Октябрьданул 16-нний ахттакьун чIумал «Дагестан» РГВК-лий ДР-лул Президент Рамазан АьбдуллатIиповлул жавабру дуллунни журналистътурал ва инсантурал буллусса суаллахьхьун. Республикалул бакIчинал «ТIиртIусса власть» проектран хасну утти мукьулчинни дагъусттанлувтурал суаллахьхьун жавабру дуллалисса. ТIайланнасса эфирданул тема дия: «Дагестан: выбор сделан, приоритеты определены – надо работать!».

БакIрайва Рамазан Аьбдулла­тIиповлул дагъусттанлувтурахь барча увкунни Кьурбан-байран.
«ХьхьичIарасса исламрал байран тIайла дацIлацIиссар цIана жува щаллу буллалисса масъалар­ттащал. На уттигу тикрал буллай ура: жула ур ца Аллагь, ца пайханбар (пророк), жулва бур цинявннан цасса ца мубараксса Кьуръан, жулва бур циняв бусурманнан аьмсса хIадисру. Мунийн бувну жулва бусурманнахь цIуххин ччай бур: туну ссаллу жува личIи буллали­сса, цумур масъалалуцIунну жува бакъакьлакьисса, кунная-ку рязи бакъасса? Мукун бухьувкун ихтилат исламрая, диндалия бакъархха. Ихтилат бур цаппара инсантурал ухьттаншиврия. Му къатIайласса ххуллур.
Уттигъанну на муфтийнащал архIал хьунаавкьура Дагъусттаннайсса диндалул личIи-личIисса мазгьабирттащал ва бусурманнал умматрахь тавакъю барду цачIун хьун, цIулаган, марцI буккан. Муния махъ на АьФ-лул паччахIлугърал властьрал органнахь тавакъю був­ссар исламрал террорчишиврия, экстремистшиврия гъалгъа къатIун, цанчирча мукунсса затру дакъа тIий. Дуссар исламрайн къаршисса террорчишиву ва экстремистшиву. Ттул пикрилий, вай ми пикрирду ва идеярду кIулну бикIан аьркинни циняв бусурманнан ва цаймигу диннал умматуннан. Жура дуллай буру Дагъусттан Аьрасатнал паччахIлугъравун бувххун 200 шин шаврил шадлугъ. ЧIявуну Москавлив ва шикку ихтилат буллай, на мудан бусара, Дагъусттан – му билаятравун исламрал, ххачпараснал ва ягьудинал динну дуркIсса кIану бушиву. Ми дуркIссар Дарбантлийхчил. Мунил бусласиссар Да­гъусттан – му аьвзал заманная нанисса цивилизация душиву.
Жура дарду мукунна хъунасса шаэр Расул ХIамзатовлун 90 шин шаврил шадлугъгу. Мугу хьуссар жулла республикалий цинявн­нан цасса шадлугъ. Москавлив тIиртIунни Расул ХIамзатовлун гьайкал В.В. Путингу гьурттуну. Яла шадлугърал вечерданий дурккуна АьФ-лул Президентнал барча баву. Му шадлугъ дуруна Москавливгу, С-Петербургливгу, жулва чIаххувсса регионнайгу. Мунил бусласи­ссар жува бушиву культурнайсса паччахIлугърал бутIа, жула культурагу, хьхьичIуннайшивурттугу хъанай дур щалла Аьрасатнал паччахIлугърал культуралул ва хьхьичIуннайшивурттал бутIану», — увкунни республикалул бакIчинал.
Яла ДР-лул Президентнал бувсунни республикалийсса жяматий­сса ва политикийсса тагьардания.
ТIайланнасса эфир лахъи ларгунни 2 ссятраяр ххишала. Республикалул бакIчинал жавабру дуллунни студиялувусса журналистътурал ва телефоннавух ва интернетравух инсантурал буллусса суаллахьхьун.
ХIадур бувссар ХI. Аьдиловлул