ЧIявучин бавссар уттигъанну «Дараччи» клубрал хъунмур Мариян Илиясовал сипталий дунияллийн бувксса «Мюрщи щаращал щурщу» тIисса, лакрал шаэртурал назмурду, личIи-личIисса магьри ва хаварду бивщусса луттирая.

Андриана Аьбдуллаева
ХIакьсса патриот Мариян ЧIибиевнал ва цалчинсса бахшиш дакъар цила миллатран дуллалисса. Лакку маз ябаврил цIаний, ялун нанисса ник ниттил маз ххирану, мунил кьадру-кьимат буну тарбия шаву мурадрай ванил уттинингу цимирагу ххаллилсса даву дурссар. Мариян ЧIибиевнал мудангу кабакьу буллалиссар лакку мазрал дарсру дихьлахьисса учительтуран, ччарча луттирдал чулуха, ччарча кабинетирттан аьркинмур щаллу дуллай. Ванилва сипталийя цаппара шиннардил хьхьичI байбихьулул классирттан­сса лакку мазрайсса букварьдугу итабавкьусса.
«Мюрщи щаращал щурщу» луттирайну багьа бищун къашайсса бахшиш дунни Мариян ЧIибиевнал лакку оьрчIангу, лакку мазрал дарсру дихьлахьисса учительтурангу, цинявппа лакрангу.
Уттигъанну «Дараччи» клубраву хьунни вай луттирду шагьрулул школардай лакку мазрал дарсру дихьлахьисса учительтуран бахшиш буллалисса акция.
Шикку гьуртту хьунни «Дара­ччи» клубрал член, искусствовед Гулизар Султанова, халкьуннал шаэр Сугъури Увайсов, ОьрчIал библиотекалул хъунмур Кубра Султанова. БувкIун бия сайки циняв МахIачкъалаллал школардай лакку мазрал дарсру дихьлахьисса учительтал.
— Гьашину жул клуб «Дараччи» сакин хьуну 15 шин хъанахъи­ссар. Ци дан хъинавав ва жула юбилейрал шинал миллатрангу мюнпатсса, «Дараччилул» тарихравугу личIансса тIий пикри буллай, укунсса лу итабакьин дакIнийн багьунни.
ХьхьичIва жучIава би­кIайссия оьрчIансса учебникру ва литература итабакьлакьисса «Учебно-педагогическое издательство». Ва идаралул учебникру бакъассагу, оьрчIан хасъсса назмурдал, хавардал ва магьрал луттирду итабакьайва. ХIукуматрай дахханашивуртту хъанахъисса 90-ку шиннардий «Учебно-педагогическое издательство» ларкьуна. ОьрчIан ккалан­сса луттирдугу чан хьуна. Лакку мазрайсса оьрчIансса луттирдугу махъсса шиннардий бувккунвагу бакъар. Мунияту жула чулухасса яла ххуймур бахшишну лу хьун­ссар тIий, халкьунналссагу, вари учинсса лакрал чичултралссагу шеърирду, кутIа хаварду, магьри цачIун бавтIун, ва лу итабакьарду. ЦIана ва лу бачIинтIиссар МахIачкъалаллал школардайх. Яла булунтIиссар Каспийскаллал, Хасавюртуллал ва цаймигу лакку мазрал дарсру дусса школардайн. Ва лу, зун, лакку мазрал учительтуран, зулла даврихсса гьавас бутан­сса, оьрчIангу лакку мазрах ччаву дишинсса ца ххишаласса багьанану хьуннав. Зу оьрчIал ххари баннав. ЗучIа дуклакисса лакку оьрчIая зул захIмат зия къабансса, миллатрал цIа-кьини бюхттул дансса оьрчIру хьуннав, — чIа увкунни Мариян Илиясовал учительтурахьсса ихтилатраву.
