АьФ-лул ПрезидентначIасса Дагъусттаннал Постпредстволул Москавлив «Матвеевский» рынокрай хьусса къалмакъалданул хIакъираву укун баян бунни: «Июль зурул 27-нний Москавлив «Матвеевский» рынокрай полициянал зузалтрал ва даххултрал дянив закканттай бувксса къалмакъал хьунни, уголовный розыскрал сотрудникнайн му биявриву цIунцIия хьунни. Полицай авттун тIий бувгьунни Дагъусттаннаясса лас ва щар. АьФ-лул УК-рал 317-мур статьялийн бувну миннай полициянал зузалтращал бияву, цIунцIия дуваву тахсирну ккаклай бур.
Му иш хьуния мукьах Дагъусттаннал Постпредстволийн чIявусса дагъусттанлувтал аьрзирай букIлай бур: кув бур полициянайн биян ххявхсса лас-щарний аьй-бювкьурдай, кувгу Москавуллал полициянал даврия рязи бакъа. Махъсса ппурттуву, республикалул хъуниминнал цимилагу баян бунни дагъусттанлувтуран Аьрасатнал цайми регионнай бикIу, Москавлив бикIу къаххуйну къуццу тIун къабучIишиву. Дагъусттанлувтуран лайкь дакъасса тIуллу дуллалими дащуй бихьлай бур цинявппа дагъусттан агьлу, ми чув яхъанай бухьурчагу. Амма чIявусса бур дагъусттанлувтурал дянив, цивппа билаятрал территориялий бунува билаятрал граждантал бакъасса кунма буру тIутIиссагу.
Ци иш-тагьар дуссарив хъирив къалавнува дуллалисса ихтияр дуруччай структурардал закондалийн къаршийсса давурттив чувшиврун ккалли дуллалавугу къатIайлассар, агьалинан цалва гуж ккаккан буллалаву къаххуйссар. Мукунсса тIуллалли агьалинавун полициянайнсса хIусутшиву рутлатиссагу.
Ва «Матвеевский» рынокрай хьусса иширавугу хъирив къалавнува, тахсикарталли тIий инсантал оькки-ккаккул буллалаву къатIайлассар, чIявусса миллатру яхъанахъисса билаятрай мукунсса иширтталли тагьар оьлукъин дуван бюхъайссагу. Дагъусттаннал хъуниминнан ччимургу, цивппа чун гьарчагу, дагъусттан агьлу ми регионнал законнал ва культуралул аьдатирттал хIурмат буну, Аьрасатнал Федерациялул граждантал кунма къуццу тIутIавур.
Дагъусттаннал Президентнал къуллугъ чIумуйну бартбигьлагьисса Рамазан АьбдуллатIиповлул мудангу тикрал бувай, жува ца билаятрал граждантал бушиву, куннащал ку бавкьуну, нахIуну бакъасса, цамур куццуй къуццу тIун къабучIишиву.
ХIадур дурссар П. Рамазановал
