Июль зурул 28-нний Дагъусттаннал Президентнал къуллугъ чIумуйну бартбигьлагьисса Р. АьбдуллатIипов Каспийскаллал флотилиялул МахIачкъалаллал базалийн ивну, хьхьричитал барча бунни Аьрали – хьхьирил флотрал кьинилущал.

Президентнащал архIал хьхьиричитал барча буллалисса шадлугърай гьурттушинна дунни ХIукуматрал председатель Аьбдуссамад ХIамидовлул, ДР-лул Президентнал ва ХIукуматрал Администрациялул хъунама Шагьабас Шагьовлул, ХIукуматрал председательнал хъиривчу Рамазан Жафаровлул, Мюхчаншиву дуруччаврил Советрал секретарь МахIаммад Баачиловлул, МахIачкъалаллал мэрнал кIанайсса Муртазааьли Рабадановлул.
Дагъусттаннал бакIчи ва цаймигу бусравсса хъамал шадлугърай хьунабавкьуна хьхьирил жамирдал 106-бригадалул составрал.
Хьхьиричитал барча буллалисса ихтилатраву республикалул бакIчинал кIицI лавгунни, армия ва флот Аьрасатнал паччахIлугъ цIакь дуллалисса гьанулул чартту хъанахъишиву.
«Зун кIулссар Совет Союзрал Виричунал, щинал лултту дуккай лодкалул командирнал, МахIаммад ХIажиевлул цIа, мунал Совет Союзрал хьхьирил флотран ххаллилсса традициярттал гьану бивзссар, на навагу 8 шинай Мурманскаллал лаваймур инженерно-морское училищалул кафедралий каялувшиву дуллай ивкIссара, хьхьиричIангу, хьхьирил флотрачIангу гъан­сса инсанна», — увкуна Р. Аьб­дуллатIиповлул.
«Дагестан» тIисса ракеталул жамилий экскурсиялий бунува, Р. АьбдуллатIиповлул генерал МахIаммад Ти­нама­хIаммадовлуйн тапшур бувна республикалий ХIаписартурал къатта хIасул буван. Дагъус­ттаннал жагьилтал аьралий къуллугърайн хIадур бай кIану хIисаврайсса даву хьунтIиссар, му къатта буваву, му даву бартдигьин кумаг буван махъ буллай ура, увкуна Дагъусттаннал бакIчинал.
ДР-лул ХIукуматрал
ва Президентнал пресс-служба