакль. Жула театрданун дуллунни Федор Волковлул цIанийсса Аьрасатнал Федерациялул хIукуматрал премия. Ва премиялун щалагу Аьрасатнаву лайкь хьуну бур бувагу шанма театр. Миннувух жуламургу. Фестивальданий гьуртту хьун бувкIун бия цаймигу театрду.
Ккаккан дурна Елена Образцовал концерт. Ва аьрххи хьунни ттун ляличIинува дакIний личIансса.
Ца навагу рязисса, нава ххирасса тамашачиталгу ххари бансса иш цамургу хьунни ттул оьрмулуву. Ттуйн оьвкунни «Жабраиловы» тIисса Москавуллал сериалдануву гьуртту хьун. КIийла лавгра съемкардайн Москавлив. Ва сериал дур Москавлив ялапар хъанахъисса оьрус душ бувцусса дагъусттанчунал кулпатраясса. На му Жабраиловлул маччадушнил роль дугьлай бура. Февраль зуруй ТНТ каналданий ккаккан дуллантIиссар тIий бур.
Ччива ялун нанимур шингу, ванияргу тIайлабацIусса хьуну жула театрданунгу, цинявппа магьирлугърал аралуву зузиминнангу.
Ччива цIусса шин ттула нитти-буттангу даркьусса хьуну, ми къаша-шавай къахъанай, цIуллуну, сагъну нава ххари буллай.

 

РахIима ХIажиева, Да­гъусттаннал базовый медициналул колледжрал преподаватель:
2013 шинал ттул оьрмулуву чIявусса дакIний личIансса ишру хьунни. Нава талихI бусса инсаннан ккалли бара, цанчирча гьарица ЦIусса шин на ттула аьзизсса нину дунияллийн дурксса ххарисса кьинилия дайдишара. Январь зурул 1-нний жу цинявппа гъан-маччами лагма лавгун му бувсса кьини кIицI дувару.
Ларгсса шинал цинявппагу республикалул агьалинан дакIний личIансса иш хьунни жула хъуними баххана шаву.
На оптимист бура. Вихну бура ххуйсса замана бучIаншиврийн, жула агьалинал оьрмулул даража гьаз хьуншиврийн, жула шагьрурду марцI хьуншиврийн, инсантурал дакIру тирх учиншиврийн. Вихну бура цIусса бакIчитал Конституциялул, исламрал ва яхI-къириятрал кьануннай сукку тIуншиврийн.
Ларгсса шинал ттул хъунмур душнил Шириннул къуртал бунни школа, лайкьну ЕГЭ-дугу дуллуну, цила бюхъулийну, цила кIулшивурттайну бувххунни Да­гъусттаннал университетравун, филологиялул факультетрал журналис­тикалул отделениялийн.
Оьрмулухун дакIний личIансса хьунни Барселона шагьрулийнсса аьрххи. Му ттул дазул кьатIувсса хьхьичIва-хьхьичIсса аьрххи бия. Барселона шагьрулул эмаратшиврул махIаттал-махIасара бувну бивкIра. Амма отпускрив на гьар шинах кунна гьашинугу гьан дав дунияллий яла караматмур кIанай – алжаннул ккурккайсса буттал шяраву Ккурклив. Ларгсса шинал ттул буттан Тамерланнун дуллунни «Заслуженный строитель РД» бусравсса цIа. Шинал ахирданийрив жу цинявппа уссурссу, гъан-маччами лагма лавгун кIицI дарду чIярусса шиннардий Дагъусттаннал университетраву дарс дихьлай ивкIсса, цаппарасса шиннардий машлул факультетрал деканну ивкIсса ттула буттауссийн КьурахIажи Вагьабовичлун 80 шин хъанахъисса юбилей. Сант дагьну дунура, дакIнийхтуну чIа тIий бура ххирасса буттауссин цIуллушиву.
ЦIусса шинал чIа тIий бура цинявппагу лакран, «Илчи» кказит­рал зузалтран ва буккултран, хаснува ттула шяраваллил жяматран, талихI-тирхханну, ххаришивуртту, тIайлабацIуртту. Нину-ппу оьрчIал, оьрчIру нитти-буттал ххари буллай личIаннав.