Хъирив, дакIний личIансса махъругу чивчуну, луттирду буллунни учительтурахьхьун. Аьркиннал ласун шиккува бивхьуну бия лакрал шаэртурал шеърирдал жужру, «Лакку дуниял» тIисса С. Мусаевлул сакин бувсса лакку мазрал ва оьрус мазрал словарьду. Ва акция чIюлу дунни №11 школалий лакку мазрал дарсру дихьлахьисса Самрат Рамазановащал бувкIсса дуклаки душварал ванил цила арснал душ Рамазанова Миланал ва Къушиева ПатIиматлул пасихIну лакку мазрай дурккусса назмурдал.
Гулизар Султанова:
— Укунсса лу цамур бушиву къакIулли лакрачIа. Ва бур 40-хъайсса шаэрнал оьрчIансса наз­мурду цачIун дурсса энциклопедия кунмасса лу. Ва лу сакин буллай хъунмасса захIмат бивхьунни Мариян Илиясовал. Хъирив лаллай, лагма буклай, ца-ца инсанначIан кIил-кIийла, шами-шамийла оьвтIий, цила дакI дирхьуну зий бия Мариян ва луттираха. Лу канил бугьан, шиву чивчумур буккин хъиннува тIааьнну бикIаншиврул, яла ххуйма художник, жула лаккучу А. Качаев, увцуну, оьрчIи-кIурисса суратирттал чIюлу бан бунни. Жула оьрчIру буттал кIану, цала миллат ххирану, ниттил мазрал тIин-тIааьн бувчIлай тарбия бансса, учительнангу цала давриву хъунмасса кумаг хьунсса лу хьунни ва. Лакку мазрал нахIушиву, тIин-тIааьн асар хьун буллай бур луттиравусса дискралгу. Ххарину буру укунсса лу жула лакку оьрчIачIан биллай тIий.
Земфира ХIажима­хIам­мадова, №56-мур школалул лакку мазрал учитель:
— ОьрчIан дарсирай бикIу, ша­ппа бикIу ишла буллансса лакку мазрал луттирду бакъа учительтуран захIматшиву дур. Библиотекарттай вайми миллатирттал мазурдил луттирду бур, ца жуласса бакъар. Классраву дарс дишайсса чIун ттучIавасса ца луттирая шарда данмур чичлай лаглай дур. Укун­сса захIматсса шартIирдай зузисса учительтуран ва луттирая ххуйсса кумаг хьун тIий бур. Ххуйну чIюлу бувсса, оьрчIавун гъира бутансса лу бур. Ттун цинявппагу лакку мазрал дарсру дихьлахьисса учительтурал чулуха барчаллагь учин ччай бур жунна ва бахшиш дурсса, мудангу шагьрулул школардай лакку мазрал дарсру дихьлахьисса учительтуран кабакьу буллалисса, чIарав бацIлацIисса Мариян ЧIибиевнахь.
Аьжа Аьбдулгъапурова, №22-мур лицейрал лакку мазрал учитель:
— Уттигъанну жу, шагьрулул школардай лакку мазрал дарсру дихьлахьисса учительтал, бавтIун «Дараччилул» дуссукъатлувун ва клубрал хъунмур, унгу-унгу цила миллат ххирасса Мариян ЧIибиевнал дакI ххари дансса хьунабакьаву хьунни.
ХIурмат бусса Мариян Чибиевнай! ДакIнихтуну барчаллагь тIий бура вихь аслийсса лакку мазрал дарсру дихьлахьисса учительтурал цIания. Багьа бищун къашайсса бахшиш дунни ина жун Учительтурал кьинилийн. Ва лу лакку мазрал дарсру дихьлахьисса учительтуран яла аьркинсса ва маз лахьхьин кумагрансса лу хьунссар тIий бура. Мариян ЧIибиевнай, ина мудангу жул чIарав бура, жун аьркинмур щаллу дуллай бура. ХIакьину №22 лицейравусса лакку мазрал кабинет вил кумаграцIухри на бувсса.
Вил оьрму лахъи баннав, цIуллушиву дулуннав, каши ххи даннав!